୧୫ ହଜାର ଫୁଟ୍ ଉପରେ ବିମାନ ଇଞ୍ଜିନରେ ଲାଗିଲା ନିଆଁ

ୱାଶିଂଟନ୍: ଆମେରିକାର ଡେନଭରରୁ ହୱାଇ ଯାଉଥିବା ଏକ ବିମାନର ଇଞ୍ଜିନରେ ନିଆଁ ଲାଗି ଯାଇଛି । ଅଗ୍ନିକାଣ୍ଡ ପରେ ବିମାନରୁ ବଡ଼ ବଡ଼ ଖଣ୍ଡ ଖସି ତଳେ ପଡ଼ିଥିଲା । ଆଉ ବିମାନରେ ଯାତ୍ରା କରୁଥିବା ଯାତ୍ରୀ ବେଶ୍ ଗରମ ଅନୁଭବ କରିଥିଲେ । ୧୫ ହଜାର ଫୁଟ୍ ଉଚ୍ଚରେ ବିମାନ ଇଞ୍ଜିନରେ ନିଆଁ ଲାଗିବା ସତ୍ତ୍ୱେ ପାଇଲଟ୍ ୨୦ ମିନିଟ୍ ମଧ୍ୟରେ ବିମାନକୁ ସୁରକ୍ଷିକ ଅବତରଣ କରାଇଛନ୍ତି । ବିମାନରେ ଥିବା ସମସ୍ତ ଯାତ୍ରୀ ଓ କ୍ରିଉ ମେମ୍ବର ସୁରକ୍ଷିତ ଥିବା କୁହାଯାଉଛି ।

ସୂଚନା ଅନୁସାରେ, ଆମେରିକାର ୟୁନାଇଟେଡ୍ ଏୟାର ଲାଇନ୍ସ ବିମାନ ଡେନଭରରୁ ହୱାଇ ଯାଉଥିଲା । ୨୩୧ ଯାତ୍ରୀଙ୍କୁ ନେଇ ୟୁନାଇଟେଡ୍ ଏୟାର ଲାଇନ୍ସ ବୋଇଂ ୭୭ ଡେନଭରରୁ ହୱାଇ ଉଡ଼ାଣ କରିଥିଲା । ବିମାନଟି ପ୍ରାୟ ୧୫ ହଜାର ଫୁଟ୍ ଉଚ୍ଚରେ ଉଡ଼ୁଥିବା ବେଳେ ଇଞ୍ଜିନରେ ନିଆଁ ଲାଗି ଯାଇଥିଲା ।

ବିମାନ ଉଡ଼ାଣର କିଛି ସମୟରେ ଇଞ୍ଜିନରେ ନିଆଁ ଲାଗିବାକୁ ନେଇ ଯାତ୍ରୀ ଭୟଭୀତ ହୋଇ ପଡ଼ିଥିଲେ । ସ୍ଥାନୀୟ ସମୟ ଅନୁସାରେ ଶନିବାର ଦ୍ୱିପ୍ରହରରେ ଏହି ଘଟଣା ଘଟିଛି । ସୂଚନା ଅନୁସାରେ ବିମାନଟି ଡେନଭର ବିମାନବନ୍ଦରରେ ସୁରକ୍ଷିତ ଲ୍ୟାଣ୍ଡିଂ କରିଛି । ଆକାଶ ମାର୍ଗରୁ ବିମାନର ଖଣ୍ଡ ପଡ଼ି ବିଭିନ୍ନ ଘର ଓ ଗାଡ଼ି କ୍ଷତିଗ୍ରସ୍ତ ହୋଇଥିବା ବେଳେ କେହି ମୃତାହତ ହୋଇନାହାଁନ୍ତି ।