ଉତ୍ତରାଖଣ୍ଡରେ ଜଳପ୍ରଳୟ; ଉଦ୍ଧାର କାର୍ଯ୍ୟରେ ନିୟୋଜିତ SDRF ଟିମ୍
1 min read
ନୈନିତାଲ: ଉତ୍ତରାଖଣ୍ଡରେ ଜଳପ୍ରଳୟ ସ୍ଥିତି ଦେଖାଦେଇଛି। ଗତକାଲିଠାରୁ ପ୍ରବଳ ବର୍ଷା ସହ ଭୂସ୍ଖଳନ ଯୋଗୁ ସ୍ଥିତି ବେହାଲ । ନୈନିତାଲ ଅନ୍ତର୍ଗତ ରାମଗଡରେ ଆଜି ସକାଳୁ ମୂଷଳ ଧାରାରେ ବର୍ଷା ଆରମ୍ଭ ହୋଇଯାଇଥିବା ବେଳେ ପାହାଡ଼ ଧସିବା ଯୋଗୁ ଅନେକ ଯାତ୍ରୀ ଫସି ରହିଛନ୍ତି । ଧସି ଥିବା ପାହାଡ଼ ତଳେ ଅନେକ ଗାଡ଼ି ଫସି ରହିଛି।
ଘାଟି ରାସ୍ତା ଦେଇ ଆସୁଥିବା କେତେକ କାର୍ ତଳକୁ ଖସିପଡ଼ିଥିବା ବେଳେ କ୍ରେନ୍ ସାହାଯ୍ୟରେ ଉଦ୍ଧାର କରାଯାଉଛି। ଅନେକ ଯାତ୍ରୀ ମୃତାହତ ଆଶଙ୍କା ରହିଛି। ଆସନ୍ତା ୨୪ ଘଣ୍ଟା ପର୍ଯ୍ୟନ୍ତ ପ୍ରବଳ ବର୍ଷା ଆଶଙ୍କା ଥିବା ବେଳେ ସତର୍କ ସୂଚନା ଜାରି କରିଛି ପାଣିପାଗ ବିଭାଗ। ସେପଟେ ଦେବଭୂମିର ଅନ୍ୟ ଜିଲ୍ଲାରେ ବି ଲଗାଣ ବର୍ଷା ଓ ଭୂସ୍ଖଳନ ଯୋଗୁ ଏବେସୁଦ୍ଧା ପ୍ରାୟ ୫ଜଣଙ୍କ ମୃତ୍ୟୁ ହୋଇଛି ।
ଚମୋଲି ଜିଲ୍ଲାରେ ପ୍ରବଳ ବର୍ଷା ଯୋଗୁ ମନ୍ଦାକିନୀ ନଦୀରେ ବନ୍ୟା ସ୍ଥିତି ଉପୁଜିଛି । ସେପଟେ ଗଙ୍ଗାରେ ଜଳସ୍ତର ବୃଦ୍ଧି ଯୋଗୁ ଋଷିକେଶ ଓ ଅନ୍ୟଘାଟ ଜଳମଗ୍ନ ହୋଇଛି । ବର୍ଷା ଓ ବାଦଲ ଫଟା ବର୍ଷା ଯୋଗୁ ଏ ପର୍ଯ୍ୟନ୍ତ ପ୍ରାୟ ୧୬ଜଣଙ୍କର ମୃତ୍ୟୁ ହୋଇଛି । ସେପଟେ କେଦାରନାଥ ଯାତ୍ରାରୁ ଫେରୁଥିବା ବେଳେ ପାହାଡ଼ ଧସିବା ଯୋଗୁ ଫସି ରହିଥିବା ୨୨ ଯାତ୍ରୀଙ୍କୁ SDRF ଟିମ୍ ଉଦ୍ଧାର କରିଛନ୍ତି । ସମସ୍ତେ ସୁରକ୍ଷିତ ଅଛନ୍ତି ।
