ସହକର୍ମୀ ଓ ସାମ୍ବାଦିକଙ୍କ ସହଯୋଗରେ ପୁଅ ଉଠାଇଲେ ଶବ
ଗଞ୍ଜାମ: ଶେଷରେ ଉଠିଲା ମୃତଦେହ । ଦୁଇ ଜଣ ସାମ୍ବାଦିକ, ଜଣେ ପୋଲିସ କର୍ମଚାରୀଙ୍କ ସହାୟତାରେ ପୁଅ ଉଠାଇଲେ ଏଏସ୍ଆଇ ବାପାଙ୍କ ମୃତଦେହ । କୋଦଳା ତହସିଲଦାର, ବିଡିଓ ଓ ପୁରୁଷୋତ୍ତମପୁର ଏସଡିପିଓଙ୍କ ଉପସ୍ଥିତିରେ ଉଠିଲା ଶବ । ଏସ୍ପି ପହଞ୍ଚିବା ପରେ ଗାର୍ଡ ଅଫ ଅନର ଦିଆଯାଇ ଶେଷକୃତ୍ୟୁ ସମ୍ପନ୍ନ କରାଯିବ ।
କାର୍ଯ୍ୟରତ ଏଏସ୍ଆଇଙ୍କ ମୃତ୍ୟୁ ପରେ କେହି କାନ୍ଧ ନଦେବାରୁ ଦୀର୍ଘ ସମୟ ଧରି ମେଡିକାଲ ବାହାରେ ପଡିରହିଥିଲା ମୃତଦେହ । କରୋନା ସନ୍ଦେହରେ ଏପରିକି ପରିବାର ଲୋକ ଶବକୁ ଛୁଇଁନଥିବା ବେଳେ ସଂପର୍କୀୟ ବି ଆସିନଥିଲେ । ଫଳରେ କୋଦଳା ମେଡିକାଲରେ ଘଣ୍ଟା ଘଣ୍ଟା ଧରି ଶବ ପଡିରହିଥିଲା । ମୃତ ଏଏସଆଇ ଗଞ୍ଜାମ ଭଞ୍ଜନଗର କୋର୍ଟରେ କାର୍ଯ୍ୟ କରୁଥିଲେ ।
ଭୂତାଣୁ ଭୟ : ପଡ଼ି ରହିଛି କରୋନା ଯୋଦ୍ଧାଙ୍କ ଶବ ପାଖକୁ ଆସୁ ନାହାଁନ୍ତି ସ୍ତ୍ରୀ ପିଲା
ଆପଣଙ୍କୁ କହି ରଖୁଛୁ ଯେ, ଗତ ୪ ଦିନ ରବୀନ୍ଦ୍ରନାଥଙ୍କୁ କାଶ ଓ ଥଣ୍ଡାରେ ପୀଡିତ ଥିଲେ । ପରେ ସେ ସ୍ୱାସ୍ଥ୍ୟ ପରୀକ୍ଷା ପାଇଁ ମେଡିକାଲ ଯାଇଥିଲେ କିନ୍ତୁ ତାଙ୍କର ସ୍ୱାସ୍ଥ୍ୟ ଅଧିକ ଖରାପ ହୋଇଥିଲା, ସେଠାରେ ତାଙ୍କର ମୃତ୍ୟୁ ହୋଇଥିଲା । କିନ୍ତୁ କରୋନା ସନ୍ଦେହରେ ତାଙ୍କ ଶବକୁ କେହି ବି ଛୁଇଁନଥିଲେ । ତେଣୁ ସଙ୍ଗେ ସଙ୍ଗେ ଶବ ସଂସ୍କାର କରାଯାଇ ପାରିନଥିଲା । ଏପରିକି ତାଙ୍କ ନିକଟରେ ଉପସ୍ଥିତ ଥିବା ତାଙ୍କ ସ୍ତ୍ରୀ ଓ ପୁଅ ମଧ୍ୟ ଶବକୁ ଛୁଉଁନଥିଲେ । ବହୁସମୟ ଧରି ଶବ ପଡ଼ି ରହିଥିଲା । ଏହାପରେ ସହକର୍ମୀ ଓ ସାମ୍ବାଦିକଙ୍କ ସହଯୋଗରେ ପୁଅ ପିପିଇ କିଟ୍ ପିନ୍ଧି ଶବ ଉଠାଇଛନ୍ତି ।
