ୱିମ୍ବଲଡନ ୨୦୨୨ ମହିଳା ଏକକ: ଜାବୁରଙ୍କୁ ହରାଇ ଏଲେନା ରାଇବାକିନା ଚମ୍ପିଆନ

ନନ୍ଦିଘୋଷ ବ୍ୟୁରୋ: କାଜାକିସ୍ତାନର ଏଲେନା ରାଇବାକିନା ପ୍ରଥମଥର ପାଇଁ ଗ୍ରାଣ୍ଡ ସ୍ଲାମ ଟାଇଟଲ୍ ଜିତିଛନ୍ତି। ୨୩ ବର୍ଷୀୟ ଏଲେନା ଫାଇନାଲରେ ଓନ୍ସ ଜାବୁରଙ୍କୁ ପରାଜିତ କରି ୱିମ୍ବଲଡନ ୨୦୨୨ ଚମ୍ପିଆନ ଘୋଷିତ ହୋଇଛନ୍ତି । ତିନୋଟି ସେଟରେ ବିପକ୍ଷ ଜାବୁରଙ୍କୁ ୩-୬, ୬-୨, ୬-୨ ବ୍ୟବଧାନରେ ହରାଇଛନ୍ତି । ପ୍ରଥମ ସେଟରେ ଜାବୁର ଭଲ ପ୍ରଦର୍ଶନ ଦେଖାଇଥିଲେ । ୬-୩ରେ ଆଗରେ ରହିଥିଲେ । ହେଲେ ଅନ୍ୟ ଦୁଇଟି ସେଟରେ ସେ ଏଲେନାଙ୍କୁ ମାତ୍ ଦେବାରେ ସକ୍ଷମ ହୋଇନଥିଲେ ।

ପ୍ରଥମ ଆରବ ମହିଳା ଭାବେ ଜାବୁର ଗ୍ରାଣ୍ଡ ସ୍ଲାମ ଫାଇନାଲ ଖେଳୁଥିଲେ । ତାଙ୍କର ପୂର୍ବ ଫର୍ମ ଜବରଦସ୍ତ ଥିଲା । ସମସ୍ତେ ଭାବୁଥିଲେ ଜିବୁର ଜିତିବେ ବୋଲି, ହେଲେ ପରାଜିତ ହୋଇଛନ୍ତି । ଅନ୍ୟପକ୍ଷରେ ନୂଆ ଚମ୍ପିଆନ ଏଲେନା ଗ୍ରାଣ୍ଡ ସ୍ଲାମ ଜିତିବା ପରେ ଭାବବିହ୍ୱଳ ହୋଇଛନ୍ତି । ସେ କହିଛନ୍ତି ଏ ବିଜୟ ଶ୍ରେୟ ମୋ ବାପା ମା’ଙ୍କୁ ଦେଉଛି । ତାଙ୍କ ବିନା ମୁଁ କିଛି ବି ନୁହେଁ । ଫାଇନାଲ ମ୍ୟାଚରେ କୋର୍ଟକୁ ଓହ୍ଲାଇବା ସମୟରେ ଟିକେ ନର୍ଭସ ଲାଗିଥିଲା । ଯାହା ହେଉ ମ୍ୟାଚ ସରିଯାଇଛି ଆଉ ମୁଁ ବିଜୟୀ ହୋଇଛି  । ବହୁତ ଖୁସି ଅଛି  ।