ସ୍କୁଲ ଫି’ ସମ୍ପର୍କିତ ଆବେଦନର ଶୁଣାଣି କରିବାକୁ ସୁପ୍ରିମକୋର୍ଟଙ୍କ ଅଗ୍ରାହ୍ୟ
ନୂଆଦିଲ୍ଲୀ : ଲକ୍ଡାଉନ୍ ସମୟରେ ସ୍କୁଲ୍ ଫି ଆଦାୟକୁ ସ୍ଥଗିତ କରିବା କିମ୍ୱା ଫି’ କରିବା ନେଇ ମୋରଟାରିୟମ୍ ପିରିୟଡ୍ ପ୍ରଦାନ କରାଯିବା ନେଇ ବିଭିନ୍ନ ରାଜ୍ୟର ଅଭିଭାବକଙ୍କ ପକ୍ଷରୁ ଦାବି ହୋଇଛି । ଏନେଇ ସୁପ୍ରିମକୋର୍ଟରେ ଆବେଦନ ହୋଇଥିଲା । ତେବେ ଶୁକ୍ରବାର ଜଷ୍ଟିସ୍ ଏସ୍ଏ ବୋବଡେ, ଆର୍ ସୁବାସ ରେଡ୍ଡୀ ଓ ଏଏସ୍ ବୋପନ୍ନାଙ୍କୁ ନେଇ ଗଠିତ ଖଣ୍ଡପୀଠ ଏହାର ଶୁଣାଣି କରିଥିଲେ ।
ଶୁକ୍ରବାରର ଏହି ଶୁଣାଣି ପରେ ସ୍କୁଲ ଫି’ ବୃଦ୍ଧି, ଓ ମୋରଟାରିୟମ୍ ପିରିୟଡ୍ ସମ୍ପର୍କିତ ଅଭିଯୋଗକୁ ସମ୍ପୃକ୍ତ ରାଜ୍ୟ ହାଇକୋର୍ଟରେ ଉଠାଯିବାର ଆବଶ୍ୟକତା ରହିଛି ବୋଲି ଖଣ୍ଡପୀଠ ପକ୍ଷରୁ କୁହାଯାଇଛି । କରୋନା କାରଣରୁ ଭିନ୍ନ ଭିନ୍ନ ରାଜ୍ୟରେ ପରିସ୍ଥିତି ଭିନ୍ନ ଭିନ୍ନ ରହିଛି । ଏଣୁ ସେଠାକାର ପରିସ୍ଥିତି ଉପରେ ହିଁ ଆଧାର କରି ହିଁ ଏ ସମ୍ପର୍କରେ ନିଷ୍ପତ୍ତି ନିଆଯାଇପାରିବ ।
ଆଡଭୋକେଟ୍ ବାଲାଜୀ ଶ୍ରୀନିବାସନ୍ ଓ କେ. ମୟଙ୍କ କହିଛନ୍ତି ଯେ, ପଞ୍ଜାବ ଓ ହରିୟାଣା ସରକାର ସ୍କୁଲ ଫି’ ବୃଦ୍ଧି ନେଇ ସ୍କୁଲମାନଙ୍କୁ ଅନୁମତି ଦେଇଥିବା କୋର୍ଟଙ୍କୁ ଅବଗତ କରାଇଥିଲେ । ଏହା ପରେ ସମ୍ପୃକ୍ତ ରାଜ୍ୟର ହାଇକୋର୍ଟରେ ଆବେଦନ କରିବାକୁ ନିର୍ଦ୍ଦେଶ ଦେଇଛନ୍ତି । ସୁପ୍ରିମକୋର୍ଟଙ୍କ ପକ୍ଷରୁ କୁହାଯାଇଛି ଯେ, ସେ ଏହି ସ୍ତରରେ ହସ୍ତକ୍ଷେପ କରିବାକୁ ଚାହୁଁନାହାନ୍ତି । ଆବେଦନକର୍ତ୍ତା ଆବେଦନ ପ୍ରତ୍ୟାହାର କରି ସମ୍ପୃକ୍ତ ରାଜ୍ୟର ହାଇକୋର୍ଟରେ ଆବେଦନ କରିପାରିବେ ।
