ଭିଡ଼ ବଢ଼ାଇଲା ଦର, ୩୦ ତଳେ ନାହିଁ କୌଣସି ପନିପରିବା

ଭୁବନେଶ୍ୱର: ଲକଡାଉନ ପୂର୍ବରୁ ଆକାଶ ଛୁଆଁ ହେଲା ପରିବା ଦର । ଗତକାଲି ଅପେକ୍ଷା ଆଜି ସବୁ ପରିବାର ଦର ବୃଦ୍ଧି ହୋଇଛି । ରାଜଧାନୀର ପ୍ରତି ହାଟରେ ଭିନ୍ନ ଭିନ୍ନ ଦର ଦେଖିବାକୁ ମିଳିଛି । ଭୁବନେଶ୍ୱର ଏକ ନମ୍ବର ହାଟରେ ବିଭିନ୍ନ ପନିପରିବାର ଦର ଯେତିକି ରହିଛି ଚାରି ନମ୍ବର ହାଟରେ ଦର ତା’ଠୁ ଦୁଇଗୁଣା । ସେହିପରି ଗାନ୍ଧି ମାର୍କେଟରେ ମଧ୍ୟ ଦର ଉଚ୍ଚା ରହିଛି । ଆସନ୍ତାକାଲି ଠାରୁ ରାଜ୍ୟରେ ଲକଡାଉନ ଆରମ୍ଭ ହେବାକୁ ଥିବାରୁ ଲୋକମାନେ ଆଜି ବଜାରରେ ଅତ୍ୟଧିକ ଭିଡ଼ କରି ପନିପରିବା କିଣି ନେଇଛନ୍ତି ।

ଘରେ ଯେତିକି ଆବଶ୍ୟକ ତା’ଠାରୁ ଯଥେଷ୍ଟ ଅଧିକ ନେଇ ମହଜୁଦ୍ ରଖିଛନ୍ତି । କମ୍ ଆମଦାନୀ ସାଙ୍ଗକୁ ଅଧିକ ବିକ୍ରିକୁ ଦେଖି କେତେକ ନ୍ୟସ୍ତ ସ୍ବାର୍ଥ ବ୍ୟବସାୟୀ ଫାଇଦା ଉଠାଇ କଳାବଜାରୀ କରିବା ଦେଖିବାକୁ ମିଳିଛି । ଏହାକୁ ନେଇ ବ୍ୟବସାୟୀ ସଂଘ କହିଛି ମାର୍କେଟ ଉପରେ ନିୟନ୍ତ୍ରଣ ରହିଛି । କିନ୍ତୁ ଗଳିକନ୍ଦିରେ କିଏ କଞ୍ଚା ପରିବା ଅଧିକ ଦରରେ ବିକ୍ରି କଲେ ସେମାନଙ୍କ ଉପରେ ରୋକ୍ ଲଗାଇବା ଅସମ୍ଭବ ।

ଆଜି ରାଜଧାନୀରେ ବାଇଗଣ କେଜି ପିଛା ୫୦ ଟଙ୍କା, କାକୁଡି ୬୦ ଟଙ୍କା, ପୋଟଳ ୧୦୦ ଟଙ୍କା, ଭେଣ୍ଡି ୬୦ ଟଙ୍କା, ଗାଜର ୬୦ ଟଙ୍କା, ଟମାଟୋ ୩୦ ଟଙ୍କା, କଲରା ୬୦ ଟଙ୍କା, ଅମୃତ ଭଣ୍ଡା ୪୦ ଟଙ୍କା, ବନ୍ଧା କୋବି ୬୦ ଟଙ୍କା, ଆଳୁ ୧୮ ଟଙ୍କା, ପିଆଜ ୨୫ ଟଙ୍କା, ଝୁଡୁଙ୍ଗ ୬୦ ଟଙ୍କା, ବିନ୍ସ ୬୦ ଟଙ୍କା, ସଜନା ଛୁଇଁ ୮୦ ଟଙ୍କା,  ଫୁଲକୋବି ଗୋଟା ୫୦ ଟଙ୍କା ରହିଛି ।