ଆକାଶରୁ ଝରିଲା କି ରୂପା ! ଗୋଟାଇବାକୁ ପିଲାଠୁ ବୁଢ଼ା ମାରପିଟ୍

ବିହାର : ଆପଣ ମାଛ ବର୍ଷା କଥା ଶୁଣିଥିବେ । କିନ୍ତୁ କେବେ ଚାନ୍ଦି ର୍ବଷା ଶୁଣିଛନ୍ତି କି? ଶୁଣିବା ଛାଡ଼ନ୍ତୁ, ଆମେ ଆପଣଙ୍କୁ ଏବେ ଚାନ୍ଦି ବର୍ଷା ଦେଖାଇବାକୁ ଯାଉଛୁ ?

ନିକଟରେ ବିହାରର ସୀତାମାଢ଼ି ଗାଁ ଲୋକେ ଚାନ୍ଦି ବର୍ଷା ଦେଖିଛନ୍ତି । ଘଟଣା ବିଲକୁଲ ସତ । ଚାନ୍ଦିର ଆକାର ଠିକ୍ ବର୍ଷା ଟୋପା ପରି । ସକାଳେ ଗାଁ ଲୋକେ ଉଠିଲା ପରେ ରାଜପଥ ସାରା ଚାନ୍ଦି ଚମକୁଥିବା ଦେଖିବାକୁ ପାଇଥିଲେ । ଏଭଳି ଦୃଶ୍ୟ ଦେଖି ଯେକେହି ଆଶ୍ଚର୍ଯ୍ୟ ହେବା ସ୍ୱାଭାବିକ କଥା । ସଡ଼କରେ ପଡିଥିବା ଛୋଟ ଛୋଟ ଚାନ୍ଦି ବୁନ୍ଦାକୁ ଦେଖି ପ୍ରଥମେ କେହି ବିଶ୍ୱାସ କରିପାରି ନଥିଲେ । ସକାଳୁ ସକାଳୁ ଏଭଳି ଶୁଦ୍ଧ ଚାନ୍ଦି କୋଉଠୁ ଆସିଲା ତାକୁ ନେଇ ପରସ୍ପର ସହ ଆଲୋଚନା ଆରମ୍ଭ ହୋଇଗଲା ।

ଏହା ପରେ ଛୋଟ ପିଲାଙ୍କଠାରୁ ଆରମ୍ଭ କରି ବୟସ୍କ ଓ ମହିଳାମାନେ ରାଜପଥରୁ ଚାନ୍ଦି ଗୋଟାଇବାକୁ ଆରମ୍ଭ କରିଥିଲେ । ୮୭ ନମ୍ବର ଜାତୀୟ ରାଜପଥ ନିକଟରେ ପାଖାପାଖି ତିନି କି.ମି. ଦୂର ର୍ପଯ୍ୟନ୍ତ ଏଭଳି ଚାନ୍ଦି ବିଛାଡି ହୋଇ ପଡିଥିବା ଦେଖିବାକୁ ମିଳିଥିଲା । ଏପରିକି ଚାନ୍ଦି ସଂଗ୍ରହ କରିବା ଲାଗି ଲୋକ ମାନଙ୍କ ମଧ୍ୟରେ ବାଡ଼ିଆପିଟା ଆରମ୍ଭ ହୋଇଯାଇଥିଲା ।

ତେବେ ଅନୁମାନ କରାଯାଉଛି ଯେ, ବିହାରର ଏହି ଗାଁଟି ନେପାଳ ସୀମାବର୍ତ୍ତୀ ହୋଇଥିବାରୁ ରାତିରେ କୌଣସି ଦୁର୍ବୃତ୍ତ ଚାନ୍ଦି ଚୋରା ଚାଲାଣ କରୁଥିବା ବେଳେ ଚାନ୍ଦି ପ୍ୟାକେଟ୍ ଫାଟି ଏମିତି ହୋଇଛି । ନ ହେଲେ କେବଳ ରାସ୍ତାରେ ତିନି କିଲୋମିଟର ପର୍ଯ୍ୟନ୍ତ ବିଛାଡ଼ି ହୋଇ ପଡ଼ିଲା କେମିତି  । ଆଉ ସବୁଠୁ ବଡ଼ କଥା ହେଉଛି, ରାତିରେ ଚାନ୍ଦି ଉପରେ କାକର ପଡ଼ି ସକାଳୁ ଚାନ୍ଦି ବର୍ଷା ହେଲା ଭଳି ଭ୍ରମ ସୃଷ୍ଟି ହୋଇଛି ।

ତେବେ ଏହା କେବଳ ଏକ ସନ୍ଦେହ ହୋଇଥିବାବେଳେ ବାସ୍ତବ ଘଟଣା କ’ଣ ତାହା ଏ ଯାଏ ସ୍ପଷ୍ଟ ହୋଇ ନାହିଁ । ')}