ପୁରୀ: ବାଲୁକା କଳା ମାଧ୍ୟମରେ ଇଣ୍ଡିଆନ ହକି ଟିମକୁ ସ୍ଵାଗତ । ପୁରୀ ବେଳାଭୂମିରେ ବାଲୁକା କଳା ଜରିଆରେ ସ୍ୱାଗତ ଜଣାଇଲେ ଅନ୍ତର୍ଜାତୀୟ ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ । ପ୍ୟାରିସ ଅଲିମ୍ପିକରେ ଭାରତୀୟ ହକି ଦଳ ବ୍ରୋଞ୍ଜ ପଦକ ହାସଲ କରିଛନ୍ତି । ଓଡିଶା ପକ୍ଷରୁ ଭାରତୀୟ ହକି ଦଳକୁ ସ୍ୱାଗତ କରିବା ଲାଗି ବ୍ୟାପକ ପ୍ରସ୍ତୁତି କରାଯାଇଛି ।
ସୁଦର୍ଶନ ପଟ୍ଟନାୟକ ଏବଂ ପୁରୀ କ୍ରୀଡା ବିଭାଗର ମିଳିତ ଉଦ୍ୟମରେ ସମୁଦ୍ରକୂଳରେ ସୁନ୍ଦର ବାଲୁକା କଳା ନିର୍ମାଣ କରି ହକି ଦଳକୁ ସ୍ୱାଗତ କରାଯାଇଛି । ପୁରୀର କୁନି କୁନି ହକି ଖେଳାଳି ଉପସ୍ଥିତ ରହି ଭାରତୀୟ ହକି ଦଳକୁ ସ୍ୱାଗତ ଜଣାଇଛନ୍ତି । ହକି ଦଳକୁ ଶୁଭେଚ୍ଛା ଜଣାଇବା ସହ ସ୍ୱାଗତ ଲାଗି ସୁନ୍ଦର ବାଲୁକା କଳା ନିର୍ମାଣ କରାଯାଇଛି ।
ଆଜି ଭୁବନେଶ୍ଵର ଆସିବେ ଅଲିମ୍ପିକ୍ସ ପଦକ ବିଜେତା ଭାରତୀୟ ହକି ଦଳ । ଦିନ ୧୨ ଟା ୩୦ ମିନିଟରେ ବିମାନବନ୍ଦରରେ ସେମାନେ ପହଞ୍ଚିବେ। ହକି ଖେଳାଳିଙ୍କୁ କଳିଙ୍ଗ ଷ୍ଟାଡିୟମରେ ସମ୍ବର୍ଦ୍ଧନା ଦିଆଯିବ। ମୁଖ୍ଯମନ୍ତ୍ରୀ ସମସ୍ତଙ୍କୁ ସମ୍ବର୍ଦ୍ଧିତ କରିବେ। ଏହି ସୂଚନା ଦେଇଛନ୍ତି କ୍ରୀଡ଼ା ମନ୍ତ୍ରୀ ସୂର୍ଯ୍ଯବଂଶୀ ସୂରଜ। ହକି ଖେଳାଳିମାନେ ଏକ ଶୋଭାଯାତ୍ରାରେ ବିମାନ ବନ୍ଦରରୁ କଳିଙ୍ଗ ଷ୍ଟାଡିୟମ ପର୍ଯ୍ଯନ୍ତ ଆସିବେ।
ଆଗାମୀ ଦିନରେ ହକି ଟିମରେ ଯେମିତି ଅଧିକରୁ ଅଧିକ ଓଡ଼ିଆ ଖେଳାଳି ସାମିଲ ହେବେ, ସେଥିପାଇଁ ରାଜ୍ଯ ସରକାର ଚେଷ୍ଟା କରିବେ ବୋଲି କହିଛନ୍ତି କ୍ରୀଡ଼ାମନ୍ତ୍ରୀ। ୨୦୩୬ ଅଲମ୍ପିକ୍ସ ଆୟୋଜନ କରିବାକୁ ଭାରତ ସରକାର ବିଚାର କରୁଥିବା କହିଛନ୍ତି ସୂର୍ଯ୍ଯବଂଶୀ ସୂରଜ।
