ରାଜରାସ୍ତା କଡ଼ରେ ବେଆଇନ ପାର୍କିଂ । ଦିନ କି ଦୁଇ ଦିନ ନୁହଁ ବର୍ଷ ବର୍ଷ ଧରି ଛିଡାହୋଇଛି ଭାରୀ ଯାନ । କାହାରି ନିୟମ କାନୁନକୁ ଖାତିର ନାହିଁ । ବାଲେଶ୍ୱର ଜିଲ୍ଲା ଦେଇ ଯାଇଥିବା ୧୬ ନମ୍ୱର୍ ଜାତୀୟ ରାଜପଥର ପ୍ରମୁଖ ଛକ ରେମୁଣା ଗୋଲେଇ ସହ ସାହାବଣି ପର୍ଯ୍ୟନ୍ତ ରାସ୍ତାରେ ଯାତାୟତ ଏବେ କଷ୍ଟସାଧ୍ୟ ହେଉଛି । ଗୋଲେଇ ନିକଟରେ ନିର୍ମାଣଧୀନ ନୂତନ ରାସ୍ତା କାମ ହେଉ କିମ୍ବା ଡିଭାଇଡର ପାର୍ଶ୍ୱ, ଯିଏ ଯେଉଁଠି ପାରୁଛି ବର୍ଷ ବର୍ଷ ଧରି ରାସ୍ତା କଡ଼ରେ ଶହ ଶହ ଭାରୀ ଯାନ ଓ ଟ୍ରକ୍ ଛିଡ଼ା କରୁଛି । ଫଳରେ କ୍ରମାଗତ ଭାବେ ଛୋଟବଡ଼ ଦୁର୍ଘଟଣା ଘଟି ଅନେକ ଜୀବନ ଯାଉଛି । ଅନେକ ଗାଡ଼ିରେ ଗଛ ଲଟା ବି ମାଡ଼ି ଗଲାଣି । ଫଳରେ ସର୍ଭିସ ରୋଡ୍ ସହ ମୁଖ୍ୟ ରାଜପଥ ସଙ୍କୁଚିତ ହୋଇ ଦୈନନ୍ଦିନ ଲୋକେ ଦୁର୍ଘଟଣାର ଶିକାର ହେଉଛନ୍ତି । ଏହାକୁ ନେଇ ସ୍ଥାନୀୟ ଅଧିବାସୀ ପ୍ରଶାସନ ଉପରେ କ୍ଷୋଭ ପ୍ରକାଶ କରିଛନ୍ତି।…
ଆରଟିଓ ଓ ପୋଲିସ ମଧ୍ୟରେ ଦୋଷ ଠେଲାଠେଲି ଦେଖିବାକୁ ମିଳିଛି । ଗାଡି ଗୁଡିକୁ ପ୍ରଶାସନ ତୁରନ୍ତ ନ ହଟାଇଲେ ଆଗାମୀ ଦିନରେ ଆନ୍ଦୋଳନ ହେବ ବୋଲି ଚେତାବନୀ ଦେଇଛନ୍ତି ସ୍ଥାନୀୟ ଲୋକ। ସେପଟେ ଏନଏଚଏଆଇ, ଟ୍ରକ୍ ଆସୋସିଏସନ୍, ବସ୍ ଆସୋସିଏସନ୍ ଏବଂ ଢାବା ମାଲିକମାନଙ୍କ ସହ ଆଲୋଚନା କରି କଡ଼ା ଚେତାବନୀ ଦେଇଛି ପ୍ରଶାସନ । ଗତ ଜାନୁଆରୀ ମାସରେ ରେମୁଣା ଗୋଲେଇରେ ପରିବହନ ବିଭାଗ ପକ୍ଷରୁ ଏଭାକୁଏସନ୍ କରାଯାଇଥିଲା । ରାସ୍ତା ଉପରେ ଗାଡ଼ି ପାର୍କିଂ କଲେ କ୍ରେନ୍ ଲଗାଇ ଗାଡ଼ି ଜବତ କରାଯିବା ସହ ମୋଟା ଅଙ୍କର ଜରିମାନା ଆଦାୟ ହେବ ବୋଲି ପ୍ରଶାସନ ସ୍ପଷ୍ଟ କରିଛି । ଏନଏଚ୍ ପାଟ୍ରୋଲିଂ ଗାଡ଼ି ଏବଂ ଆରଟିଓଙ୍କ ସହଯୋଗରେ ରାଜପଥରେ ଯେପରି କୌଣସି ଗାଡ଼ି ନରହିବ ତାହା ସୁନିଶ୍ଚିତ କରାଯିବ ବୋଲି ଜିଲ୍ଲା ପୋଲିସ ପକ୍ଷରୁ ଅବଗତ କରାଯାଇଛି।….
ଜାତୀୟ ରାଜପଥ କଡ଼ରୁ ବେଆଇନ ପାର୍କିଂ ହଟାଇବା ପାଇଁ ପ୍ରଶାସନ ତତ୍ପରତା ଦେଖାଇଛି ସତ, କିନ୍ତୁ ଏହାର ଏକ ସ୍ଥାୟୀ ସମାଧାନ ପାଇଁ ଟ୍ରକ୍ ଟର୍ମିନାଲ ବା ନିର୍ଦ୍ଦିଷ୍ଟ ପାର୍କିଂ ଜାଗାର ବ୍ୟବସ୍ଥା ନହେଲେ ଦୁର୍ଘଟଣାକୁ ରୋକିବା ସମ୍ଭବ ହେବ ନାହିଁ।
