ତେଲୁଗୁ ସୁପରଷ୍ଟାର ପଓ୍ୱନ କଲ୍ୟାଣଙ୍କ ଜନ୍ମଦିନ ପାଳନ ପ୍ରସ୍ତୁତି ସମୟରେ ଦୁର୍ଘଟଣା,୩ ମୃତ ୩ ଆହତ

ହାଇଦ୍ରାବାଦ: ଫିଲ୍ମ ସୁପରଷ୍ଟାର ପଓ୍ୱନ କଲ୍ୟାଣଙ୍କ ଜନ୍ମଦିନ ପାଳନ କରିବାକୁ ନେଇ ପ୍ରସ୍ତୁତି ସମୟରେ ଏକ ବଡ଼ ଦୁର୍ଘଟଣା ଘଟିଛି । ୨ ସେପ୍ଟେମ୍ବରକୁ ପଓ୍ୱନଙ୍କ ଜନ୍ମଦିନ । ଯାହାକୁ ତାଙ୍କ ରାଜ୍ୟର ଲୋକ ଖୁବ ଉତ୍ସାହର ସହିତ ପାଳନ କରନ୍ତି । ପ୍ରତିବର୍ଷ ଭଳି ଏ ବର୍ଷ ମଧ୍ୟ ତାଙ୍କ ପ୍ରଶଂସକ ପଓ୍ୱନଙ୍କ ଜନ୍ମଦିନକୁ ଖୁବ ଧୁମଧାମରେ ପାଳନ କରିବା ପାଇଁ ପ୍ରସ୍ତୁତି କରୁଥିଲେ । ଯେଉଁଥିରେ ତାଙ୍କର କିଛି ପ୍ରଶଂସକ ୪୦ ଫୁଟ ଉଚ୍ଚରେ କଟଆଉଟ ଲଗାଉଥିବା ସମୟରେ ହାଇ ଭୋଲଟେଜ ତାର ସମ୍ପର୍କରେ ଆସି ତିନି ଜଣଙ୍କ ମୃତ୍ୟୁ ହୋଇଛି । ଏମାନଙ୍କୁ ବଞ୍ଚାଇବାକୁ ଯାଇ ଅନ୍ୟ ୩ ଜଣ ଗମ୍ଭୀର ଆହତ ହୋଇଛନ୍ତି । ଗମ୍ଭୀର ବ୍ୟକ୍ତିଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି ।

ପୋଲିସର ସୂଚନା ଅନୁଯାୟୀ ୧ ସେପ୍ଟେମ୍ବରକୁ ରାତି ପ୍ରାୟ ସାଢେ ଆଠଟା ସମୟରେ ଆନ୍ଧ୍ର ପ୍ରଦେଶର ଚିତ୍ତୁର ଜିଲ୍ଲାରେ ଏହି ଦୁର୍ଘଟଣା ଘଟିଛି । ତେବେ ମୃତକଙ୍କ ପରିବାରର ଦାୟୀତ୍ୱ ନେବେ ବୋଲି କହିଛନ୍ତି ପଓ୍ୱନ । ମୃତକଙ୍କ ପରିବାରକୁ ଦୁଇ ଲକ୍ଷ ଲେଖାଏଁ ଦେବା ପାଇଁ ସେ ଘୋଷଣା କରିଛନ୍ତି । ଉକ୍ତ ଘଟଣାରେ ଆନ୍ଧ୍ର ପ୍ରଦେଶର ପୂର୍ବ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ଦୁଃଖ ପ୍ରକାଶ କରିଛନ୍ତି । ବଲିଉଡ ପ୍ରଯୋଜକ ଏବଂ ନିର୍ଦ୍ଦେଶକ ବୋନି କପୂର ଟ୍ୱିଟ କରି କହିଛନ୍ତି କି ମୃତକଙ୍କ ପରିବାରକୁ ୨ ଲକ୍ଷ ଲେଖାଏଁ ସହାୟତା ରାଶି ପ୍ରଦାନ କରାଯିବ ।