ଆମେରିକାରେ ଗର୍ଭପାତ ଉପରେ ରୋକ୍

ୱାସିଂଟନ୍ : ଆମେରିକାରେ ଗର୍ଭପାତ ଉପରେ ରୋକ୍ । ସୁପ୍ରିମକୋର୍ଟଙ୍କ ନିଷେଧାଦେଶକୁ ନେଇ ଦେଶବ୍ୟାପୀ ଝଡ଼ । ୧୯୭୩ ଜାନେ ରୋ ବନାମ ହେନେରୀ ଓ୍ବାଡେ ମାମଲାର ରାୟକୁ ରଦ୍ଦ କରିଛନ୍ତି ସୁପ୍ରିମକୋର୍ଟ । ପ୍ରାୟ ୫୦ ବର୍ଷ ପରେ ଗର୍ଭପାତକୁ ନେଇ ରହିଥିବା ଅଧିକାର ଉପରେ ଲାଗିଛି ରୋକ୍ । ସୁପ୍ରିମକୋର୍ଟଙ୍କ ଏହି ରାୟ ଆସିବା କ୍ଷଣି ବିଭିନ୍ନ ଷ୍ଟେଟରେ ବନ୍ଦ ହୋଇଛି ଗର୍ଭପାତ । ତେବେ କିଛି ଷ୍ଟେଟ ସୁପ୍ରିମକୋର୍ଟ ରାୟକୁ ନ ମାନି ଗର୍ଭପାତକୁ ଆଇନସମ୍ମତ କରିବା ବ୍ୟବସ୍ଥା ମଧ୍ୟ ରଖିଛନ୍ତି । ବଡ଼ କଥା ହେଉଛି ସୁପ୍ରିମକୋର୍ଟଙ୍କ ଏହି ରାୟକୁ ବିରୋଧ କରିଛନ୍ତି ଆମେରିକା ରାଷ୍ଟ୍ରପତି ଜୋ ବାଇଡେନ ।

ଦେଶ ଓ କୋର୍ଟ ଇତିହାସ ଲାଗି ଏହା ଏକ ଦୁଃଖଦ ଦିବସ ଏବଂ ଏହି ରାୟ ଆମେରିକାକୁ ୧୫୦ ବର୍ଷ ପଛକୁ ନେଇଛି ବୋଲି ସେ କହିଛନ୍ତି । ପୂର୍ବତନ ରାଷ୍ଟ୍ରପତି ବାରାକ ଓବାମା ସୁପ୍ରିମକୋର୍ଟଙ୍କ ରାୟକୁ ସମାଲୋଚନା କରିଛନ୍ତି । ସୁପ୍ରିମକୋର୍ଟଙ୍କ ଏହି ରାୟର କିଛି ଗୋପନ ତଥ୍ୟ ମାସେ ତଳେ ଲିକ୍ ହେବା ପରେ ଦେଶବ୍ୟାପୀ ଚହଳ ସୃଷ୍ଟି କରିଥିଲା । ସୁପ୍ରିମକୋର୍ଟଙ୍କ ଏହି ରାୟ ପରେ ଆଇନକୁ କାର୍ଯ୍ୟକାରୀ କରିଥିବା ଷ୍ଟେଟର ଗର୍ଭବତୀମାନଙ୍କ ନିକଟରେ ତିନିଟି ବିକଳ୍ପ ରହିଛି । ସେମାନେ ଗର୍ଭଧାରଣ କରି ରହିବେ, କିମ୍ବା ଗୋପନୀୟ ଭାବେ ଗର୍ଭପାତ କରିବେ କିମ୍ବା ଆଇନକୁ କାର୍ଯ୍ୟକାରୀ କରି ନଥିବା କିଛି ଷ୍ଟେଟକୁ ପଳାୟନ କରିବେ ।

ସୁପ୍ରିମକୋର୍ଟଙ୍କ ଏହି ରାୟ ଯୋଗୁ ଗରିବ ମହିଳା ଓ ସ୍ପେନ ଭାଷାଭାଷୀ ମହିଳା ଗଭୀର କ୍ଷତିର ସମ୍ମୁଖୀନ ହେବେ ବୋଲି କହିଛନ୍ତି କିଛି ଗର୍ଭପାତ ସପକ୍ଷବାଦୀ ସଂଗଠନ । ସୁପ୍ରିମକୋର୍ଟଙ୍କ ଏହି ରାୟ ସମଲିଙ୍ଗୀ ବିବାହ ଓ ଗର୍ଭନିରୋଧ ବ୍ୟବସ୍ଥା ପ୍ରତି ଚାଲେଞ୍ଜ ସୃଷ୍ଟି କଲା ବୋଲି ବିଭିନ୍ନ ମହଲ କହିଛନ୍ତି । ଏବେ ନଜର ପକାଇବା କଣ ଥିଲା ସେହି ବିତର୍କିତ ଇତିହାସ । ଟେକ୍ସାସର ଦୁଇ ଆଟର୍ଣ୍ଣିଂ ସାରା ଓ୍ବେଡିଙ୍ଗଟନ ଓ ଲିଣ୍ଡା କଫି ୧୯୭୦ ଦଶକରେ ଚିନ୍ତା କରିଥିଲେ ଦେଶରେ ଗର୍ଭପାତକୁ ଆଇନସମ୍ମତ କରାଯାଉ । ତାଙ୍କ ପ୍ରଚେଷ୍ଟାରେ ଏକ ମାମଲା ତିଆରି କରିବା ଲାଗି ଯୋଜନା ହୋଇଥିଲା ।

ଜୁନ ୧୯୬୯ରେ ୨୧ ବର୍ଷ ବୟସ୍କା ତଥା ତୃତୀୟ ଥର ଗର୍ଭବତୀ ନର୍ମା ମ୍ୟାକୋର୍ଭେ ମାମଲା ରୁଜୁ ଲାଗି ଆଗ୍ରହୀ ହୋଇଥିଲେ । ପରେ ୧୯୭୦ରେ ଛଦ୍ମନାମ ଜାନେ ରୋ ନାମରେ ଟେକ୍ସାସ କୋର୍ଟରେ ମାମଲା ଦାୟର କରିଥିଲେ । ଏହାର ପ୍ରତିପକ୍ଷରେ ଥିଲେ ଆଟର୍ଣ୍ଣି ହେନେରୀ ଓ୍ବାଡେ । ମାମଲାର ଶୁଣାଣି କ୍ରମେ ୧୯୭୩ ଜାନୁଆରୀରେ ସୁପ୍ରିମକୋର୍ଟ ଗର୍ଭପାତକୁ ଆଇନସମ୍ମତ କରିଥିଲେ । ସୁପ୍ରିମକୋର୍ଟ କହିଥିଲେ- ନିଜ ଶରୀର ଉପରେ ମହିଳାଙ୍କ ନିଜର ଅଧିକାର ରହିଛି ଏବଂ ସେମାନେ ଗର୍ଭପାତ କରିପାରିବେ । ମାତ୍ର ବର୍ତ୍ତମାନ ସେହି ରାୟକୁ ରଦ୍ଦ କରି ବର୍ତ୍ତମାନ ସୁପ୍ରିମକୋର୍ଟ କହିଛନ୍ତି- ଗର୍ଭପାତ ନେଇ ସମ୍ବିଧାନରେ ନାହିଁ କୌଣସି ନିର୍ଦ୍ଦେଶ ।