ବନ୍ଧାହେଲେ ଆନ୍ଧ୍ର ବ୍ୟାଙ୍କର ମହିଳା ଆସିଷ୍ଟାଣ୍ଟ ମ୍ୟାନେଜର
ଭୁବନେଶ୍ୱର: ଗ୍ରାହକଙ୍କ ବିଶ୍ୱାସ ଓ ଭରସାରେ ବିଷ । ଗିରଫ ହେଲେ ଆନ୍ଧ୍ର ବ୍ୟାଙ୍କର ମହିଳା ଆସିଷ୍ଟାଣ୍ଟ ମ୍ୟାନେଜର । ଭରତପୁର ଅଞ୍ଚଳରେ ଥିବା ଏକ ଆନ୍ଧ୍ର ବ୍ୟାଙ୍କର ସହକାରୀ ଶାଖା ପରିଚାଳକଙ୍କୁ ବାନ୍ଧିଛି କମିଶନରେଟ ପୋଲିସ । ଘରୋଇ ବ୍ୟାଙ୍କର ଆସିଷ୍ଟାଣ୍ଟ ମ୍ୟାନେଜର ମୀନା ନାଏକ ବ୍ୟାଙ୍କରେ ଗ୍ରାହକଙ୍କୁ ଠକୁଥିଲେ । ଅଭିଯୋଗ ଅନୁସାରେ, ଜଣେ ଅବସରପ୍ରାପ୍ତ ଶିକ୍ଷକ ଆନ୍ଧ୍ର ବ୍ୟାଙ୍କରେ ଅକ୍ଟୋବର ୧୬ ତାରିଖରେ ୧୦ ଲକ୍ଷ ଟଙ୍କା ଏକ ବର୍ଷ ପାଇଁ ଫିକ୍ସ ଡିପୋଜିଟ୍ (ସ୍ଥାୟୀ ଜମା) କରିଥିଲେ ।
ସ୍ଥାୟୀ ଜମାର ଦିନକ ପରେ ଘରୋଇ ବ୍ୟାଙ୍କର ମହିଳା ଅଧିକାରୀ ଜଣଙ୍କୁ ଉକ୍ତ ଫିକ୍ସ ଡିପୋଜିଟରୁ ୭ ଲକ୍ଷ ଟଙ୍କା ଋଣ ଆକାରରେ ଉଠାଇ ନିଜ ସମ୍ପର୍କୀୟଙ୍କ ବିଭିନେ୍ନ ବ୍ୟାଙ୍କ ଆକାଉଣ୍ଟକୁ ଟ୍ରାନ୍ସଫର କରିଥିଲେ । ଏନେଇ ଜମାକାରୀ ଅବସରପ୍ରାପ୍ତ ବ୍ୟାଙ୍କ ମ୍ୟାନେଜର ଅବଗତ ହେବା ପରେ କମିଶନରେଟ୍ ପୋଲିସରେ ଅଭିଯୋଗ କରିଥିଲେ । ପୋଲିସ ୪୨୦ ମହିଳା ବ୍ୟାଙ୍କ ଅଧିକାରୀ ମୀନା ନାଏକଙ୍କୁ ଗିରଫ କରି କୋର୍ଟ ଚାଲାଣ କରିଛି ।
ବ୍ୟାଙ୍କ ଅଡିଟରୁ ଜଣାପଡ଼ିଛି ସହକାରୀ ଶାଖା ପରିଚାଳକ ମୀନା ଏଭଳି ଭାବେ ଗ୍ରାହକଙ୍କ ଠାରୁ ୧ କୋଟିରୁ ଅଧିକ ଟଙ୍କା ଲୁଟିଛନ୍ତି । ମୀନା ପ୍ରାୟ ୧୧୬.୮୭ ଲକ୍ଷ ଟଙ୍କା ବିଭିନ୍ନ ଗ୍ରାହକଙ୍କ ଆକାଉଣ୍ଟରୁ ଲୁଟି ନେଇଛନ୍ତି । କର୍ତ୍ତୃପକ୍ଷ ମୀନାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଇଥିବା ବେଳେ ବ୍ୟାଙ୍କ ଅଡିଟରେ କାରନାମା ଧରାପଡ଼ିବା ପରେ ସେ କିଛି ଟଙ୍କା ଫେରାଇଛନ୍ତି । ଭରତପୁର ପୋଲିସ ଓ କମିଶନରେଟ ପୋଲିସର ଆଣ୍ଟି ଫ୍ରଡ୍ ସେଲ୍ ହାତରେ ଧରାପଡ଼ି ଜେଲ୍ ଯାଇଛନ୍ତି ମୀନା । ପୋଲିସ ଏବେ ବି ମାମଲାର ତଦନ୍ତ ଜାରି ରଖିଥିବା ବେଳେ ଠକେଇର ଶିକାର ଜମାକାରୀ ପୋଲିସରେ ଅଭିଯୋଗ କରିବାକୁ ସୂଚନା ଦେଇଛନ୍ତି ଭୁବନେଶ୍ୱର ଡିସିପି ।
