କେବେ ଖୋଲିବ ଧର୍ମାନୁଷ୍ଠାନ ? ହାଇକୋର୍ଟରେ ଉତ୍ତର ରଖିଲେ ରାଜ୍ୟ ସରକାର
କଟକ: ମାର୍ଚ୍ଚ ମାସରୁ ଶ୍ରଦ୍ଧାଳୁଙ୍କ ପାଇଁ ବନ୍ଦ ରହିଛି ରାଜ୍ୟର ସମସ୍ତ ଧର୍ମାନୁଷ୍ଠାନ । ଧିରେ ଧିରେ ସବୁ ସେବା ସ୍ୱାଭାବିକ ହେଉଥିବା ବେଳେ ଭକ୍ତଟିଏ ଯାଇପାରୁନି ଭଗବାନଙ୍କ ଦ୍ୱାରକୁ । କାରଣ ଭକ୍ତ ଓ ଭଗବାନଙ୍କ ମଧ୍ୟରେ ପାଚେରୀ ହୋଇ ଛିଡ଼ା ହୋଇଛି ଭୂତାଣୁ । ମହାମାରୀ କାୟା ବିସ୍ତାର କରି ଚାଲିଥିବା ବେଳେ ରାଜ୍ୟରେ କେବେ ଖୋଲିବ ଧର୍ମାନୁଷ୍ଠାନ ଏହାକୁ ନେଇ ଭକ୍ତଙ୍କ ମନରେ ନାନା ପ୍ରଶ୍ନ ।
ଏ ସମ୍ପର୍କିତ ମାମଲାରେ ହାଇକୋର୍ଟରେ ରାଜ୍ୟ ସରକାର ଜବାବ ଦାଖଲ କରିଛନ୍ତି । ଏବେ ମନ୍ଦିର କିମ୍ବା କୌଣସି ଧର୍ମାନୁଷ୍ଠାନ ଖୋଲିବା ସମ୍ଭବ ନୁହେଁ ବୋଲି କୁହାଯାଇଛି । ବିଶେଷକରି ଶ୍ରୀମନ୍ଦିର ଗର୍ଭଗୃହ ଛୋଟ ଅଟେ । ସେଠାରେ ଗହଳି ହେଲେ ସଂକ୍ରମଣର ଆଶଙ୍କା ଅଧିକି ରହିଛି । ଆସନ୍ତା ସପ୍ତାହରେ ମାମଲାର ପରବର୍ତ୍ତୀ ଶୁଣାଣି ହେବ ।
ପୁରୀ ଜିଲ୍ଲାରେ ଏବେ ଯାଏଁ ୯ ହଜାର ୭୦୪ ଜଣ ସଂକ୍ରମିତ ଚିହ୍ନଟ ହୋଇଥିବା ବେଳେ ୭ ହଜାର ୮୨୪ ଜଣ ସୁସ୍ଥ ହୋଇଛନ୍ତି । ଜିଲ୍ଲାରେ ୫୨ ଜଣଙ୍କ ଜୀବନ ନେଇଛି ମହାମାରୀ କରୋନା । ଏବେ ୧ ହଜାର ୮୨୫ ଜଣ ସଂକ୍ରମିତଙ୍କ ଚିକିତ୍ସା ଚାଲିଛି । ସଂଖ୍ୟାଧିକ ସେବାୟତ କରୋନା ପଜିଟିଭ୍ ଚିହ୍ନଟ ହୋଇଥିବା ବେଳେ କେତେଜଣଙ୍କ ଜୀବନ ମଧ୍ୟ ଗଲାଣି ।
