Sushant Singh Rajput case: ପିତା କେକେ ସିଂ ପାଟନାରେ ରିୟାଙ୍କ ବିରୋଧରେ ଦେଲେ FIR,ମୁମ୍ବାଇରେ ହୋଇପରେ ଗିରଫଦାରି !
ପାଟନା : ଅଭିନେତା ସୁଶାନ୍ତ ସିଂ ରାଜପୁତ ମୃତ୍ୟୁ ମାମଲାରେ ବଡ ଧରଣର ଟ୍ୱିଷ୍ଟ ଆସିଛି । ସୁଶାନ୍ତଙ୍କ ମୃତ୍ୟୁ ପରଠାରୁ ଚୁପ ଥିବା ପରିବାର ଏବେ ଥାନାରେ ଏତଲା ରୁଜ କରିଛି । ସୁଶାନ୍ତଙ୍କ ପିତା କେ କେ ସିଂ ମଙ୍ଗଳବାର ଦିନ ପାଟନାର ରାଜିବ ନଗର ଥାନାରେ ଏତଲା ରୁଜ କରିଛନ୍ତି । କେ କେ ସିଂହଙ୍କ ଏତଲା ପରେ ପାଟନା ପୋଲିସର ୪ ଜଣିଆ ଟିମ୍ ଯାଂଚ ପାଇଁ ମୁମ୍ବାଇ ପହଂଚିଥିବା ସୂଚନା ମିଳିଛି । ସୁଶାନ୍ତଙ୍କ ପିତା କେ କେ ସିଂହଙ୍କ ବୟାନ ଆଧାରରେ ମାମଲା ରୁଜ ହୋଇଥିବା ଜଣା ପଡିଛି । କୁହାଯାଉଛି ଯେ, ମୁମ୍ବାଇରେ କିଛି ଗିରଫଦାରୀ ହେବାର ସମ୍ଭାବନା ରହିଛି । ସୂଚନାଯୋଗ୍ୟ ଯେ, ଏହି ପୁରା ପ୍ରସଙ୍ଗରେ ପରିବାର ନିରବ ଥିଲା । କିନ୍ତୁ ଏବେ ପରିବାର ପକ୍ଷରୁ ଥାନାରେ ଏଫଆଇଆର ଦିଆଯିବା ପରେ ମାମଲାରେ ନୂଆ ମୋଡ ଆସିଛି ।
ଏଫାଆଇଆରରେ ସୁଶାନ୍ତଙ୍କ ପିତା ଅଭିନେତ୍ରୀ ତଥା ସୁଶାନ୍ତଙ୍କ ଗର୍ଲଫ୍ରେଣ୍ଡ୍ ରିୟାଙ୍କ ନାମ ନେଇଥିବା କୁହାଯାଉଛି । । ଜୁନ୍ ୧୪ ତାରିଖ ଦିନ ସୁଶାନ୍ତ ମୁମ୍ବାଇରେ ମୃତ୍ୟୁ ବରଣ କରିଥିଲେ । ସୁଶାନ୍ତଙ୍କ ମୃତ୍ୟୁ ପରଠାରୁ ତାଙ୍କ ପରିବାର ଗଭୀର ଆଘାତ ଭିତରେ ଥିଲେ । କୁହାଯାଉଛି ଯେ, ସେ ତଥାକଥିତ ଭାବେ ଡିପ୍ରେସନର ଶିକାର ଥିଲେ । ସୁଶାନ୍ତ ନିଜ ପ୍ରଫେସନାଲ ଲାଇଫ୍ ସହ ପର୍ସନାଲ ଲାଇଫକୁ ନେଇ ମଧ୍ୟ ଚର୍ଚ୍ଚାରେ ଥିଲେ ।
ସୂଚନାଯୋଗ୍ୟ ଯେ, ବିହାରରେ ସୁଶାନ୍ତ ମୃତ୍ୟୁ ମାମଲାରେ ସିବିଆଇ ତଦନ୍ତ ଦାବି ହେଉଛି । ପୂର୍ବତନ ସାଂସଦ ପପୁ ଯାଦବ,ଫିଲ୍ମ ଅଭିନେତା ଶେଖର ସୁମନ,ତେଜସ୍ୱୀ ଯାଦବଙ୍କ ସହିତ ବିହାରର ଅନେକ ନାମିଦାମି ବ୍ୟକ୍ତି ସୁଶାନ୍ତ ମୃତ୍ୟୁ ମାମଲାରେ ସିବିଆଇ ତଦନ୍ତ ପାଇଁ ଦାବି କରି ଆସୁଛନ୍ତି । ପପୁ ଯାଦବ ଏନେଇ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କୁ ପତ୍ର ଲେଖଥିଲେ । ଅମିତ ଶାହା ପତ୍ରର ଯବାବରେ ଅଭିଯୋଗକୁ କାର୍ମିକ ବିଭାଗ ନିକଟକୁ ପଠାଇ ଦିଆଯାଇଛି ବୋଲି କହିଥିଲେ । ସେହିଭଳି ବିଜେପି ନେତା ରାମେଶ୍ୱର ଯାଦବ ମଧ୍ୟ ମାମଲାରେ ସିବିଆଇ ତଦନ୍ତ ଦାବି କରିଛନ୍ତି । ମୁଖ୍ୟମନ୍ତ୍ରୀ ନୀତିଶ କୁମାରଙ୍କୁ ଏବାବଦରେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ସହ କଥା ହୁଅନ୍ତୁ ବୋଲି ସେ ଦାବି କରିଛନ୍ତି । ତାଙ୍କ ଅନୁସାରେ ଶତ୍ରୁଘ୍ନ ସିହ୍ନାଙ୍କ ପରେ ସେ ଏକ ମାତ୍ର ବିହାରୀ ଥିଲେ ଯିଏ ସୁପରଷ୍ଟାର ହେବା ରାସ୍ତାରେ ଥିଲେ । ତେଣୁ ସୁଶାନ୍ତ ଆତ୍ମହତ୍ୟ କରିବେ ବୋଲି କେହି ଚିନ୍ତା ମଧ୍ୟ କରି ପାରୁନାହାନ୍ତି ବୋଲି କହିଛନ୍ତି ଚୌରାସିଆ ।
