ପୁଣି ଆଜମଗଡରେ ଶ୍ରଦ୍ଧା ମର୍ଡର ପାର୍ଟ ୨, ହତ୍ୟା ପରେ ୬ ଖଣ୍ଡ କରି ଫିଙ୍ଗିଦେଲା

ଲକ୍ଷ୍ନୌ: ପିସ୍ ପିସ୍ କରି କାଟିଲା ଜହ୍ଲାଦ ପ୍ରେମିକ । ୟୁପି ଆଜମଗଡ଼ରେ ଶ୍ରଦ୍ଧା ମର୍ଡର ପାର୍ଟ ୨ । ଅନ୍ୟଜଣଙ୍କୁ ବିବାହ କରିଥିବାରୁ ପ୍ରେମିକର ପ୍ରତିଶୋଧ। ମନ୍ଦିର ବୁଲାଇଲା, ରେଷ୍ଟୁରାଣ୍ଟରେ ଖୁଆଇବା ପରେ ପ୍ରେମିକା ଆରାଧନାଙ୍କୁ ଗଳା ଚିପି ହତ୍ୟା କଲା ପ୍ରିନ୍ସ । ଶବ ଯେମିତି କେହି ନ ଚିହ୍ନିବେ, ସେଥିପାଇଁ ୬ଖଣ୍ଡ କରିଥିଲା ମୃତଦେହ। ମେହରୁଲି ପରେ ଉତ୍ତରପ୍ରଦେଶ ଆରାଧନା ପ୍ରଜାପତି ହତ୍ୟାକାଣ୍ଡ ସାରାଦେଶକୁ ଦୋହଲାଇ ଦେଇଛି। ପରିତ୍ୟକ୍ତ କୂଅରୁ ଆରାଧନା ପ୍ରଜାପତିଙ୍କ ଗଳିତ ଶରୀର ଅଂଶବିଶେଷ ମିଳିବା ପରେ ପୂର୍ବତନ ପ୍ରେମିକ ପ୍ରିନ୍ସ ଯାଦବକୁ ଗିରଫ କରିଛି ପୋଲିସ ।

ମହିଳା ବିରୋଧରେ ବଢୁଥିବା ଅପରାଧକୁ ନେଇ ଚିନ୍ତାବ୍ୟକ୍ତ କରିଛନ୍ତି ମହିଳା ଅଧିକାର କର୍ମୀ । ଦେଶରେ ମହିଳା ଅସୁରକ୍ଷିତ । ମହିଳାଙ୍କ ବିରୋଧରେ ହିଂସା ବଢୁଥିବା ବେଳେ ଦୋଷୀଙ୍କୁ ଉଚିତ୍ ଦଣ୍ଡ ମିଳିପାରୁନି । ତଦନ୍ତ ପ୍ରକ୍ରିୟାରେ ବିଳମ୍ବ ଓ ଆଇନର ଗଳା ବାଟ ଅପରାଧୀଙ୍କୁ ସୁହାଉଛି । କେନ୍ଦ୍ର ସରକାର ମହିଳା ବିରୋଧୀ ଅପରାଧ ପାଇଁ ଉପଯୁକ୍ତ ଆଇନ ଆଣିବା ସହ ଅପରାଧୀ ଯେପରି ଦଣ୍ଡ ପାଇବେ ସେ ଦିଗରେ ମନିଟରିଂ ହେବା ଆବଶ୍ୟକ ବୋଲି ମହିଳା ଅଧିକାର କର୍ମୀ କହିଛନ୍ତି।

ସେପଟେ ଦିଲ୍ଲୀ ଶ୍ରଦ୍ଧା ଓ୍ବାକର ହତ୍ୟା ମାମଲାରେ ଆଜି ଅଫତାବର ନାର୍କୋ ଟେଷ୍ଟ ହୋଇନି। ନାର୍କୋ ପୂର୍ବରୁ ସୈତାନ ପ୍ରେମିକର ବ୍ରେନ ମ୍ୟାପିଂ ଓ ପଲିଗ୍ରାଫ୍ ଟେଷ୍ଟ ପାଇଁ ଯୋଜନା କରୁଛି ପୋଲିସ। ସେପଟେ ଶ୍ରଦ୍ଧା ମର୍ଡର କେସ୍ ତଦନ୍ତ ଭାର ସିବିଆଇକୁ ଦେବାକୁ ଦିଲ୍ଲୀ ହାଇକୋର୍ଟରେ ଜନସ୍ବାର୍ଥ ମାମଲା ଦାଏର ହୋଇଛି। ତଦନ୍ତସ୍ଥଳରେ ଗଣମାଧ୍ୟମ ଓ ସ୍ଥାନୀୟ ଲୋକଙ୍କ ଉପସ୍ଥିତି ତଦନ୍ତରେ ବାଧା ସୃଷ୍ଟି କରୁଥିବା ପିଟିସନରେ ଉଲ୍ଲେଖ କରାଯାଇଛି । ଆସନ୍ତା ବୁଧବାର କୋର୍ଟ ପିଆଇଏଲର ଶୁଣାଣି କରିବେ ।

ଗାର୍ଲଫ୍ରେଣ୍ଡ ଶ୍ରଦ୍ଧା ପାଇଁ ଅଫତାବ ମନରେ ଥିଲା ଘୃଣା ଓ ଶତ୍ରୁ ଭଳି ହିନମନ୍ୟତା। ହତ୍ୟା ପରେ ଶ୍ରଦ୍ଧାଙ୍କ ଫଟୋଗ୍ରାଫ୍ ଜଳାଇଥିଲା ଅଫତାବ। ରାଗରେ ଶ୍ରଦ୍ଧାଙ୍କ ଆକାଉଣ୍ଟରୁ ନିଜ ଆକାଉଣ୍ଟକୁ ଟ୍ରାନ୍ସଫର କରିଥିଲା ଟଙ୍କା। ରିମାଣ୍ଡ ବେଳେ ଦୁହିଁଙ୍କ ତିକ୍ତ ସମ୍ପର୍କକୁ ନେଇ ଅନେକ ତଥ୍ୟ ଆଦାୟ କରିଛି ପୋଲିସ ।