ସୁବର୍ଣ୍ଣପୁର: ପ୍ରାର୍ଥୀତ୍ବ ନେଇ ବିଜେପିରେ କନ୍ଦଳ। ସୁବର୍ଣ୍ଣପୁର ବୀରମହାରାଜପୁର ବିଧାନସଭା ନିର୍ବାଚନମଣ୍ଡଳୀରେ ବିଜେପି ପ୍ରାର୍ଥୀଙ୍କୁ ଆଶାୟୀ ନେତା ଓ ତାଙ୍କ ସମର୍ଥକ ଦୃଢ଼ ବିରୋଧ କରିଛନ୍ତି। ବିଜେପି ଟିକେଟ ଆଶାୟୀ ଥିବା ଆନନ୍ଦ ବାରିକଙ୍କୁ ଟିକେଟ ନମିଳି ରଘୁନାଥ ଜଗଦଳାଙ୍କୁ ଟିକେଟ ମିଳିଛି। ଯାହାକୁ ନେଇ ଆନନ୍ଦ ବାରିକ ଏବଂ ସମର୍ଥକମାନେ ବିରୋଧ କରିବା ସହିତ ରାଜ୍ୟ ନେତୃବର୍ଗଙ୍କ ଦୃଷ୍ଟି ଆକର୍ଷଣ କରିଛନ୍ତି। ରଘୁନାଥ ଜଗଦଳାଙ୍କ ଟିକେଟ କାଟି ଆନନ୍ଦ ବାରିକଙ୍କୁ ଟିକେଟ ଦେବା ପାଇଁ ସମର୍ଥକମାନେ ଦାବି କରିଛନ୍ତି।
ସୂଚନା ଅନୁଯାୟୀ, ୨୦୧୪ ନିର୍ବାଚନରେ ବିଜେପି ଟିକେଟ ପାଇ ହାରିଥିଲେ ଆନନ୍ଦ ବାରିକ। ସେ କହିଛନ୍ତି ଯେ, ବୀରମହାରାଜପୁରରେ ଆମେ ବିଜେପିର ମୂଳଦୁଆ ପକାଇ ଥିବା ବେଳେ ଅନ୍ୟମାନେ ଟିକେଟ ପାଇବେ, ଏହା ଚଳିବ ନାହିଁ। ଆନନ୍ଦ ବାରିକଙ୍କୁ ଟିକେଟ ନମିଳିଲେ ରଘୁନାଥ ଜଗଦଳାଙ୍କୁ ତୀବ୍ର ବିରୋଧ କରାଯିବ ବୋଲି ଆନନ୍ଦଙ୍କ ଗୋଷ୍ଠୀ ଚେତାବନୀ ଦେଇଛନ୍ତି।
