ଆଜି ପୁଣି ଆମେରିକାର ମିଶନ ମୁନ୍, ମହାକାଶଚାରୀଙ୍କ ପୂର୍ବରୁ ଲଞ୍ଚ୍ କରିବ ରକେଟ୍
1 min read
ୱାଶିଂଟନ: ଦୁଇ ଦୁଇ ଥର ଉଦ୍ୟମ ବିଫଳ ପରେ ଆଜି ପୁଣି ହେବ ଆମେରିକାର ମିଶନ ମୁନ୍ । ଚନ୍ଦ୍ରକୁ ମହାକାଶଚାରୀ ପଠାଇବାକୁ ନାସାର ବଡ଼ ପ୍ରୟାସ । ମହାକାଶଚାରୀଙ୍କ ଯାତ୍ରା ପୂର୍ବରୁ ଆଜି ଲଞ୍ଚ୍ ହେବ ରକେଟ । ମୁନ୍ ମିଶନ ସିରିଜରେ ଏହା ନାସାର ପ୍ରଥମ ଟେଷ୍ଟ ରନ୍ । ଚନ୍ଦ୍ରକୁ ନାସା ପଠାଇବ ରକେଟ ଆର୍ଟେମିସ-1 । ଦୀର୍ଘବର୍ଷ ଧରି ଆର୍ଟେମିସ ଓ୍ବାନ ମିଶନକୁ ସଫଳ କରିବା ପାଇଁ ନାସାର ପ୍ରୟାସ ଆଜି ପୂରଣ ହେବାକୁ ଯାଉଛି । କେନେଡିସ୍ ଲଞ୍ଚପ୍ୟାଡରୁ ଏହି ସ୍ପେସ ଲଞ୍ଚ ସିଷ୍ଟମ ଉତକ୍ଷେପଣ କରାଯିବ । ବିଶ୍ବର ସବୁଠୁ ଶକ୍ତିଶାଳୀ ଏହି ରକେଟରେ କେହି ମନୁଷ୍ୟ ଯିବେ ନାହିଁ ।
ଦୁଇ ଘଣ୍ଟା ଲଞ୍ଚ ୱିଣ୍ଡୋ ସମୟରେ ଲଞ୍ଚପ୍ୟାଡରୁ ଏହି ଆର୍ଟେମିସ-1 ସ୍ପେସ୍ ଲଞ୍ଚ ସିଷ୍ଟମ୍ ଉତକ୍ଷେପଣ ହେବ । ଦୁନିଆର ସବୁଠାରୁ ଶକ୍ତିଶାଳୀ ରକେଟ୍ ଚନ୍ଦ୍ର ପୃଷ୍ଠରେ ୪୨ ଦିନିଆ ଯାତ୍ରା କରି ଫେରିଆସିବ । ୪୨ଦିନର ଯାତ୍ରାରେ ଏହି ସ୍ପେସ ଲଞ୍ଚ ସିଷ୍ଟମ ୧୬ଲକ୍ଷରୁ ଊର୍ଦ୍ଧ୍ବ କିଲୋମିଟର କକ୍ଷପଥରେ ଭ୍ରମଣ କରିବ । ନାସାର ଏହି ମହାକାଶଯାନ ଚନ୍ଦ୍ର ପାର୍ଶ୍ୱରୁ ପ୍ରାୟ ୪୦ ହଜାର ମାଇଲ ଦୂରରେ ଯାତ୍ରା କରିବ ।
ଅକ୍ଟୋବରରେ ପ୍ରଶାନ୍ତ ମହାସାଗରରେ ଏହି ସ୍ପେସ ଲଞ୍ଚ ସିଷ୍ଟମ ଖସିଯିବ ବୋଲି ଆଶା କରାଯାଉଛି । ଏହି ମିଶନ ସଫଳ ହେଲେ ମହାକାଶଚାରୀଙ୍କୁ ପଠାଯିବ । ଆପୋଲୋ ମିସନର 50 ବର୍ଷ ପରେ ଚନ୍ଦ୍ରକୁ ମନୁଷ୍ୟ ପଠାଇବା ପାଇଁ ପ୍ରୟାସ କରୁଛି ଆମେରିକା । ଏହି ସ୍ପେଶକ୍ରାଫ୍ଟ ୩୨୨ ଫୁଟ୍ ଲମ୍ବା ଏବଂ ୨ ହଜାର ୬୦୦ ଟନ୍ ଓଜନ । ଏହା କେବଳ ଆମେରିକା ପାଇଁ ନୁହେଁ, ସାରା ବିଶ୍ବ ପାଇଁ ଏକ ନୂଆ ଅନୁଭୂତି ଆଣିବ । ୧୯୭୨ ପରେ ପ୍ରଥମ ଥର ପାଇଁ ଚନ୍ଦ୍ର ପୃଷ୍ଠରେ ମନୁଷ୍ୟ ପାଦ ଥାପିବାକୁ ଉଦ୍ୟମ ହେଉଛି । ପୂର୍ବରୁ ଦୁଇ ଦୁଇ ଥର ଉଦ୍ୟମ ହୋଇଥିଲେ ବି ଯାନ୍ତ୍ରୀକ ତୃଟି ଯୋଗୁଁ ମିଶନ ଫେଲ ମାରିଥିଲା ।
