ବିଦେଶିନୀଙ୍କ ଜଗା ପ୍ରୀତି, ରୁଷିଆରୁ ଆସି ଶ୍ରୀକ୍ଷେତ୍ରରେ ସାଝିଛନ୍ତି ବୋହୂ
ପୁରୀ: ବିଦେଶିନୀଙ୍କ ଜଗା ପ୍ରୀତି । ସୁଦୂର ରୁଷିଆରୁ ଆସି ଶ୍ରୀକ୍ଷେତ୍ରରେ ବୋହୂ ସାଝିଛନ୍ତି ସୁନ୍ଦରୀ ଗୋପୀକା ଦେବୀ ଦାସ । ବିଦେଶର ପରିପାଟୀ ଛାଡି ଓଡ଼ିଆଣୀ ବେଶରେ ଶ୍ରୀକ୍ଷେତ୍ରରେ ଦିନ କାଟୁଛନ୍ତି । ଶ୍ରୀକ୍ଷେତ୍ରର କଳା ସଂସ୍କୃତିକୁ ଆପଣେଇଛନ୍ତି । ଲୀଳାମୟ ଠାକୁରଙ୍କ ଲୀଳାର ଛିଟା ଏମିତି ଲାଗିଛି ଯେ ଶ୍ରୀକ୍ଷେତ୍ର ଧାମରେ ହିଁ ଶେଷ ନିଶ୍ୱାସ ତ୍ୟାଗ କରିବାକୁ ଇଛା ରଖିଛନ୍ତି ।
ଖାଲି ଏତିକି ନୁହେଁ ରୁଷିଆରେ ରହୁଥିବା ନିଜ ସାଙ୍ଗ, ସାଥି, ବନ୍ଧୁ ଓ ପରିଜନଙ୍କୁ ମଧ୍ୟ ଜଗାର ଲୀଳାଖେଳା, ରୀତିନୀତି ଓ ଓଡ଼ିଆର କଳା ସଂସ୍କୃତି ବିଷୟରେ ବୁଝାଉଛନ୍ତି । ନିଜ ଦେଶରେ ଶ୍ରୀଜଗନ୍ନାଥ ସଂସ୍କୃତିର ପ୍ରଚାର ପ୍ରସାର ପାଇଁ ଲାଗି ପଡିଛନ୍ତି ଗୋପୀକା ଦେବୀ ଦାସ । ନବଦିନାତ୍ମକ ଯାତ୍ରା ପରେ ଶ୍ରୀକ୍ଷେତ୍ରକୁ କଟକଣା ହଟିବା ପରେ ଆଜି ବଡଦାଣ୍ଡରୁ ନୀଳଚକ୍ର ସହ ପତିତପାବନଙ୍କୁ ଦର୍ଶନ କରିଛନ୍ତି ।.
