ମଙ୍ଗଳବାର ଠାରୁ ଭ୍ୟାକ୍ସିନ୍ ପରିବହନ, ଜାଣନ୍ତୁ କେମିତି ହୋଇଛି ପ୍ରସ୍ତୁତି…

ନୂଆଦିଲ୍ଲୀ: ଭ୍ୟାକ୍ସିନ୍ ପାଇଁ ପ୍ରସ୍ତୁତ ଅଛି ଭାରତ । ସରିଛି ଡ୍ରାଏ୍ ରନ୍ । ଦେଶରେ କୋଭିଡ୍ ଟିକାର ଜରୁରୀକାଳୀନ ବ୍ୟବହାର ଲାଗି କୋଭିସିଲ୍ଡ ଏବଂ କୋଭାକ୍ସିନକୁ ପୂର୍ବରୁ ଡିସିଜିଆଇ ଅନୁମତି ଦେଇଥିଲା । ଏବେ ଭ୍ୟାକ୍ସିନ୍ ଡୋଜ୍ ପାଇଁ ସରକାର ଅର୍ଡର ଦେଇଛନ୍ତି । କେନ୍ଦ୍ର ସରକାର ସିରମ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆ ଠାରୁ ୧୧ ମିଲିୟନ୍ ଅକ୍ସଫୋର୍ଡ ଭ୍ୟାକ୍ସିନ୍ (କୋଭିସିଲ୍ଡ) କିଣିବାକୁ ଅର୍ଡର ଦେଇଛନ୍ତି । ସୋମବାର ସନ୍ଧ୍ୟାରେ ସରକାର ସିରମକୁ ଭ୍ୟାକ୍ସିନ୍ କ୍ରୟ ପାଇଁ ଅର୍ଡର ଦେଇଥିବା ବେଳେ ପୁନେରୁ ମଙ୍ଗଳବାର ସକାଳ ୪ଟା ୩୦ରୁ ଆରମ୍ଭ ହେବ ଟିକା ପରିବହନ ।

ସିରମର କୋଭିସିଲ୍ଡ ଟିକା ପରିବହନ ଲାଗି ପୁନେର ଲଜିଷ୍ଟିକ୍ ଫାର୍ମ କୁଲ୍-ଏକ୍ସ କୋଲ୍ଡ ଚେନ୍ ପ୍ରସ୍ତୁତ ରହିଛି । କୁଲ୍-ଏକ୍ସ ପୁନେରୁ କୋଭିସିଲ୍ଡ ଟିକାକୁ ଦେଶର ବିଭିନ୍ନ ସ୍ଥାନରେ ପହଞ୍ଚାଇବ । କୁଲ୍-ଏକ୍ସର ଏମଡି ରାହୁଲ ଅଗ୍ରୱାଲ୍ କହିଛନ୍ତି- ଟିକା ପରିବହନ ପାଇଁ ମାସକ ପୂର୍ବରୁ ପ୍ରସ୍ତୁତି ଆରମ୍ଭ ହୋଇଥିଲା । ପରିବହନ ପାଇଁ ୩୦୦ରୁ ୩୫୦ଟି ଗାଡ଼ି ପ୍ରସ୍ତୁତ ରହିଛି । ଏଥିସହ ବ୍ୟାକଅପରେ ୫୦୦ରୁ ୬୦୦ ଗାଡ଼ି ରଖାଯାଇଥିବା କହିଛନ୍ତି କୁଲ୍-ଏକ୍ସର ଏମଡି ।

ଟିକା ପରିବହନ ଏକ ଚ୍ୟାଲେଞ୍ଜ ବୋଲି ସେ କହିଛନ୍ତି । ଏଥିସହ ଟିକା ପରିବହନ ବେଳେ ସୁରକ୍ଷା ପ୍ରସଙ୍ଗ ଉଠାଇଛନ୍ତି । ଟିକା ପରିବହନ ଗାଡ଼ିରେ ବିଯୁକ୍ତ ୨୫ ଡିଗ୍ରୀରୁ ସଂଯୁକ୍ତ ୨୫ ଡିଗ୍ରୀ ତାପମାତ୍ରା ବ୍ୟବସ୍ଥା ହୋଇପାରିବ । ପ୍ରତିଟି ଟ୍ରକ୍ ଟେକ୍ନୋଲୋଜିରେ ପରିପୂର୍ଣ୍ଣ । ଟିକା ପରିବହନ ପାଇଁ ବିଭିନ୍ନ ରାଜ୍ୟର ସରକାର ସୁରକ୍ଷା ଦୃଷ୍ଟିରୁ ଭ୍ୟାକ୍ସିନ୍ ଗାଡ଼କୁ ପୋଲିସ ଏସକର୍ଟ ଯୋଗାଇ ଦେବେ ବୋଲି କୁନାଲ ଅଗ୍ରୱାଲ୍ କହିଛନ୍ତି ।

ଦେଶବ୍ୟାପୀ ଆସନ୍ତା ୧୬ ତାରିଖରୁ କୋଭିଡ୍ ଟିକାକରଣ ଆରମ୍ଭ ହେବ । ଶନିବାର ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ବସିଥିବା କୋଭିଡ୍ ବୈଠକରେ ଏନେଇ ମୋଦି ବିଭିନ୍ନ ରାଜ୍ୟ ସହ ଆଲୋଚନା କରିଥିଲେ । ଜାନୁଆରୀ ପ୍ରଥମ ସପ୍ତାହରେ ଡିସିଜିଆଇ କୋଭିସିଲ୍ଡ ଏବଂ କୋଭାକ୍ସିନର ଜରୁରୀକାଳୀନ ବ୍ୟବହାର ଲାଗି ଅନୁମତି ଦେଇଥିଲେ । ସରକାର କୋଭିସିଲ୍ଡର ୧୧ ମିଲିୟନ୍ ଡୋଜ୍ କିଣିବାକୁ ଅର୍ଡର ଦେଇଛନ୍ତି । ପ୍ରତିଟି ଡୋଜର ମୂଲ୍ୟ ୨୦୦ ଟଙ୍କା ରହିଛି । ଖୁବଶୀଘ୍ର କୋଭାକ୍ସିନକୁ ମଧ୍ୟ ସରକାର ଭ୍ୟାକ୍ସିନ୍ ପାଇଁ ଅର୍ଡର ଦେବେ ବୋଲି ଜଣାପଡ଼ିଛି ।

ଏଥିସହ ପଢ଼ନ୍ତୁ- କରୋନା ଟିକାକରଣକୁ ନେଇ ଆପଣଙ୍କ ମନରେ ଥିବା ସମସ୍ତ ପ୍ରଶ୍ନର ଉତ୍ତର ପଢ଼ନ୍ତୁ…