ଏକ୍ସପ୍ରେସ ଓ୍ବେରେ ଓହ୍ଲାଇଲା ଫାଇଟର୍ ଜେଟ୍

ଲକ୍ଷ୍ନୌ: ପୂର୍ବାଞ୍ଚଳ ଏକ୍ସପ୍ରେସ ଓ୍ବେରେ ଅବତରଣ କଲା ଯୁଦ୍ଧ ବିମାନ । ଉତ୍ତର ପ୍ରଦେଶରେ ନିର୍ମିତ ପୂର୍ବାଞ୍ଚଳ ଏକ୍ସପ୍ରେସ ଓ୍ବରେ ଉଦଘାଟନ ପୂର୍ବରୁ ଆଜି ଭାରତୀୟ ବାୟୁସେନାର ଦୁଇଟି ଯୁଦ୍ଧ ବିମାନର ଟ୍ରାଏଲ ଅବତରଣର କରାଯାଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉଦଘାଟନ କରିବା ପୂର୍ବରୁ ଆଜି ଏୟାର ଷ୍ଟ୍ରିପରେ ଚାଲିଥିବା ପରୀକ୍ଷଣରେ ଭାରତୀୟ ବାୟୁସେନାର ଯୁଦ୍ଧ ବିମାନ ମିରାଜ ୨୦୦୦ ଏବଂ SU-30MKI ଯୁଦ୍ଧ ବିମାନ ଅବତରଣ କରିଛି ।

ନଭେମ୍ବର ୧୬ରେ ଏହି ଏକ୍ସପ୍ରେସର ଉଦଘାଟନ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏହି ସମୟରେ C-130J ସୁପର ହର୍କ୍ୟୁଲ୍ସ ପରିବହନ ବିମାନରେ ଏଠାରେ ଅବତରଣ କରିବାର କାର୍ଯ୍ୟକ୍ରମ ରହିଛି । C-130J ସୁପର ହର୍କ୍ୟୁଲ୍ସ ପରିବହନ ବିମାନ ସହିତ ଯେଉଁ ବିମାନରେ ପ୍ରଧାନମନ୍ତ୍ରୀ ଥିବେ ସେହି ବିମାନ ମଧ୍ୟ ଏହି ଏକ୍ସପ୍ରେସରେ ଅବତରଣ କରିବ । ଏହାସହ ମିରାଜ ୨୦୦୦ ଏବଂ SU-30MKI ମଧ୍ୟ ଅବତରଣ କରିବେ ।

୩୪୦ କିଲୋମିଟରର ଏହି ଏକ୍ସପ୍ରେସ ୱେ ଉତ୍ତରପ୍ରଦେଶ ରାଜଧାନୀକୁ ପୂର୍ବାଞ୍ଚଳ ଜିଲ୍ଲା ମାଉ, ଆଜମଗଡ, ବାରବାଙ୍କି ସମେତ ପ୍ରୟାଗରାଜ ଏବଂ ବାରାଣାସୀ ସହରକୁ ସଂଯୋଗ କରିବ ।

ଫାଇଟର ଜେଟର ଜରୁରୀ ଅବତରଣ ପାଇଁ ୩.୩ କିଲୋମିଟର ଷ୍ଟ୍ରେଚ ସୁଲତାନପୁର ଜିଲ୍ଲା ନିକଟରେ ଉନ୍ନତୀକରଣ କରାଯାଇଛି । ଉଦଘାଟନୀ ଉତ୍ସବ ଦିନ ମିରାଜ ୨୦୦୦ ଓ SU-30MKI କଳାକୌଶଳ ଦେଖାଇବା ସହ ଉଡ଼ାଣ ଓ ଅବତରଣ କରିବେ ।

ଦୁଇପଟେ ଦୁଇ ପଡୋଶୀ ପାକିସ୍ତାନ ଓ ଚୀନ ସବୁବେଳେ ଯୁଦ୍ଧଭଳି ସ୍ଥିତି ସୃଷ୍ଟି କରୁଛନ୍ତି । ଏମିତି ସ୍ଥିତିରେ ଦୋମୁହାଁ ଯୁଦ୍ଧ ପାଇଁ ଭାରତ ପ୍ରସ୍ତୁତି ଆରମ୍ଭ କରିଦେଇଛି । ଏକ୍ସପ୍ରେସ ଓ୍ବେର ବିକାଶ ଏହାର ଏକ ଅଂଶ ବିଶେଷ । ଗମନାଗମନ ସହ ଯୁଦ୍ଧ ଭଳି ସ୍ଥିତି ସୃଷ୍ଟି ହେଲେ ବାୟୁସେନା ଏହି ଏକ୍ସପ୍ରେସ ଓ୍ବେକୁ ବ୍ୟବହାର କରିପାରିବେ । ଏହି ଏକ୍ସପ୍ରେସ ଓ୍ବେ ରାଜ୍ୟ ଅର୍ଥନୀତିର ମେରୁଦଣ୍ଡ ହେବ ବୋଲି ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ କହିଛନ୍ତି ।