ମାନସିକ ଅନଗ୍ରସର ଥଇଥାନ କେନ୍ଦ୍ର ‘ସମର୍ଥ’ରେ ନିର୍ଯାତନା ମାମଲାରେ ଆଉ ଦୁଇ ଜଣ ଗିରଫ
ସମ୍ବଲପୁର: ମାନସିକ ଅନଗ୍ରସର ଥଇଥାନ କେନ୍ଦ୍ର ସମର୍ଥରେ ନିର୍ଯାତନା ମାମଲାରେ ଆଉ ଦୁଇ ଜଣକୁ ବାନ୍ଧିଲା ସମ୍ବଲପୁର ପୋଲିସ । ନିଜ ଆଡୁ ମାମଲାର ରୁଜୁ କରି ଘଟଣାର ତଦନ୍ତ କରିଛି ପୋଲିସ୍ । ଅନ୍ତେବାସୀଙ୍କୁ ଶାରୀରିକ, ମାନସିକ ନିର୍ଯାତନା ସହ ଆସିଛି ଦୁଷ୍କର୍ମ ପରି ସାଂଘାତିକ ଅଭିଯୋଗ । ମାମଲାରେ ମୋଟ ୪ ଜଣଙ୍କୁ ଗିରଫ କରିଯାଇଥିବାବେଳେ ଖୁବଶୀଘ୍ର ଅଭିଯୁକ୍ତମାନଙ୍କୁ ରିମାଣ୍ଡରେ ନେଇ ଖୋଳତାଡ଼ କରାଯିବ ବୋଲି ସୂଚନା ଦେଇଛନ୍ତି ଉତ୍ତରାଞ୍ଚଳ ଆଇଜି ।
ଖୋଲୁଛି ସମର୍ଥ ପଛର କଳା କାହାଣୀ । ମାନସିକ ଅନଗ୍ରସଙ୍କୁ ମିଳୁଥିଲା ଅକଥନୀୟ ନିର୍ଯାତନା । ଶାରୀରିକ ମାନସିକ ନିର୍ଯାତନା ସହ ଦୁଷ୍କର୍ମ ଅଭିଯୋଗ । ଏବେ ଦୁଇ ଜଣ ଗିରଫ ହୋଇଥିବା ବେଳେ ପୂର୍ବରୁ ସଂସ୍ଥାର ସମ୍ପାଦକ ହରିଶ ଚନ୍ଦ୍ର ଦାସ ଏବଂ ସହାୟିକା ଗିରଫ ହୋଇଥିଲେ । ଘଟଣାକୁ ଗୁରୁତର ସହ ନେଇ ନିଜ ଆଡ଼ୁ ମାମଲା ରୁଜୁ କରିବା ସହ ବର୍ତ୍ତମାନ ସୁଦ୍ଧା ୪ ଜଣଙ୍କୁ ଗିରଫ କଲାଣି ପୋଲିସ୍ । ଘଟଣାର ତଦନ୍ତ ଦାୟିତ୍ବ ନେଇଛନ୍ତି ଉପଜିଲ୍ଲାପାଳ ପୁଷ୍ପାଞ୍ଜଳି ପଣ୍ଡା । ଘଟଣାରେ ଦୁଷ୍କର୍ମ ନେଇ ଗୁରୁତର ଅଭିଯୋଗ ହୋଇଥିବାବେଳେ ମେଡିକାଲ ରିପୋର୍ଟ ଆସିଲେ ସତ୍ଯତା ଜଣାପଡିବ ବୋଲି ସେ କହିଛନ୍ତି ।
ନିର୍ଯାତନାର ସବୁ ସୀମା ଡେଇଁ ପଶୁ ପାଲଟି ଯାଇଥିଲେ ଥଇଥାନ କେନ୍ଦ୍ରର ମାଲିକ । ନାତ, ଗୋଇଠା, ବାଡ଼ିରେ ନିସ୍ତୁକ ପିଟିବା ସହ ମହିଳା ଏବଂ ପୁରୁଷ ଅନ୍ତେବାସୀଙ୍କୁ ଗୋଟିଏ ସ୍ଥାନରେ ଗାଧୋଇ ଦେବାର ଭିଜୁଆଲ ମଧ୍ୟ ମୋବାଇଲରେ କଏଦ ହୋଇଥିଲା । ଧନୁପାଲି ଥାନା ନେତାଜୀ ନଗରଠାରେ ଥିବା ଏହି କେନ୍ଦ୍ରର ଭିଡିଓ ପଦାକୁ ଆସିବା ପରେ ଅଞ୍ଚଳରେ ଆଲୋଡନ ସୃଷ୍ଟି ହୋଇଥିଲା । ଏପରିକି ଏହି ନିର୍ଯାତନା ଯୋଗୁଁ ୫ ଜଣଙ୍କ ମୃତ୍ଯୁ ହୋଇଥିବା ମଧ୍ଯ ଅଭିଯୋଗ ହୋଇଛି । ତେଣୁ ଘଟଣାକୁ ଗୁରୁତର ସହ ନେଇଛି ପୋଲିସ୍ । ଶୀଘ୍ର ଅଭିଯୁକ୍ତଙ୍କୁ ରିମାଣ୍ଡରେ ଆଣି ପଚରାଉଚରା କରାଯିବ ବୋଲି କହିଛନ୍ତି ଉତ୍ତରାଞ୍ଚଳ ଆଇଜି ହିମାଂଶୁ ଲାଲ୍ ।
ସିସିଟିଭି ଫୁଟେଜ ଆଧାରରେ ଗିରଫ ହୋଇଥିବା ଦୁଇ ବ୍ଯକ୍ତି ସଂସ୍ଥାକୁ ଆସି ଅନ୍ତେବାସୀଙ୍କୁ ମାଡ଼ ମାରିଥିଲେ । ଘଟଣାକୁ ନେଇ ଅଞ୍ଚଳରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିବାବେଳେ ଅଭିଯୁକ୍ତଙ୍କ ବିରୋଧରେ ଦୃଢ କାର୍ଯ୍ଯାନୁଷ୍ଠାନ ପାଇଁ ବିଭିନ୍ନ ମହଲରୁ ଦାବି ହୋଇଛି ।
