୫୧ ବର୍ଷ ବୟସରେ ୨୪ ବର୍ଷୀୟା ମଡେଲଙ୍କ ସହ ସର୍ବସାଧାରଣରେ ଅସଦାଚରଣ କରିଥିଲେ ଟ୍ରମ୍ପ !
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣିଥରେ ବିବାଦ ଭିତରକୁ ଆସିଛନ୍ତି । ଏଥର ତାଙ୍କୁ ବିବାଦ ଭିତରକୁ ଟାଣିଛନ୍ତି ଜଣେ ପୂର୍ବତନ ମଡେଲ । ୪୮ ବର୍ଷ ବୟସ୍କ ଏହି ମଡେଲଙ୍କ ଅଭିଯୋଗ ଯେ, ତାଙ୍କୁ ଯେତେବେଳେ ୨୪ ବର୍ଷ ହୋଇଥିଲା ସେତେବେଳେ ୫୧ ବର୍ଷୀୟ ଟ୍ରମ୍ପ ତାଙ୍କ ସହ ସର୍ବସାଧାରଣରେ ଖରାପ ବ୍ୟବହାର କରିଥିଲେ । ସେତେବେଳ ଟ୍ରମ୍ପ ରିୟଲ ଇଷ୍ଟେଟ୍ କାରବାର କରୁଥିଲେ ।
ଏମି ଡୋରିସ ନାମ୍ନୀ ଏହି ମଡେଲ ଦ ଗାର୍ଡିଆନକୁ ଦେଇଥିବା ସାକ୍ଷାତକାରରେ କହିଛନ୍ତି ଯେ, ୯୦ ଦଶକର ଶେଷ ଭାଗରେ ୟୁଏସ୍ ଓପନ ଟେନିସ୍ ମ୍ୟାଚ୍ ବେଳେ ତାଙ୍କ ସହିତ ଟ୍ରମ୍ପ ଅସଦାଚରଣ କରିଥିଲେ । ଷ୍ଟାଡିୟମର ଭିଆଇପି ବକ୍ସରେ ଟ୍ରମ୍ପ କେମିତି ତାଙ୍କ ସହିତ ଅନୁଚିତ ଆଚରଣ କରିଥିଲେ ସେ ବାବଦରେ ଏବେ ଏମି ମୁହଁ ଖୋଲିଛନ୍ତି । ଏମି କହିଛନ୍ତି ଯେ, ନ୍ୟୁୟର୍କରେ ଅନୁଷ୍ଠିତ ୟୁଏସ୍ ଓପନ ଟେନିସ ମ୍ୟାଚ୍ ବେଳେ ଟ୍ରମ୍ପ ତାଙ୍କୁ ଅସଭ୍ୟ ଭାବେ ଛୁଉଁଥିଲେ ଓ ଯେତେବେଳେ ମୁଁ ତାଙ୍କୁ ହଟାଇବାକୁ ଚାହିଁଲି ସେତେବେଳେ ସେ ମୋତେ ଜୋରରେ ଧରି ଥିଲେ । ଏତେ ଜୋରରେ ସେ ମୋତେ ଧରିଥିଲେ ଯେ, ମୁଁ ତାଙ୍କ ବାହୁ ବନ୍ଧନରୁ ମୁକୁଳି ପାରିନଥିଲି ।
ଏମିଙ୍କ ଅନୁସାରେ ୫୧ ବର୍ଷୀୟ ଟ୍ରମ୍ପ ତାଙ୍କୁ ବଳପୂର୍ବକ ଚୁମ୍ବନ ଦେଇଥିଲେ । ତେବେ ଏମିଙ୍କ ଏଭଳି ଅଭିଯୋଗକୁ ଟ୍ରମ୍ପ ଖଣ୍ଡନ କରିଛନ୍ତି । ଟ୍ରମ୍ପଙ୍କ ଓକିଲ କହିଛନ୍ତି ଯେ, ଏମି ଯେଉଁ ଅଭିଯୋଗ ଆଣିଛନ୍ତି ତାହା ଡାହା ମିଛ । କାରଣ ଯେଉଁ ମ୍ୟାଚ୍ କଥା କୁହାଯାଉଛି ସେତେବେଳେ ଏମିଙ୍କ ସହିତ ତାଙ୍କ ବୟଫ୍ରେଣ୍ଡ୍ ଥିଲେ । ଏହା ସହ ଗୋଟିଏ ମ୍ୟାଚ୍ ଚାଲୁଥିବା ବେଳେ ଏଭଳି ଘଟଣା ଘଟିଲା ଓ ଲୋକ କେମିତି ଜାଣି ପାରିଲେ ନାହିଁ ବୋଲି ଟ୍ରମ୍ପଙ୍କ ଓକିଲ ପାଲଟା ପ୍ରଶ୍ନ କରିଛନ୍ତି ।
