ୟୁପିରେ ବିଜେପିକୁ ଝଟକା, କ୍ୟାବିନେଟ ମନ୍ତ୍ରୀରୁ ଇସ୍ତଫା ଦେଲେ ସ୍ୱାମୀ ପ୍ରସାଦ ମୌର୍ଯ୍ୟ

ଲକ୍ଷ୍ନୌ: ଦେଶରେ ୫ ରାଜ୍ୟରେ ହେବାକୁ ଥିବା ବିଧାନସଭା ନିର୍ବାଚନ ପାଇଁ ତାରିଖ ଘୋଷଣା ହୋଇସାରିଛି । ତାରିଖ ଘୋଷଣା ହେବା ପରେ ଏହି ୫ ରାଜ୍ୟର ରାଜନୀତି ସରଗରମ ହୋଇଛି । ଏପରିସ୍ଥିତିରେ ଉତ୍ତରପ୍ରଦେଶ ରାଜନୀତିରେ ମଙ୍ଗଳବାର ଏକ ବଡ଼ ହଲଚଲ ଦେଖିବାକୁ ମିଳିଛି । ୟୁପି ନିର୍ବାଚନ ପୂର୍ବରୁ ବିଜେପିକୁ ଲାଗିଛି ବଡ଼ ଝଟକା । ଉତ୍ତରପ୍ରଦେଶ କ୍ୟାବିନେଟ ମନ୍ତ୍ରୀ ସ୍ୱାମୀ ପ୍ରସାଦ ମୌର୍ଯ୍ୟ ମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି । ସ୍ୱାମୀ ପ୍ରସାଦ ମୌର୍ଯ୍ୟ ତାଙ୍କ ଇସ୍ତଫା ପତ୍ର ରାଜ୍ୟପାଳ ଆନନ୍ଦବିନ୍ ପଟେଲଙ୍କୁ ପଠାଇଛନ୍ତି । ସୂଚନା ଅନୁସାରେ ସ୍ୱାମୀ ପ୍ରସାଦ ବିଜେପିରୁ ଇସ୍ତପା ପରେ ଖୁବ ଶୀଘ୍ର ସମାଜବାଦୀ ପାର୍ଟିରେ ଯୋଗ ଦେବେ ।

दलितों, पिछड़ों, किसानों, बेरोजगार नौजवानों एवं छोटे-लघु एवं मध्यम श्रेणी के व्यापारियों की घोर उपेक्षात्मक रवैये के कारण उत्तर प्रदेश के योगी मंत्रिमंडल से इस्तीफा देता हूं। pic.twitter.com/ubw4oKMK7t

— Swami Prasad Maurya (@SwamiPMaurya) January 11, 2022

ରାଜ୍ୟପାଳ ଆନନ୍ଦବିନ୍ ପଟେଲଙ୍କୁ ପଠାଇଥିବା ଇସ୍ତଫା ପତ୍ରରେ ସ୍ୱାମୀ ପ୍ରସାଦ ମୌର୍ଯ୍ୟ ଲେଖିଛନ୍ତି କି ’ଶ୍ରମ, ନିଯୁକ୍ତ ମନ୍ତ୍ରୀ ଏବଂ ସମନ୍ୱୟ ମନ୍ତ୍ରୀ ଭାବରେ ସମସ୍ତ ବିପରୀତ ପରିସ୍ଥିତିରେ ମୁଁ ଆଦର୍ଶ ବିଚାରଧାରାରେ ରହିବା ସତ୍ତ୍ୱେ ମୁଁ ଅତ୍ୟଧିକ ଉତ୍ସର୍ଗୀକୃତ ଭାବରେ ଦାୟିତ୍ୱ ତୁଲାଇଥିଲି । କିନ୍ତୁ ଦଳିତ, ପଛୁଆ, କୃଷକ, ବେକାର ସମସ୍ୟା ଏବଂ କ୍ଷୁଦ୍ର-ମଧ୍ୟମ ବର୍ଗଙ୍କୁ ଅବହେଳା ହେତୁ ମୁଁ ଉତ୍ତରପ୍ରଦେଶ କ୍ୟାବିନେଟରୁ ଇସ୍ତଫା ଦେଇଛି ।

ବିଗତ କିଛି ଦିନ ହେବ ଚର୍ଚ୍ଚା ଜାରି ରହିଥିଲା କି ସ୍ୱାମୀ ପ୍ରସାଦ ମୌର୍ଯ୍ୟ ବିଜେପି ଛାଡି ଅଖିଳେଶ ଯାଦବଙ୍କ ସମାଜବାଦୀ ପାର୍ଟିରେ ଯୋଗ ଦେଇପାରନ୍ତି । ସୂଚନା ଅନୁସାରେ ସ୍ୱାମୀ ପ୍ରସାଦ ମୌର୍ଯ୍ୟ ସପାରେ ଯୋଗ ଦେବା ମାମଲା ସିଧାସଳଖ ଭାବରେ ଅଖିଳେଶ ଯାଦବ ବୁଝୁଛନ୍ତି । ତେବେ ସ୍ୱାମୀ ପ୍ରସାଦ ମୌର୍ଯ୍ୟ ବିଜେପିରୁ ଇସ୍ତଫା ଦେବା ପରେ ଏହା ବିଜେପିକୁ ବଡ଼ ଝଟକା ଲାଗିଛି । ଗତ ନିର୍ବାଚନରେ ବିଜେପି ସରକାରକୁ ଆସିବାର ମୁଖ୍ୟ କାରଣ ପଛୁଆ ବର୍ଗ । ସେଥିପାଇଁ ଚଳିତ ନିର୍ବାଚନରେ ଅଖିଳେଶ ଯାଦବ ପଛୁଆ ବର୍ଗଙ୍କୁ ତାଙ୍କ ସପକ୍ଷରେ ନେବା ପାଇଁ ଚେଷ୍ଟା କରୁଛନ୍ତି ।