ଭିଜିଲାନ୍ସ ଜାଲରେ ନୂଆପଡ଼ା ଏସିଏସଓ ରତ୍ନାକର ସେଠୀ, ଏକକାଳୀନ ୬ଟି ସ୍ଥାନରେ ରେଡ୍

କଟକ: ଭିଜିଲାନ୍ସ ଜାଲରେ ନୂଆପଡ଼ାର ଅତିରିକ୍ତ ଯୋଗାଣ ଅଧିକାରୀ ରତ୍ନାକର ସେଠୀ । ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ରେଡ୍ କରୁଛି ଭିଜିଲାନ୍ସ । କଟକ, ଚୌଦ୍ୱାର, ନୂଆପଡ଼ାର ୬ଟି ସ୍ଥାନରେ ଏକକାଳୀନ ଚଢ଼ାଉ ଚାଲିଛି । କଟକରେ ୩, ଚୌଦ୍ୱାରରେ ଗୋଟିଏ ଓ ନୂଆପଡ଼ାର ଦୁଇଟି ସ୍ଥାନରେ ରେଡ୍ ହୋଇଛି । ଚଢ଼ାଉରେ ୬ ଜଣ ଡିଏସପି, ୧୨ ଜଣ ଇନ୍ସପେକ୍ଟର ଓ ଅନ୍ୟ ଅଧିକାରୀ ସାମିଲ ହୋଇଛନ୍ତି । ଏ ପର୍ଯ୍ୟନ୍ତ ୧ କୋଟି ୧୩ ଲକ୍ଷ ଟଙ୍କାର ବୀମା ପ୍ରିମିୟମ ଠାବ ହେଲାଣି । କଟକ ଚାଉଳିଆଗଞ୍ଜରେ ଏକ ତିନି ମହଲା କୋଠା ଠାବ ହୋଇଛି । ସେହିପରି କଟକ ବାଲିସାହିରେ ଗୋଟିଏ ଦୁଇ ମହଲା କୋଠା ଠାବ ହୋଇଥିବାବେଳେ, ବାଲିସାହିରେ ନଟରାଜ ପ୍ୟାଲେସ ନାଁରେ ରହିଛି କଲ୍ୟାଣ ମଣ୍ଡପ । ଚୌଦ୍ୱାର ଓରନ୍ଦାରେ ୩ ଏକର ଜମି ସହ ଗେଷ୍ଟ ହାଉସ୍ ଠାବ ହୋଇଛି । ୪୯୮ ଗ୍ରାମର ସୁନା ଓ ଅଢ଼େଇ କେଜିର ରୁପା ଗହଣା ଜବତ କରିଛି ଭିଜିଲାନ୍ସ । ୬ଟି ସ୍ଥାନରେ ୬ଟି ଟିମ୍ ଏକକାଳୀନ ରେଡ୍ କରୁଛନ୍ତି । କଟକ ସ୍ପେଶାଲ ଜଜଙ୍କ ସର୍ଚ୍ଚ ଓ୍ୱାରେଣ୍ଟ ବଳରେ ଚାଲିଛି ରେଡ୍ ।