ନ୍ୟାସନାଲ ହେରାଲ୍ଡ ମାମଲା: ଭୁବନେଶ୍ବର ଇଡି ଅଫିସ ଆଗରେ କଂଗ୍ରେସର ବିକ୍ଷୋଭ

ଭୁବନେଶ୍ବର: ରାଜଧାନୀ ଭୁବନେଶ୍ୱରର ଇଡି ଅଫିସ ଆଗରେ ଯୁବ କଂଗ୍ରେସ କର୍ମୀଙ୍କ ବିକ୍ଷୋଭ । ନ୍ୟାସନାଲ ହେରାଲ୍ଡ ମାମଲାରେ ସୋନିଆ ଗାନ୍ଧୀ ଓ ରାହୁଲ ଗାନ୍ଧୀଙ୍କ ବିରୋଧରେ ଚାର୍ଜସିଟ୍ ଫାଇଲ ପରେ ଇଡି ଅଫିସ ଘେରାଉ କରିଚି ରାଜ୍ୟ ଯୁବ କଂଗ୍ରେସ ।

ବିରାଟ ଶୋଭାଯାତ୍ରାରେ ଇଡି ଅଫିସରେ ପହଞ୍ଚି ଥିଲେ ଶତାଧିକ ଯୁବ କଂଗ୍ରେସ ନେତା ଓ କର୍ମୀ । ଯୁବ କଂଗ୍ରେସ ସଭାପତି ରଞ୍ଜିତ ପାତ୍ରଙ୍କ ନେତୃତ୍ଵରେ ବିକ୍ଷୋଭ ପ୍ରଦର୍ଶନ କରାଯାଇଛି । ରାହୁଲ ଗାନ୍ଧୀ ଓ ସୋନିଆ ଗାନ୍ଧୀଙ୍କ ବିରୋଧରେ ଇଡିରେ ହୋଇଥିବା ମାମଲା ପ୍ରତିବାଦରେ ରାଜ୍ୟ ଇଡି ଅଫିସ ସମ୍ମୁଖରେ ଜୋରଦାର୍ ବିକ୍ଷୋଭ ପ୍ରଦର୍ଶନ ବେଳେ ଉତ୍ତେଜନା ପରିସ୍ଥିତି ବି କିଛି ସମୟ ପାଇଁ ଉପୁଜିଥିଲା ।

କେନ୍ଦ୍ର ସରକାରଙ୍କ ପ୍ରାୟୋଜିତ ଷଡଯନ୍ତ୍ରକୁ ସହ୍ୟ କରାଯିବ ନାହିଁ । ଆନ୍ଦୋଳନ ଆଗକୁ ଆଉରି ଜୋରଦାର କରାଯିବ ବୋଲି ଯୁବ କଂଗ୍ରେସ ନେତା ଚେତାବନୀ ଦେଇଛନ୍ତି । ସେପଟେ ବରିଷ୍ଠ କଂଗ୍ରେସ ନେତା ତାରାପ୍ରସାଦ ବାହିନୀପତି ବିକ୍ଷୋଭ ସ୍ଥଳରେ ପହଞ୍ଚି କଂଗ୍ରେସ ପ୍ରତି ଇଡିର ପଦକ୍ଷେପକୁ ବିରୋଧ କରିଛନ୍ତି ।