ଶିଳାନ୍ୟାସକୁ ବର୍ଷେ, ଆରମ୍ଭ ହେଉନି ପାଇକ ସ୍ମୃତିସ୍ତମ୍ଭ ନିର୍ମାଣ

ଖୋର୍ଦ୍ଧା: ପାଇକ ବିଦ୍ରୋହର ଦୁଇଶହ ବର୍ଷ ପୂର୍ତ୍ତିକୁ ସ୍ମରଣ କରିବା ପାଇଁ କେନ୍ଦ୍ର ସରକାର ବରୁଣେଇ ପାଦ ଦେଶରେ ଏକ କୀର୍ତ୍ତି ସ୍ଥାପନ ନିମିତ୍ତ ଅର୍ଥ ମଞ୍ଜୁର କରିଥିଲେ । ଭାରତର ରାଷ୍ଟ୍ରପତି ରାମନାଥ କୋବିନ୍ଦ ଠିକ୍ ବର୍ଷକ ତଳେ ଆସି ଶିଳାନ୍ୟାସ କରିଥିଲେ । ଏହାରି ଭିତରେ ଶିଳାନ୍ୟାସକୁ ବର୍ଷେ ବିତିଗଲାଣି କିନ୍ତୁ ଏପର୍ଯ୍ୟନ୍ତ କିଛି ବି କାର୍ଯ୍ୟ ଆରମ୍ଭ ହୋଇନାହିଁ ।

ପାଇକ ବିଦ୍ରୋହକୁ ପୂରିଲା ୨୦୩ ବର୍ଷ । ଦୁଇ ଶହ ବର୍ଷ ପୂର୍ତ୍ତି ପାଳନ ପାଇଁ ଗତବର୍ଷ ଦିଲ୍ଲୀ ଠାରୁ ପଲ୍ଲୀ ସବୁଠି ପାଇକ ସମାରୋହ ମଞ୍ଚରେ ପୂର୍ବ ଗାଥା ସ୍ମରଣ କରାଯାଇଥିଲା । କେନ୍ଦ୍ର ସରକାର ପାଇକ ବିଦ୍ରୋହକୁ ସ୍ୱୀକୃତି ପ୍ରଦାନ କରି ଖୋର୍ଦ୍ଧା ବରୁଣେଇ ପୀଠ ପାଦଦେଶରେ ପାଇକ ସ୍ମୃତିସ୍ତମ୍ଭ, ସଂଗ୍ରାହଳାୟ, ଅସ୍ତ୍ରଶସ୍ତ୍ର ଗାର ପ୍ରତିଷ୍ଠା ପାଇଁ ବ୍ଲୁ-ପ୍ରିଣ୍ଟ ପ୍ରସ୍ତୁତ କରିଥିଲେ । ୨୦୦୯ ମସିହା ଡିସେମ୍ବର ୮ ତାରିଖରେ ଶିଳାନ୍ୟାସ କରିଥିଲେ ରାଷ୍ଟ୍ରପତି । ହେଲେ ଏହାକୁ ବର୍ଷେ ବିତି ଯାଇଥିଲେ ମଧ୍ୟ ଏପର୍ଯ୍ୟନ୍ତ କୌଣସି କାମ ଆରମ୍ଭ ହୋଇନାହିଁ ।

ପାଇକ ସ୍ମୃତିସ୍ତମ୍ଭ ପାଇଁ ରାଜ୍ୟ ସରକାର କେନ୍ଦ୍ରକୁ ଜମି ଯୋଗାଇ ଦେଇଥିଲେ । ମାତ୍ର ବର୍ଷକ ପରେ ବି ଖାଲି ପଡ଼ିଛି ସ୍ଥାନ । ଆଉ ଐତିହ୍ୟର ସେହି ବୀର ଯୋଦ୍ଧା ପାଇକମାନଙ୍କର ପ୍ରତିମୂର୍ତ୍ତି ଖୋଲା ଆକାଶ ତଳେ ପଡ଼ି ରହିଛି । ଅସ୍ତ୍ରଶସ୍ତ୍ର ସବୁ ସତ୍ତା ହରାଇବାକୁ ବସିଥିବା ବେଳେ ସ୍ମୃତିସ୍ତମ୍ଭ ସ୍ଥାପନା ପାଇଁ ବିଭିନ୍ନ ଫୋରମରୁ ପୁଣିଥରେ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଦାବି ପତ୍ର ପ୍ରଦାନ କରାଯାଇଛି ।