କୋର୍ଟ ଶୁଣାଇଲେ ଆଜୀବନ ସଜ୍ଜା, ଧକ୍କା ଦେଇ ଖସିଗଲା ଦୁଷ୍କର୍ମକାରୀ
ଭୋପାଳ: ସଜ୍ଜା ଶୁଣିଲା ଚମ୍ପଟ ମାରିଲା । ଦୁଷ୍କର୍ମ ଦୋଷୀକୁ କୋର୍ଟ ଆଜୀବନ କାରାଦଣ୍ଡ ଶୁଣାଇବା ପରେ ସେ କୋର୍ଟରୁ ଚମ୍ପଟ୍ ମାରିଛି । ମଧ୍ୟପ୍ରଦେଶ ରାଜଗଡ଼ ଜିଲ୍ଲା କୋର୍ଟରେ କ୍ଲର୍କଙ୍କୁ ଧକ୍କା ଦେଇ ଖସି ପଳାଇଛି ଦୋଷୀ । ଏବେ ଜିଲ୍ଲା ଏସପିଙ୍କ ସହ ପୋଲିସ ଦୋଷୀ ଜିତେନ୍ଦ୍ର ଭିଲକୁ ଖୋଜୁଛି । ବିଭିନ୍ନ ସ୍ଥାନରେ ଚଢ଼ାଉ ଜାରି ରହିଛି ।
ଏକ ଦୁଷ୍କର୍ମ ମାମଲାରେ ରାଜଗଡ଼ ଜିଲ୍ଲା କୋର୍ଟ ଜିତେନ୍ଦ୍ର ଭିଲକୁ ଦୋଷୀ ସାବ୍ୟସ୍ତ କରିଥିଲେ । ପକସୋ ଆକ୍ଟରେ ମାମଲାର ବିଚାର କରିବା ସହ ଆଜୀବନ ସଜ୍ଜା ଶୁଣାଇଥିଲେ ବିଚାରପତି । ଆଜୀବନ କାରାଦଣ୍ଡ ଶୁଣିବା ପରେ ଦୋଷୀ ବିଚଳିତ ହୋଇ ପଡ଼ିଥିଲା । କୋର୍ଟରେ କ୍ଲର୍କ ସହ ଅନ୍ୟମାନଙ୍କୁ ଧକ୍କା ମାରି ଖସି ପଳାଇଛି ।
ସୂଚନା ଅନୁସାରେ, ପ୍ରାୟ ୨ ବର୍ଷ ତଳେ ଜଣେ ମାନସିକ ବିକାରଗ୍ରସ୍ତ ନାବାଳିକାଙ୍କ ସହ ଜିତେନ୍ଦ୍ର ଦୁଷ୍କର୍ମ କରିଥିଲେ । ନାବାଳିକା ଜଣଙ୍କ ଗର୍ଭବତୀ ହେବା ପରେ କଥା ସାମ୍ନାକୁ ଆସିଥିଲା । ପରିବାରର ପଚରାଉଚରା ପରେ ନାବାଳିକା ଜିତେନ୍ଦ୍ରର ନାଁ କହିଥିଲା । ଏହାପରେ ନାବାଳିକାର ପରିବାର ୨୦୧୮ ମସିହାରେ ଥାନାକୁ ଯାଇ ରାଜଗଡ଼ ଥାନାରେ ମାମଲା ରୁଜୁ କରିଥିଲେ ।
ଏତଲା ପରେ ପୋଲିସ ପକସୋ ଆକ୍ଟ ସହ ନାବାଳିକାଙ୍କୁ ଦୁଷ୍କର୍ମ ଓ ଅନ୍ୟ ଧାରାରେ ଜିତେନ୍ଦ୍ର ବିରୋଧରେ ମାମଲା ରୁଜୁ କରିଥିଲା । ଏହି ମାମଲାର ବିଚାର କରି ଜିଲ୍ଲା ଜଜ୍ ଜିତେନ୍ଦ୍ରକୁ ଦୋଷୀ ସାବ୍ୟସ୍ତ କରିବା ସହ ଆଜୀବନ କାରାଦଣ୍ଡାଦେଶ ଦେଇଥିଲେ । ଏହାପରେ ଜିତେନ୍ଦ୍ର କୋର୍ଟ ପରିସରରୁ ଚମ୍ପଟ ମାରିଥିଲା ।
