ନୂଆଦିଲ୍ଲୀ: ବରିଷ୍ଠ ସାମ୍ବାଦିକ ବିନୋଦ ଦୁଆଙ୍କୁ ମିଳିଛି ବଡ ଆଶ୍ୱସ୍ତି । ତାଙ୍କ ବିରୋଧରେ ହୋଇଥିବା ରାଜଦ୍ରୋହ ମାମଲାକୁ ଖାରଜ କରିଛନ୍ତି ସୁପ୍ରିମକୋର୍ଟ । ତାଙ୍କ ୟୁଟ୍ୟୁବ୍ କାର୍ଯ୍ୟକ୍ରମକୁ ନେଇ ଶିମଲାର ଏକ ଥାନାରେ ମାମଲା ରୁଜୁ ହୋଇଥିଲା ।
ଏହି ଅବସରରେ ସୁପ୍ରିମକୋର୍ଟ କହିଛନ୍ତି ଯେ, ୧୦ ବର୍ଷ ଧରି କାମ କରିଥିବା ସାମ୍ବାଦିକଙ୍କ ବିରୋଧରେ ହୋଇପାରିବନି ରାଜଦ୍ରୋହ ମାମଲା । ଏଭଳି ମାମଲା ରୁଜୁ କରିବା ପାଇଁ ନେବାକୁ ପଡିବ ହାଇକୋର୍ଟ ପ୍ୟାନେଲଙ୍କ ଅନୁମତି । ୧୯୬୨ରେ ଜାରି ହୋଇଥିବା ଆଦେଶ ଏଭଳି କିଛି କହୁଥିବା ଆଜି କହିଛନ୍ତି ସୁପ୍ରିମକୋର୍ଟ। ସାମ୍ବାଦିକ ମାନେ ସଂରକ୍ଷଣ ପାଇବା ପାଇଁ ହକଦାର୍ ବୋଲି କହିଛନ୍ତି କୋର୍ଟ।
ସୂଚନା ଅନୁଯାୟୀ, ବିନୋଦ ଦୁଆଙ୍କ ୟୁଟ୍ୟୁବ୍ କାର୍ଯ୍ୟକ୍ରମକୁ ନେଇ ଶିମଲାର କୁମାରସେନ୍ ଥାନାରେ ଜଣେ ବିଜେପି ନେତା ତାଙ୍କ ବିରୋଧରେ ରାଜଦ୍ରୋହ ମାମଲା ରୁଜୁ କରିଥିଲେ। ଗତ ବର୍ଷ ଅକ୍ଟୋବରରେ ଜଷ୍ଟିସ୍ ୟୁ ୟୁ ଲଳିତ ଓ ଜଷ୍ଟିସ୍ ବିନୀତ ସରନଙ୍କ ଖଣ୍ଡପୀଠ ଗତ ବର୍ଷ ଅକ୍ଟୋବର ୬ ତାରିଖରେ ବିନାେଦ, ହିମାଚଳ ପ୍ରଦେଶ ସରକାର ଓ ଅଭିଯୋଗକାରୀଙ୍କ ଦଲୀଲ ଶୁଣିବା ପରେ ଏହା ମାମଲାର ରାୟ ସଂରକ୍ଷିତ ରଖିଥିଲ । ଯାହାର ରାୟ ଆଜି ଆସିଛି ।
