ଆଜି ସଂସଦରେ ରାଜ୍ୟ ସ୍ବାର୍ଥ ସମ୍ପର୍କିତ ପ୍ରସଙ୍ଗ ଉଠାଇବ ବିଜେଡି

ଭୁବନେଶ୍ୱର: ଆଜିଠୁ ଆରମ୍ଭ ହେବ ସଂସଦର ବଜେଟ ଅଧିବେଶନ। ସଂସଦରେ ରାଜ୍ୟ ସ୍ୱାର୍ଥ ସମ୍ପର୍କିତ ପ୍ରସଙ୍ଗ ଉଠାଇବ ବିଜେଡି। ବିଜେଡି ପକ୍ଷରୁ ଜାତୀୟ ରାଜପଥ ପ୍ରସଙ୍ଗକୁ ଫୋକସ କରାଯାଇଛି। କଟକ-ସମ୍ବଲପୁର ଜାତୀୟ ରାଜପଥ କାମ ଦୀର୍ଘ ୯ବର୍ଷ ହେବ ଚାଲିଛି। ମାତ୍ର ଏଯାଏଁ ତାହା ସମ୍ପୂର୍ଣ୍ଣ ହୋଇପାରିନାହିଁ। ଏହା ସହ କୋଷ୍ଟାଲ ହାଇୱେ କାର୍ଯ୍ୟ ବି ଆରମ୍ଭ ହୋଇନାହିଁ। ସେହିପରି  ଭୁବନେଶ୍ଵର ଆଉଟର ରିଂରୋଡ କାର୍ଯ୍ୟରେ ମଧ୍ୟ କୌଣସି ଅଗ୍ରଗତି ହୋଇନାହିଁ। ଏସବୁ କାର୍ଯ୍ୟ ତ୍ୱରାନ୍ୱିତ କରିବାକୁ ସଂସଦର ବଜେଟ୍ ଅଧିବେଶନରେ ଦାବି କରାଯିବ।

ସେହିପରି ପ୍ରଧାନମନ୍ତ୍ରୀ ଆବାସ ଯୋଜନାରେ  ପଶ୍ଚିମ ଏବଂ ଦକ୍ଷିଣ ଓଡ଼ିଶା ଆହୁରି  ୭ଲକ୍ଷ ଘର ପାଇବା କଥା କିନ୍ତୁ ତାହା ମିଳିନାହିଁ । ଆଦିବାସୀଙ୍କ ସର୍ବାଙ୍ଗୀନ ବିକାଶ ପାଇଁ ତିନିଟି ପ୍ରସଙ୍ଗ ରହିଛି। ୧୬୯ଟି ପ୍ରସ୍ତାବ କେନ୍ଦ୍ର ସରକାରଙ୍କ ନିକଟରେ ଅଛି। ହୋ, ମୁଣ୍ଡାରୀ, କୁଇ ଏବଂ ସଉରା ଭାଷାକୁ ସମ୍ବିଧାନର ଅଷ୍ଟମ ଅନୁଛେଦରେ ସାମିଲ କରାଯିବା ଦାବି ପୁନର୍ବାର ସଂସଦରେ ଉତ୍ଥାପନ କରାଯିବ। କେନ୍ଦୁପତ୍ର ଉପରୁ ଜିଏସଟି ଛାଡ଼, ଫସଲ ବୀମା ଯୋଜନାରେ କେନ୍ଦ୍ର ନିକଟରେ ଥିବା ରାଜ୍ୟର ବଳକା ରାଶି ପ୍ରଦାନ କରିବାକୁ ଦାବି କରାଯିବ। ଏମଏସପି ବୃଦ୍ଧି, ଅହିଂସା ଶବ୍ଦକୁ ସମ୍ବିଧାନ ମୁଖବନ୍ଧରେ ସ୍ଥାନ ଦେବା, ଓଡ଼ିଶା ବିଧାନ ପରିଷଦ ଗଠନ ଆଦି ଦାବି  ବିଜେଡି ସାଂସଦମାନେ ସଂସଦର ବଜେଟ ଅଧିବେଶନରେ ଉଠାଇବେ।