ବାଇଡେନଙ୍କୁ ଟ୍ରମ୍ପଙ୍କ ଟାର୍ଗେଟ, କହିଲେ ୨୦୨୪ରେ ଭୁସୁଡ଼ିଯିବ ଆମେରିକା

ନ୍ୟୁୟର୍କ: ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରାଷ୍ଟ୍ରପତି ଜୋ ବାଇଡେନଙ୍କୁ ଟାର୍ଗେଟ୍ କରିଛନ୍ତି । ଆଗାମୀ ନିର୍ବାଚନ ପୂର୍ବରୁ ଦେଶର ଅସ୍ତିତ୍ୱ ରହିବନି ବୋଲି ସେ କହିଛନ୍ତି । ଟ୍ରମ୍ପ କହିଛନ୍ତି ଯେ, ଗତ ୮ ମାସରେ ଦେଶ ରସାତଳଗାମୀ ହୋଇଛି । ଆମେରିକାର ଏପରି ସ୍ଥିତି କେହି କଳ୍ପନା ମଧ୍ୟ କରିନଥିଲେ । ଆଉ ୩ ବର୍ଷ ପରେ ଦେଶର ଅବସ୍ଥା ଶୋଚନୀୟ ହୋଇ ପଡିବ । ୨୦୨୨ ଓ ୨୦୨୪ରେ ନିର୍ବାଚନ ଅନୁଷ୍ଠିତ ହେବ । ସେହି ସମୟରେ ଦେଶର ଆଉ ପୂର୍ବଭଳି ନଥିବ । ଏହାସହ ୨୦୨୦ ନିର୍ବାଚନରେ ତାଙ୍କ ବିରୋଧରେ ଷଡଯନ୍ତ୍ର କରାଯାଇଥିଲା ବୋଲି ସେ କହିଛନ୍ତି ।

ପୁଣି ଥରେ ରାଷ୍ଟ୍ରପତି ନିର୍ବାଚନ ଲଢିବା ପ୍ରସଙ୍ଗରେ ଟ୍ରମ୍ପ କହିଛନ୍ତି ଯେ, ସେ ଏବେ ଏନେଇ କିଛି କହିପାରିବେ ନାହିଁ । ଯଦି ସେ ନିର୍ବାଚନ ଲଢନ୍ତି ତେବେ ବହୁତ ଖୁସିର କଥା ହେବ । ଆମେରିକାକୁ ଭଲ ପାଉଥିବା ସମସ୍ତେ ଏପରି ହେଲେ ଖୁସି ହେବେ ବୋଲି ସେ କହିଛନ୍ତି । ଏନେଇ ସେ ଅତିଶୀଘ୍ର ନିଷ୍ପତ୍ତି ନେବେ । ସେ ରାଷ୍ଟ୍ରପତି ହେଲେ ପୁଣିଥରେ ଦେଶକୁ ବିକାଶ ଦିଗରେ ନେବେ ।

ଆଫଗାନିସ୍ତାନରୁ ଆମେରିକା ସୈନ୍ୟ ଫେରସ୍ତକୁ ନେଇ ଟ୍ରମ୍ପ ବାଇଡେନଙ୍କୁ ତୀବ୍ର ସମାଲୋଚନା କରିଛନ୍ତି । ଏହାସହ ସେ ଆଫଗାନଙ୍କ ମାନବାଧିକାର ନେଇ ଚିନ୍ତା ବ୍ୟକ୍ତ କରିଛନ୍ତି। ସାରା ବିଶ୍ୱ ଆମେରିକା ଉପରେ ହସୁଥିବା ସେ କହିଛନ୍ତି ।  ଏତତ୍ ବ୍ୟତୀତ ବାଇଡେନଙ୍କ ବୁଦ୍ଧି ନାହିଁ ଓ ସେ ବୋକା ବୋଲି ଟ୍ରମ୍ପ କହିଛନ୍ତି ।