ନନ୍ଦିଘୋଷ ବ୍ୟୁରୋ : ଆଜି ପ୍ରଧାନମନ୍ତ୍ରୀଙ୍କ ଓଡ଼ିଶା ଗସ୍ତ। ହେଲେ ଏହି ହାଇପ୍ରୋଫାଇଲ୍ ଗସ୍ତ ସମୟରେ ରାଜଧାନୀ ଭୁବନେଶ୍ୱରରେ ଦେଖିବାକୁ ମିଳିଛି ବଡ଼ ପ୍ରତିବାଦ। ଓଡ଼ିଶାର ଜୀବନ ରେଖା କୁହାଯାଉଥିବା ମହାନଦୀର ସୁରକ୍ଷା ଏବଂ ଓଡ଼ିଶାର ହକ୍ ପାଇଁ ରାସ୍ତାକୁ ଓହ୍ଲାଇଛି ‘ମହାନଦୀ ବଞ୍ଚାଓ ଆନ୍ଦୋଳନ’।
ଭୁବନେଶ୍ୱର ସ୍ଥିତ ଜୟଦେବ ଭବନ ସାମ୍ନାରେ ଶତାଧିକ ଆନ୍ଦୋଳନକାରୀ ଏକାଠି ହୋଇ ଏକ ବିଶାଳ ମାନବ ଶୃଙ୍ଖଳ ସୃଷ୍ଟି କରିଛନ୍ତି। ହାତରେ ବ୍ୟାନର ଓ ପ୍ଲାକାର୍ଡ ଧରି ସେମାନେ ପ୍ରଧାନମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିବାକୁ ଚେଷ୍ଟା କରିଛନ୍ତି।
ମହାନଦୀ ବଞ୍ଚାଓ ଆନ୍ଦୋଳନର ଆବାହକ ସୁଦର୍ଶନ ଦାଶଙ୍କ ନେତୃତ୍ୱରେ ଆୟୋଜିତ ଏହି ପ୍ରତିବାଦରେ ସେମାନେ ସରକାରଙ୍କ ଆଗରେ କିଛି ସିଧାସଳଖ ପ୍ରଶ୍ନ ରଖିଛନ୍ତି ।
. ଓଡ଼ିଶାର ଜୀବନ ରେଖା ମହାନଦୀ ଆଗକୁ ବଞ୍ଚି ରହିବ କି ନାହିଁ?
. ମହାନଦୀ ପାଣି ଉପରେ ଓଡ଼ିଶାର ଯେଉଁ ଅଧିକାର ରହିଛି, ତାହା ରାଜ୍ୟବାସୀ ପାଇବେ କି ନାହିଁ?
ମହାନଦୀ ଜଳ ବିବାଦ ଏବଂ ଛତିଶଗଡ଼ର ବ୍ୟାରେଜ୍ ନିର୍ମାଣ ଯୋଗୁଁ ଓଡ଼ିଶା କିଭଳି ପ୍ରଭାବିତ ହେଉଛି, ସେ ସମ୍ପର୍କରେ କେନ୍ଦ୍ର ସରକାରଙ୍କୁ ଅବଗତ କରାଇବା ଏହି ମାନବ ଶୃଙ୍ଖଳର ମୁଖ୍ୟ ଉଦ୍ଦେଶ୍ୟ । ପ୍ରଧାନମନ୍ତ୍ରୀ ଓଡ଼ିଶା ମାଟିରେ ଥିବା ବେଳେ ହିଁ ମହାନଦୀର ସୁରକ୍ଷା ପାଇଁ ଏହି ସ୍ୱରକୁ ଆହୁରି ଜୋରଦାର କରାଯାଇଛି।
