କରୋନା ପ୍ରଭାବ ସତ୍ତ୍ୱେ ଅଧିକ ମାମଲା ରୁଜୁ କରିଛି ଭିଜିଲାନ୍ସ ବିଭାଗ

କଟକ: ଗତ ବର୍ଷ (୨୦୨୧)ରେ କରୋନା ପ୍ରଭାବ ସତ୍ତ୍ୱେ ଦୁର୍ନୀତି ରୋକିବା ଦିଗରେ କାର୍ଯ୍ୟ ଜାରି ରଖିଥିଲା ଭିଜିଲାନ୍ସ ବିଭାଗ । ୪୬ ଜଣ ପ୍ରଥମ ଶ୍ରେଣୀ କର୍ମଚାରୀଙ୍କୁ ମିଶାଇ ମୋଟ ୪୭୫ଜଣଙ୍କ ବିରୋଧରେ ୨୬୭ ଅପରାଧିକ ମାମଲା ରୁଜୁ କରିଛି ଭିଜିଲାନ୍ସ ବିଭାଗ । ସେମାନଙ୍କ ମଧ୍ୟରେ ୪୦ ଜଣ ଦ୍ୱିତୀୟ ଶ୍ରେଣୀ, ୨୩୧ ଜଣ ତୃତୀୟ ଶ୍ରେଣୀ ଏବଂ ୪ଜଣ ଚତୁର୍ଥ ଶ୍ରେଣୀ କର୍ମଚାରୀ ମଧ୍ୟ ରହିଛନ୍ତି । ୨୦୨୦ ଅପେକ୍ଷା ଅଧିକ ମାମଲା ରୁଜୁ କରିଛି ଦୁର୍ନୀତି ନିବାରଣ ବିଭାଗ ।

୨୬୭ ଜଣ ସରକାରୀ ଅଧିକାରୀଙ୍କ ବିରୋଧରେ ୧୬୭ଟି ଅପରାଧିକ ମାମଲା ରୁଜୁ ହୋଇଛି । ୯୨ଟି ଆୟ ବହିର୍ଭୂତ୍ତ ସମ୍ପତ୍ତି ଠୁଳ ମାମଲା ରୁଜୁ ହୋଇଥିବା ବେଳେ ୧୦୭ କୋଟି ଜବତ କରାଯାଇଛି । ୧୦୦ ଜଣ ସରକାରୀ କର୍ମଚାରୀଙ୍କୁ ମିଶାଇ ୧୦୯ ଜଣ ଲାଞ୍ଚ ନେବା ବେଳେ ଧରିଛି ଭିଜିଲାନ୍ସ । ଏଥିସହିତ ୧୫ ଜଣ ସରକାରୀ ଅଧିକାରୀଙ୍କ ଠାରୁ ୫୮.୮୪ ଲକ୍ଷ ଅନ୍‌ଆକାଉଣ୍ଟଟେଡ୍ ଟଙ୍କା ଜବତ କରିଛି ।

ଜିରୋ ଟଲେରାନ୍ସ ନୀତି ଅନୁଯାୟୀ ନିମାପଡ଼ା ତହସିଲଦାର ରାମ ଚନ୍ଦ୍ର ଜେନା , ଜଗତସିଂହପୁର ଉପ ଜିଲ୍ଲାପାଳ ଗୌରାଙ୍ଗ ଚରଣ ମହାନ୍ତି, ବୈତରଣୀ ଜଳ ସେଚନ ଡିଭିଜନ ଏସ୍ଇ ବିଧାନ ଚରଣ ସାହୁ, କଳାହାଣ୍ଡି ବିଶ୍ୱନାଥପୁର ସିଡିପିଓ ମୀନା ପାତ୍ର, ଥୁଆମୂଳ ରାମପୁର ପୁଷ୍ପାଞ୍ଜଳି ରଥ, ଦେବଗଡ଼ ଅବକାରୀ ବିଭାଗ ଡେପୁଟୀ ସୁପରିଟେଣ୍ଡେଣ୍ଟ ଅଜିତ କୁମାର ମହାପାତ୍ର, ତିହିଡି ବ୍ଳକ୍ କେସିଅର ପ୍ରଭାକର ପ୍ରଧାନ, ଡେପୁଟୀ ମ୍ୟାନେଜର ଓପିଏଚ୍ଡବ୍ଳ୍ୟୁସି ପ୍ରତାପ କୁମାର ସାମଲ, ନରୋତ୍ତମ ବେହେରା ପ୍ରଦୂଷଣ ନିୟନ୍ତ୍ରଣ ବୋର୍ଡ ବାଲେଶ୍ୱର ଆଞ୍ଚଳିକ ଅଧିକାରୀ ଭାବେ କାର୍ଯ୍ୟରତ ଥିବା ସମୟରେ ସେମାନଙ୍କ ବିରୋଧରେ ଦୁର୍ନୀତି ଅଭିଯୋଗ ପ୍ରମାଣିତ ହେବାରୁ ସେମାନଙ୍କୁ ବିହିଷ୍କୃତ କରାଯାଇଥିଲା ।