ମୁଣ୍ଡ ନେଉଛି ରାଜପଥ: ଦୈବୀଶକ୍ତିକୁ ଶାନ୍ତ କରି ଦୁର୍ଘଟଣା ରୋକିବାକୁ ରାସ୍ତା ଉପରେ ଚଣ୍ଡୀପାଠ ଓ ପୂଜାର୍ଚ୍ଚନା

ଆସିକା: ଡେଥ୍ ଜୋନ୍ ପାଲଟିଛି ଗଞ୍ଜାମ ଜିଲ୍ଲା ଆସିକା ଡିପଲ ସ୍କୁଲ କଲେଜ ଛକ ମୁଖ୍ୟ ରାସ୍ତା । ବାରମ୍ବାରେ ଘଟୁଛି ଦୁର୍ଘଟଣା । ୧୦ ମାସରେ ୬ଟି ଦୁର୍ଘଟଣାରେ ୫ ଜଣଙ୍କ ମୃତ୍ୟୁ । ବାରମ୍ବାର ଏମିତି ଦୁର୍ଘଟଣା ଘଟୁଥିବା ବେଳେ ରାସ୍ତାପାର୍ଶ୍ଵରେ ଦୈବୀ ଶକ୍ତି ଥିବା ନେଇ ଚର୍ଚ୍ଚା ଜୋର ଧରିଥିଲା । ଦୁର୍ଘଟଣା ରୋକିବାକୁ ନବରାତ୍ରର ପ୍ରଥମ ଦିନରେ ସ୍ଥାନୀୟ ଲୋକେ ରାସ୍ତାରେ ଚଣ୍ଡୀପାଠ କରିଛନ୍ତି ।

୩୦ ନମ୍ବର ରାଜ୍ୟ ରାଜପଥର ଆସିକା ଡିପଲ୍ ସ୍କୁଲ କଲେଜ ଛକ ମୁଖ୍ୟ ରାସ୍ତା ଡେଥ୍ ଜୋନରେ ପରିଣତ ହୋଇଛି । ୧୦ ମାସରେ ୬ଟି ବଡ ଦୁର୍ଘଟଣାରେ ୫ ଜଣଙ୍କ ଜୀବନ ଯାଇଥିବା ବେଳେ ଏକାଧିକ ଲୋକ ଆଡତ ହୋଇଚନ୍ତି । ରାସ୍ତାରେ ଦୁର୍ଘଟଣା ରୋକିବାକୁ ପାଇଁ ଗ୍ରାମବାସୀ କରିଛନ୍ତି ଚଣ୍ଡିପାଠ ।

ଫେବୃଆରୀ ୨ ତାରିଖ ୨୦୨୪ରେ ଦୁଇଟି ବସ ମୁହାଁମୁହିଁ ଧକ୍କା ହେବା ଫଳରେ ୨ ଜଣଙ୍କ ଜୀବନ ଯାଇଥିଲା । ଗତ ଏପ୍ରିଲ ୩ ତାରିଖରେ ବାଇକ ଦୁର୍ଘଟଣାରେ ୨ ଜଣ ଗୁରୁତର ହୋଇଥିଲେ । ସେହିପରି ଜୁଲାଇ ୧୫ରେ ସେଇ ସମାନ ସ୍ଥାନରେ ଟ୍ରକ୍ ଧକ୍କାରେ ଜଣେ ବାଇକ୍ ଆରୋହୀଙ୍କ ମୃତ୍ୟୁ ଘଟିଥିଲା । ଏମିତିକି ସେଇ ଗୋଟିଏ ସ୍ଥାନରେ ଛଅଟି ବଡ ଦୁର୍ଘଟଣାରେ ୫ ଜଣ ପ୍ରାଣ ହରାଇବା ଥିବା ବେଳେ ୨୫ରୁ ଊର୍ଦ୍ଧ୍ବ ଛୋଟ ମୋଟ ଦୁର୍ଘଟଣାରେ ଅନେକ ଲୋକ ଗୁରୁତର ହୋଇଛନ୍ତି l

ଆସିକା ଡିପଲ୍ ସ୍କୁଲ କଲେଜ ଛକ ମୁଖ୍ୟ ରାସ୍ତାରେ ବାରମ୍ବାର ଦୁର୍ଘଟଣା ଘଟୁଥିବାରୁ ଏହା ପଛରେ କିଛି ଦୈବୀ ଶକ୍ତିର ପ୍ରଭାବ ଥିବା ନେଇ ସ୍ଥାନୀୟ ଲୋକ ବିଶ୍ଵାସ କରି ଏକତ୍ରିତ ହୋଇଥିଲେ । ପଣ୍ଡିତଙ୍କ ପରାମର୍ଶରେ ପ୍ରଥମେ ମାଆ ଶୀତଳାଇ ମନ୍ଦିରରେ ବିଶେଷ ପଜାର୍ଚ୍ଚନା ହୋମପାଠ ହୋଇଥିଲା । ପରେ ଦୁର୍ଘଟଣା ଘଟୁଥିବା ସ୍ଥାନରେ ପଣାପାଣି ଓ ଖଇ, କୋରା, ଗଜା, ମୂଆଁ ଭୋଗ ଦେଇ ଚଣ୍ଡିପାଠ କରାଯାଇଛି । ଏହି ବିଶେଷ ପୂଜାର୍ଚ୍ଚନାରେ ବହୁ ମହିଳା ଓ ପୁରୁଷ ସାମିଲ ହୋଇଥିଲେ ।