କରେନା ସଂକ୍ରମଣ ପାଇଁ ଛାନିଆ ହେଲେଣି ନେତା ? ସମସ୍ତଙ୍କୁ ଘାରିଲାଣି କରୋନା ଭୟ…
ଭୁବନେଶ୍ୱର: ନେତାଙ୍କୁ ଘାରିଲା ସାମାଜିକ ଦୂରତା ନିୟମ ପାଳନ ଚିନ୍ତା । ଜଣେ ବିଧାୟକ କରୋନା ପଜିଟିଭ ଚିହ୍ନଟ ହେବା ପରେ ସବୁ ଦଳକୁ ଚିନ୍ତା ଘାରିଛି । କୋଭିଡ୍ ନିୟମ ମାନିବା ପାଇଁ ବିଜେପି ନେତାଙ୍କୁ ବିରୋଧୀ ଦଳ ନେତା ଅପିଲ କରିଛନ୍ତି । ସେହିପରି ଜନପ୍ରତିନିଧିମାନଙ୍କ ପାଇଁ ନୂଆ ଗାଇଡ୍ଲାଇନ୍ ଆଣିବାକୁ କଂଗ୍ରେସ ଦାବି କରିଛି ।
ବିଧାୟକଙ୍କୁ କରୋନା ଓ କ୍ୱାରେଣ୍ଟାଇନରେ କେନ୍ଦ୍ରମନ୍ତ୍ରୀ । ଓଡ଼ିଶାରେ ପ୍ରଥମ ଥର ଲାଗି ଜଣେ ନିର୍ବାଚିତ ପ୍ରତିନିଧିଙ୍କ କରୋନା ପଜିଟିଭ୍ ଆସିବା ପରେ ରାଜନେତାମାନଙ୍କ ମନରେ ଏବେ ଛନକା ପଶିଛି । ସାମାଜିକ ଦୂରତାକୁ କିପରି ବଜାୟ ରଖିହେବ ସେ ନେଇ ଚିନ୍ତା ପ୍ରକଟ କରିଛନ୍ତି ।
ଯେଉଁ ଦଳର ନେତାମାନେ ନିୟମ ଉଲଘଂନ କରୁଥିଲେ ସେ ଦଳର ନେତା ବିଧାୟକ, ସାଂସଦ ଓ କର୍ମୀଙ୍କ ନିୟମ ମାନିବାକୁ ଅପିଲ କରିଛନ୍ତି । ବିରୋଧୀ ଦଳ ନେତା ପ୍ରଦୀପ୍ତ ନାୟକ କହିଛନ୍ତି ବଞ୍ଚିବା ପାଇଁ ସମସ୍ତେ ନିୟମ ମାନିବା ଉଚିତ୍ । ଆମେ ସଂକ୍ରମିତ ହେବା ନାହିଁ, କି ଅନ୍ୟକୁ ସଂକ୍ରମଣ କରିବା ନାହିଁ । ସେପଟେ ନିର୍ବାଚିତ ପ୍ରତିନିଧିମାନଙ୍କ ପାଇଁ କରୋନା ଗାଇଡ୍ଲାଇନ୍ ଆଣିବା ପାଇଁ କଂଗ୍ରେସ ବିଧାୟକ ସୁର ରାଉତରାୟ ଦାବି କରିଛନ୍ତି ।
ସେପଟେ ଶାସକ ଦଳ ମଧ୍ୟ କରୋନା ନେଇ ରାଜ୍ୟ ଓ କେନ୍ଦ୍ର ସରକାର କରିଥିବା ଗାଇଡ୍ ଲାଇନକୁ ମାନିବାକୁ ପୁଣି ଅନୁରୋଧ କରିଛନ୍ତି । ଗୋଟିଏ ସ୍ଥାନରେ ୫ରୁ ଅଧିକ ଲୋକ ଏକଜୁଟ୍ ନହେବା, ସାମାଜିକ ଦୂରତା ବଜାୟ ରଖିବା, ମାସ୍କ ପିନ୍ଧିବା ଓ ଜନଗହଳି ନକରିବା ପାଇଁ ଯେଉଁ ଗାଇଡ଼ଲାଇନ୍ ଅଛି ତାହା ସମସ୍ତଙ୍କ ପାଇଁ ବୋଲି ମନ୍ତ୍ରୀ ଅଶୋକ ପଣ୍ଡା କହିଛନ୍ତି । ତେଣୁ ରାଜନେତା ପାଇଁ ନୂଆ ଗାଇଡ୍ଲାଇନ କାହିଁକି ଅଣାଯିବ ବୋଲି ସେ ପାଲଟା ପ୍ରଶ୍ନ କରିଛନ୍ତି ।
