ଫାଇଜରର ବୁଷ୍ଟର ଡୋଜକୁ ଅନୁମତି ଦେଲା ଆମେରିକା FDA

ୱାଶିଂଟନ୍: ବିଶ୍ୱବ୍ୟାପୀ କରୋନା ବଢ଼ୁଥିବା ବିପଦକୁ ଦେଖି ଆମେରିକା ଫାଇଜର କୋଭିଡ୍ ବୁଷ୍ଟର ଡୋଜକୁ ଅନୁମତି ଦେଇଛି । ଆମେରିକାର ଏଫଡିଏ ଏହି ଅନୁମତି ପ୍ରଦାନ କରିଛି । ତେବେ ଏହି ବୁଷ୍ଟର ଡୋଜ୍ ବୟସ୍କ ଏବଂ ଗମ୍ଭୀର ରୋଗରେ ପୀଡ଼ିତ ଥିବା ବ୍ୟକ୍ତିଙ୍କୁ ଦିଆଯିବ ।

ସୂଚନାଯୋଗ୍ୟ, ୧୬ ବର୍ଷ ବୟସରୁ ଅଧିକ ବୟସ୍କଙ୍କୁ ବୁଷ୍ଟର ଡୋଜ୍ ଦେବାକୁ ଫାଇଜର ଅନୁମତି ମାଗିଥିଲା । ତେବେ ବିଶେଷଜ୍ଞ ପରାମର୍ଶଦାତା ଏହି ଆବେଦନକୁ ଖାରଜ କରି ଦେଇଛନ୍ତି । ବୁଷ୍ଟର ଡୋଜ୍ କେବଳ ୬୫ ବର୍ଷରୁ ଅଧିକ ବୟସ୍କ ଓ ଗମ୍ଭୀର ରୋଗରେ ପୀଡ଼ିତ ଲୋକଙ୍କୁ ଦେବାକୁ ଅନୁମତି ଦିଆଯାଇଛି । ଯୁବବର୍ଗ ପାଇଁ ବୁଷ୍ଟର ଡୋଜ୍ ବିପଦ ହୋଇପାରେ ବୋଲି କହିଛି ବିଶେଷଜ୍ଞ କମିଟି ।

ଦ୍ୱିତୀୟ ଟିକା ନେବାର ୬ ମାସ ପରେ ଏହି ବୁଷ୍ଟର ଡୋଜ୍ ଦିଆଯିବ । ତେବେ ଆମେରିକାରେ ମଡର୍ଣ୍ଣା ଓ ଜନସନ ଆଣ୍ଡ ଜନସନ ଟିକା ନେଇଥିବା ବ୍ୟକ୍ତିଙ୍କୁ ବୁଷ୍ଟର ଡୋଜ୍ ଦିଆଯିବା ନେଇ କୌଣସି ନିଷ୍ପତ୍ତି ନିଆଯାଇ ନାହିଁ ।