ନନ୍ଦିଘୋଷ ବ୍ୟୁରୋ : ବଳଙ୍ଗା ପୀଡ଼ିତାଙ୍କ ବୟାନ ରେକର୍ଡ କରିପାରେ ପୋଲିସ । ଏଥିପାଇଁ ଦିଲ୍ଲୀ ଏମ୍ସର ଅନୁମତି ମଗାଯାଇଥିବା ଜଣାପଡ଼ିଛି। ପୀଡ଼ିତା ଜଣକ ଏବେ ଦିଲ୍ଲୀ ଏମ୍ସରେ ଚିକିତ୍ସାଧୀନ ଅଛନ୍ତି। ସେପଟେ ଏହି ଘଟଣାର ଛାନବିନ୍ କରୁଛି କ୍ରାଇମବ୍ରାଞ୍ଚର ୫ ଜଣିଆ ଟିମ୍। ସ୍ପେସାଲ ସ୍କ୍ଵାର୍ଡର ୩ଟି ଟିମ୍ ଓ ଗୁଇନ୍ଦା ବିଭାଗର ସ୍ଵତନ୍ତ୍ର ଟିମ୍ ମଧ୍ୟ ତଦନ୍ତରେ ସାମିଲ ଅଛନ୍ତି। ୨୦ରୁ ଅଧିକ ସନ୍ଦିଗ୍ଧ ବ୍ଯକ୍ତିଙ୍କ ମୋବାଇଲ ଟ୍ରାକ କରୁଛି ସାଇବର ପୋଲିସ । ସେହିପରି କେତେକ ପାର୍ସଲ ସଂସ୍ଥାର କର୍ମଚାରୀଙ୍କୁ ମଧ୍ୟ ପଚରା ଉଚରା କରୁଛି ପୋଲିସ । ଘଟଣାକୁ ୩ ଦିନ ହୋଇ ଯାଇଥିଲେ ମଧ୍ୟ କିଏ ନିଆଁ ଲଗାଇଥିଲା, ତାହା ଏବେ ବି ଜଣାପଡ଼ିନି କି କେହି ଏଯାଏ ଧରା ପଡ଼ି ନାହାନ୍ତି। ଜବତ ହୋଇଥିବା ଚପଲ କି ଅଳଙ୍କାର ଝିଅର ନୁହେଁ ବୋଲି ପୀଡ଼ିତାଙ୍କ ପରିବାର କହିବା ପରେ ଘଟଣା ଆହୁରି ରହସ୍ଯ ଘେରକୁ ଚାଲି ଯାଇଛି। କିରାସିନକୁ ନେଇ ମଧ୍ୟ ତଦନ୍ତ ଚାଲିଛି।
