ବଢ଼ି ପାଣିରେ ବୁଡ଼ିଗଲା ୬ ସରକାରୀ କର୍ମଚାରୀଙ୍କୁ ନେଇ ଯାଉଥିବା ଡଙ୍ଗା

ଅନୁଗୁଳ: ବନ୍ୟା କବଳରେ ଅଧା ଓଡ଼ିଶା ଥିବାବେଳେ ଆସିଛି ଅଘଟଣର ଖବର । ବନ୍ୟା ପୀଡ଼ିତଙ୍କୁ ସହାୟତା ଯୋଗାଇ ଦେବାକୁ ଯାଉଥିବା ଡଙ୍ଗା ବୁଡ଼ିଯାଇଛି । ଟିକରପଡ଼ାରେ ବନ୍ୟା ପୀଡ଼ିତଙ୍କୁ ସହାୟତା ଯୋଗାଇବା ପାଇଁ ସରକାରୀ କର୍ମଚାରୀମାନଙ୍କୁ ନେଇ ଯାଉଥିବା ଏକ ଡଙ୍ଗା ବୁଡ଼ି ଯାଇଛି । ସୌଭାଗ୍ୟବଶତଃ ଏଥିରେ ଥିବା କର୍ମଚାରୀ ଅଳ୍ପକେ ରକ୍ଷା ପାଇ ଯାଇଛନ୍ତି ।

ଅନୁଗୁଳ ବ୍ଲକର କନିଷ୍ଠ ଯନ୍ତ୍ରୀ କ୍ଷମାସାଗାର ସିଂହ, ମାଣିକଯୋଡ଼ି ପଞ୍ଚାୟତ ନିର୍ବାହୀ ଅଧିକାରୀ ନିରଂଜନ ଦେହୁରୀ, ଭିଏଲଡବ୍ଲୁ ସୋମନାଥ ଦାସ, ନାଉରିଆ ଗୋଗୁଆ ବେହେରାଙ୍କ ସହିତ ୬ ଜଣ ଟିକରପଡ଼ା ହାଇସ୍କୁଲ ନିକଟରୁ ପଞ୍ଚାୟତ ଅଫିସକୁ ଏକ ଦେଶୀ ଡଙ୍ଗାରେ ଯାଉଥିଲେ । ଅଚାନକ ବନ୍ୟା ପାଣି ମଝିରେ ଡଙ୍ଗାଟି ଭାରସାମ୍ୟ ହରାଇ ଗୋଟିଏ ପଟକୁ ପଲଟି ଯାଇଥିଲା ।

ଦେଖୁ ଦେଖୁ ନାଉରିଆଙ୍କ ସହିତ ୬ ଜଣ ଯାକ ପାଣିରେ ପଡ଼ିଯାଇଥିଲେ । କାହାରି ପାଖରେ ଲାଇଫ୍ ଜାକେଟ୍‌ ନଥିଲା। ଜୀବନ ବଞ୍ଚାଇବା ପାଇଁ ଉଦ୍ୟମ କରିଥିଲେ । ତେବେ, ଅନ୍ୟ ଏକ ଡଙ୍ଗାରେ ଥିବା କିଛି ଲୋକଙ୍କ ନଜର ଏମାନଙ୍କ ଉପରେ ଏହି ଘଟଣା ପଡ଼ିଥିଲା । ସେମାନେ ସଙ୍ଗେ ସଙ୍ଗେ ଦେବଦୂତ ଭଳି ସେଠାରେ ପହଞ୍ଚି ବହୁ କଷ୍ଟରେ ସମସ୍ତଙ୍କୁ ଉଦ୍ଧାର କରିଛନ୍ତି ।