ଉତ୍ତର-ପୂର୍ବ ଓଡ଼ିଶାରେ ବିଦ୍ୟୁତ୍ ବିତରଣ ଦାୟିତ୍ୱ ନେଲା ଟାଟା ପାୱାର

ଭୁବନେଶ୍ୱର: ଦେଶର ବୃହତ୍ତ ଶକ୍ତି କମ୍ପାନୀ ଟାଟା ପାୱାର ନେସ୍କୋ ଠାରୁ ପରିଚାଳନା ଭାର ଗ୍ରହଣ କରିଛି । ଏଣିକି ନେସ୍କୋ ଟିପି ନର୍ଥନ ଓଡ଼ିଶା ଡିଷ୍ଟ୍ରିବୁସନ୍ ଲିମିଟେଡ୍ (TPNODL) ଅଧୀନରେ ପରିଚାଳିତ ହେବ । ଓଡ଼ିଶା ବିଦ୍ୟୁତ୍ ନିୟାମକ ଆୟୋଗ (OERC) ପକ୍ଷରୁ ଜାରି ନିର୍ଦ୍ଦେଶନାମା ଅନୁସାରେ ଟାଟା ପାୱାର ୫୧ ପ୍ରତିଶତ ଅଂଶଧନ ସହ ପରିଚାଳନା ନିୟନ୍ତ୍ରଣ କରିବ । ସେହିଭଳି ରାଜ୍ୟ ସରକାରଙ୍କ ସଂସ୍ଥା ଗ୍ରୀଡକୋ ପାଖରେ ୪୯ ପ୍ରତିଶତ ମାଲିକାନା ରହିବ ।

ନେସ୍କୋର ୫ଟି ସର୍କଲରେ TPNODL ୨ ମିଲିୟନରୁ ଅଧିକ ଗ୍ରାହକଙ୍କୁ ବାର୍ଷିକ ୫୪୫୦ ଏମୟୁଏସ୍ ବିଦ୍ୟୁତ୍ ବିତରଣ କରିବ । ବାଲେଶ୍ୱର, ଭଦ୍ରକ, ବାରିପଦା, ଯାଜପୁର ଓ କେନ୍ଦୁଝରରେ ସେବା ଯୋଗାଇବ । ୨୭ ହଜାର ସ୍କୋୟାର୍ କିଲୋମିଟର ଭୌଗଳିକ ଅଞ୍ଚଳରେ ବିଦ୍ୟୁତ୍ ବିତରଣ କରିବ ଟାଟା ପାୱାର । ୨୫ ବର୍ଷ ଲାଗି ଟାଟା ପାୱାରକୁ ବିତରଣ ଦାୟିତ୍ୱ ଦିଆଯାଇଛି ।

ଏବେ ଟାଟା ପାୱାର ସାରା ରାଜ୍ୟରେ ବିଦ୍ୟୁତ୍ ବିତରଣ କରୁଛି । ଟାଟା ପାୱାର ପାଖରେ ୯ ମିଲିୟନ୍ ଗ୍ରାହକ ଅଛନ୍ତି । ଏବେ ଟାଟା ପାୱାର ପାଖରେ ମୁମ୍ବାଇ, ନୂଆଦିଲ୍ଲୀ, ଓଡ଼ିଶା ଓ ଆଜମେରରେ ୧୧.୫ ମିଲିୟନ୍ ଗ୍ରାହକ ଅଛନ୍ତି । ଦେଶର ବୃହତ୍ତ ବିଦ୍ୟୁତ୍ ବିତରଣ କମ୍ପାନୀ ହେଉଛି ଟାଟା ପାୱାର ।