ମଶାଣିରେ ହାଇଡ୍ରାମା: ପୂର୍ବତନ ବିଧାୟକଙ୍କ ପତ୍ନୀଙ୍କ ଅଧାପୋଡ଼ା ଶବ ଜବତ କଲା ପୋଲିସ
ଭୁବନେଶ୍ବର: ରାଜଧାନୀ ଭୁବନେଶ୍ବରର ସତ୍ୟନଗର ମଶାଣିରେ ଚାଲିଥିଲା ଶବଦାହ । ହଠାତ ପହଞ୍ଚିଲା ପୋଲିସ । ଅଧାରୁ ବନ୍ଦ ହେଲା ଶବଦାହ । ଅଧାପୋଡ଼ା ଶବକୁ ଜବତ କଲା ପୋଲିସ । ଆଜି ଏମିତି କିଛି ଘଟଣା ସତ୍ୟନଗରର ଓ ଏହାର ଆଖପାଖ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।
ମିଳିଥିବା ସୂଚନା ଅନୁସାରେ ପୂର୍ବତନ ବ୍ରହ୍ମଗିରି ବିଧାୟକ ଅଜୟ କୁମାର ଜେନାଙ୍କ ଧର୍ମପତ୍ନୀ ଅଶ୍ରୁକଣା ପ୍ରଧାନଙ୍କ ମୃତ୍ୟୁ ଘଟିଥିଲା । ତେବେ ଏନେଇ ବିଧାୟକ ଓ ତାଙ୍କ ପରିବାର କାହାକୁ କିଛି ଜଣାଇ ନଥିଲେ । ଏପରିକି ଶବ ବ୍ୟବଚ୍ଛେଦ ମଧ୍ୟ ନକରାଇ ସତ୍ୟନଗର ମଶାଣିରେ ଶବଦାହ କରୁଥିଲେ । ଖବର ପାଇ ସମ୍ପର୍କୀୟ ଓ ପୋଲିସ ସତ୍ୟନଗର ମଶାଣିରେ ପହଞ୍ଚି ଅର୍ଦ୍ଧଦଗ୍ଧ ଶବକୁ ଜବତ କରିଛି ।
ମୃତଦେହ ଉଦ୍ଧାର ପରେ ବ୍ଯବଚ୍ଛେଦ ପାଇଁ ଖାରବେଳନଗର ଥାନା ପୋଲିସ ଉପସ୍ଥିତିରେ କ୍ଯାପିଟାଲ ହସ୍ପିଟାଲକୁ ନିଆଯାଇଛି । ପରିବାର ସଦସ୍ଯଙ୍କଠାରୁ କିଛି ଡକ୍ଯୁମେଣ୍ଟ ମାଗିବା ସହ ଯାଞ୍ଚ କରିଛି ପୋଲିସ୍ । ସେପଟେ ଜମିବାଡ଼ି ବିବାଦକୁ ନେଇ ତରବରିଆ ଭାବରେ ଶବଦାହ କରାଯାଉଥିଲା ବୋଲି କହିଛନ୍ତି ସ୍ଥାନୀୟ ଲୋକେ ।
