ସୋନୁଙ୍କ ନାଁରେ ଓଲ୍ଡିଂ ଦୋକାନ ଖୋଲି ଚର୍ଚ୍ଚାରେ ପ୍ରଶାନ୍ତ, କହିଲେ ଅନୁମତି ଆଣିଛି…
1 min read
ରାଜନଗର: ଲକ୍ଡାଉନ୍ ବେଳେ ପ୍ରବାସୀଙ୍କ ପାଇଁ ଭଗବାନ ପାଲଟିଥିଲେ ବଲିଉଡ୍ ତାରକା ସୋନୁ ସୁଦ୍ । ରିଲ୍ ଲାଇଫ୍ରେ ଭିଲିଆନ୍ ରୋଲ ପାଇଁ ସବୁ ବେଳେ ଚର୍ଚ୍ଚାରେ ଥିବା ସୋନୁ କିନ୍ତୁ ରିଅଲ ଲାଇଫ୍ରେ ହିରୋ ସାଜିଛନ୍ତି । କରୋନା ମହାମାରୀ ସମୟରେ ସାରା ଦେଶ ଲକ୍ଡାଉନ୍ ଥିବା ବେଳେ ପ୍ରବାସୀଙ୍କ ପାଇଁ ସାହା ଭରଶା ଥିଳେ ସୋନୁ । ଗରିବ ଖଟିଖିଆ ପ୍ରବାସୀ ଶ୍ରମିକଙ୍କୁ ନିଜ ଭିଟା ମାଟିକୁ ଫେରାଇବା ପାଇଁ ସହଯୋଗ କରିଥିଲେ ସୋନୁ । ନିସ୍ୱାର୍ଥପର ଭାବେ ସେ ଦୁଃଖ ଦୁର୍ଦଶାରେ ଦିନ କାଟୁଥିବା ଗୋଟି ଗୋଟି ପ୍ରବାସୀମାନଙ୍କୁ ଗାଡ଼ି ସାହାଯ୍ୟରେ ଘରକୁ ପଠାଇଥିଲେ ।
ତେବେ ଏମିତି ଜଣେ ପ୍ରବାସୀ ଶ୍ରମିକ ହେଉଛନ୍ତି ପ୍ରଶାନ୍ତ ପ୍ରଧାନ । ସୋନୁଙ୍କ ସହଯୋଗ ଯୋଗୁଁ ଲକ୍ଡାଉନ୍ ସମୟରେ ସେ ନିଜ ଗାଁକୁ ଫେରିପାରିଛନ୍ତି । ଆଉ ଏବେ ସେ ଗାଁରେ ଏକ ଓଲ୍ଡିଂ ଦୋକାନ ଖୋଲିଛନ୍ତି । ଯୁବକ ଜଣକ ହେଉଛନ୍ତି କେନ୍ଦ୍ରାପଡ଼ା ରାଜନଗରର ପ୍ରଶାନ୍ତ ପ୍ରଧାନ । ଲକଡାଉନ୍ ବେଳେ କେରଳରେ ୭୦ ଦିନ ଧରି ଫସିଥିବା ବେଳେ ସୋନୁଙ୍କ ସହାୟତା ପରେ ସେ ନିଜ ଗାଁକୁ ଫେରିପାରିଥିଲେ । ତେଣୁ ସୋନୁଙ୍କୁ ଭଗବାନ ବୋଲି ପ୍ରଶାନ୍ତ ମାନିବା ସହ ତାଙ୍କ ନାଁରେ ଏକ ଦୋକାନ ଖୋଲିଥିଲେ । ଏହାପରେ ସେ ସୋନୁଙ୍କ ପାଖକୁ ଏନେଇ ଏକ ପ୍ରଶଂସା ପତ୍ର ମଧ୍ୟ ଲେଖିଥିଲେ । ତେବେ ସୋନୁ ଏହା ଜାଣିବା ପରେ ନିଜ ଟୁଇଟ୍ ଆକାଉଣ୍ଟରେ ମଧ୍ୟ ଏହି ଘଟଣାକୁ ସେୟାର କରିଥିଲେ । ସୋନୁ ଓଡ଼ିଶା ଆସିଲେ ତାଙ୍କ ଦୋକାନକୁ ଆସିବା ପାଇଁ ପ୍ରଶାନ୍ତ ନିବେଦନ କରିଛନ୍ତି ।
ଲକ୍ଡାଉନ୍ ସମୟରେ ଅନେକ ଯୁବକ ଯୁବତୀ କେରଳରେ ଫସିଥିଲେ । ସରକାର ଓ ପ୍ରଶାସନ ନିକଟରେ ସାହାଯ୍ୟ ପାଇଁ ଗୁହାରି କରିଥିଲେ । ହେଲେ କେହି ଶୁଣିନଥିଲେ । ଏହି ସମୟରେ ଯୁବକ ଯୁବତି ମାନେ ବଲିଉଡ୍ ଅଭିନେତା ସୋନୁ ସୁଦ୍ଙ୍କୁ ମେ ୨୩ ତାରିଖରେ ଫୋନ୍ ଯୋଗେ ନିଜର ଦୁଃଖ ଜଣାଇଥିଲେ ।ତେବେ ଏହାର ଏକ ଘଣ୍ଟା ପରେ ସୋନୁ ନିଜ ତରଫରୁ ଫୋନ କରି ପ୍ରସାନ୍ତଙ୍କୁ ସହଯୋଗ ପାଇଁ ପ୍ରତିଶ୍ରୁତି ଦେଇଥିଲେ । ଆଉ ମେ ୨୯ ତାରିଖରେ ପ୍ରସାନ୍ତଙ୍କ ସମେତ ଆଉ ୧୭୭ ଜଣ ଓଡିଆ ଯୁବକଙ୍କୁ ନିଜ ଖର୍ଚରେ କୋଚି ବିମାନବନ୍ଦରରୁ ଏକ ବିମାନ ଯୋଗେ ନିଜ ଅଂଚଳକୁ ପଠାଇବାକୁ ବ୍ୟବସ୍ଥା କରିଥିଲେ ।
The biggest brand that I will ever endorse ❤️ May you become the richest entrepreneur my brother ? https://t.co/7W8VuZBA5k
— sonu sood (@SonuSood) July 19, 2020
ପ୍ରଶାନ୍ତଙ୍କ ଦୋକାନ ହେଉଛି ‘ସୋନୁ ସୁଦ୍ ୱେଲ୍ଡିଂ ୱାର୍କସପ୍’ । ସୋନୁଙ୍କ ଫଟୋ ଥିବା ହୋର୍ଡିଂ ମାରି ବ୍ୟବସାୟ ଆରମ୍ଭ କରିଛନ୍ତି । ପ୍ରଶାନ୍ତ କୁହନ୍ତି, ସେ ଗତ ଜାନୁଆରିରେ ହାତିନା ଛକରେ ଏକ ୱେଲ୍ଡିଂ ୱାର୍କସପ୍ ଆରମ୍ଭ କରିଥିଲେ । ମାତ୍ର ଭଲ ନ ଚାଲିବାରୁ ଅଧିକ ରୋଜଗାର ପାଇଁ ସେ କେରଳ ଚାଲି ଯାଇଥିଲେ । ଆଉ ସେଠାରୁ ଫେରିବା ପରେ ଏହି ଦୋକାନ ଖୋଲିଛି । ଦୋକାନ ଖୋଲିବା ପୂର୍ବରୁ ସୋନୁଙ୍କ ସହ କଥା ହୋଇ ଅନୁମତି ମଧ୍ୟ ନେଇଛି ବୋଲି କହିଛନ୍ତି ପ୍ରଶାନ୍ତ ।
ସୋନୁ ମଧ୍ୟ ଟ୍ୱିଟ୍ ଯୋଗେ ପ୍ରଶାନ୍ତଙ୍କୁ ବ୍ୟବସାୟ ପାଇଁ ଶୁଭେଛା ଜଣାଇଛନ୍ତି । ସୋନୁ ଟ୍ୱିଟରେ ଲେଖିଛନ୍ତି ଯେ, ମୁଁ ଯେବେବି କେବେ ଓଡ଼ିଶା ଯାଏ ନିଶ୍ଚୟ ଏହି ଭାଇଙ୍କ ଦୋକାନକୁ ଯିବି ଓ ସେଠାରେ ୱେଲ୍ଡିଂ କାମ ଟ୍ରାଏ କରିବି । କେବଳ ଏତିକି ନୁହେଁ ସୋନୁ ଆହୁରି ମଧ୍ୟ କହିଛନ୍ତି ଯେ, ଏହା ହେଉଛି ମୁଁ ଯେତେ ବ୍ରାଣ୍ଡ୍ ପମୋସନ କରିଛି ସେସବୁ ଭିତରେ ସବୁଠାରୁ ବଡ ବ୍ରାଣ୍ଡ୍ । ଭଗବାନ କରନ୍ତୁ ମୋ ଭାଇ ତୁମେ ସବୁଠୁ ବଡ ଶିଳ୍ପପତି ହୁଅ ।
କେରଳରୁ ଗାଁକୁ ଫେରିବା ପରେ ସୋନୁ ତାଙ୍କ ସହିତ ବହୁବାର କଥା ହୋଇ ଭଲମନ୍ଦ ପଚାରି ବୁଝିଛନ୍ତି । ସୋନୁ କେତେବଡ଼ ଅଭିନେତା, ତାହା ଗୁରୁତ୍ୱପୂର୍ଣ୍ଣ ନୁହେଁ । ମାତ୍ର ସେ ଯେଉଁ ମହାନତା ଦେଖାଇଛନ୍ତି ତାହା ବଡ଼ ବଡ଼ ଅଭିନେତାଙ୍କୁ ବଳିଯାଇଛି । ତାଙ୍କର ମହାନତାକୁ ସମ୍ମାନ ଜଣାଇବା ପାଇଁ ପ୍ରଶାନ୍ତଙ୍କ ଉଦ୍ୟମକୁ ନେଇ ଏବେ ସବୁଠି ଚର୍ଚ୍ଚା ।
