JEE-NEET ପରୀକ୍ଷାର୍ଥୀଙ୍କ ପାଇଁ ସମସ୍ତ ବ୍ୟବସ୍ଥା କରିବେ ସରକାର

ଭୁବନେଶ୍ୱର: ରାଜ୍ୟର ୭ଟି ସହରର ୨୬ଟି ସହରରେ ହେବ JEE ପରୀକ୍ଷା । NTA ଦ୍ୱାରା ହେଉଥିବା ଏହି ପରୀକ୍ଷାରେ ରାଜ୍ୟରେ ୩୭ ହଜାର ଛାତ୍ରଛାତ୍ରୀ ପରୀକ୍ଷା ଦେବେ । କୋଭିଡ୍ ସଂକ୍ରମଣକୁ ଦେଖି ରାଜ୍ୟ ସରକାର ପରୀକ୍ଷାର୍ଥୀଙ୍କ ପାଇଁ ବଡ଼ ଘୋଷଣା କରିଛନ୍ତି । ପରୀକ୍ଷା କେନ୍ଦ୍ରଠାରୁ ଦୂରରେ ଥିବା ଛାତ୍ରଛାତ୍ରୀ, ଯେଉଁମାନଙ୍କ ନିଜସ୍ୱ ଯାତାୟାତ ସୁବିଧା ଓ ରହିବା ବ୍ୟବସ୍ଥା ନାହିଁ । ସେମାନଙ୍କୁ ସରକାର ସମସ୍ତ ସୁବିଧା ଯୋଗାଇ ଦେବେ । ମାଗଣା ଯିବାଆସିବା ସହ ରହିବା ବନ୍ଦୋବସ୍ତ କରିବେ ସରକାର ।

ଯାତାୟାତ ଅସୁବିଧା ନହେବା ପାଇଁ ସରକାର ମହାମାରୀ ଆଇନରେ କୋହଳ କରିବେ । ଏନେଇ ପ୍ରେସମିଟରେ ସୂଚନା ଦେଇଛନ୍ତି ମୁଖ୍ୟ ଶାସନ ସଚିବ ଅସିତ୍ ତ୍ରିପାଠୀ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶ କ୍ରମେ ସରକାର ସବୁ ପ୍ରକାର ବ୍ୟବସ୍ଥା କରିଛନ୍ତି । ଯେଉଁ ଛାତ୍ରଛାତ୍ରୀ ନିଜେ ପରୀକ୍ଷା କେନ୍ଦ୍ରକୁ ଯାଇପାରିବେ ନାହିଁ । ସେମାନଙ୍କୁ ବିନା ଅର୍ଥରେ ସରକାର ଯାତାୟାତ ସୁବିଧା ଯୋଗାଇଦେବେ । ଜିଲ୍ଲା ମୁଖ୍ୟାଳୟରୁ ପରୀକ୍ଷା ସେଣ୍ଟର ଯାଏଁ ଯିବା ଆସିବା ବନ୍ଦୋବସ୍ତ କରିବ ପ୍ରଶାସନ । ୧୬ରୁ ୧୭ ହଜାର ପରୀକ୍ଷାର୍ଥୀ ଭୁବନେଶ୍ୱର ଓ କଟକରେ ପରୀକ୍ଷା ଦେବେ ।

ଜେଇଇ ମେନ୍ ପରୀକ୍ଷା ସେପ୍ଟେମ୍ବର ୧ରୁ ୬ତାରିଖ ଯାଏଁ ହେବ । ୩୦ ଅଗଷ୍ଟରୁ ୭ ସେପ୍ଟେମ୍ବର ଯାଏଁ ପରୀକ୍ଷାର୍ଥୀ ଓ ସେମାନଙ୍କ ଅଭିଭାବକଙ୍କ ଯାତାୟାତ ଉପରେ କୌଣସି କଟକଣା ରହିବ ନାହିଁ । ବିଭିନ୍ନ ଜିଲ୍ଲାରୁ ପରୀକ୍ଷାର୍ଥୀ ସେଣ୍ଟର ହୋଇଥିବା ୭ଟି ସହରକୁ ଆସିବେ । ସେଥିପାଇଁ ଜିଲ୍ଲାର ଗୋଟିଏ ଗୋଟିଏ ଆଇଟିଆଇକୁ ନୋଡାଲ ସେଣ୍ଟର କରାଯାଇଛି । ନୋଡାଲ ସେଣ୍ଟରକୁ ଟେଲିଫୋନ୍ ମାଧ୍ୟମରେ ପରୀକ୍ଷାର୍ଥୀ ଟ୍ରାନ୍ସପୋର୍ଟ ବ୍ୟବସ୍ଥା ଚାହୁଁଥିଲେ ଜଣାଇବେ ।

ବିଭିନ୍ନ ଜିଲ୍ଲା ପାଇଁ ଜାରି ହୋଇଥିବା ନୋଡାଲ ସେଣ୍ଟର ନମ୍ବର

ଘରୋଇ ଓ ସରକାରୀ ଆଇଟିଆଇ, ପଲିଟେକନିକରେ ଥିବା ହଷ୍ଟେଲରେ ପରୀକ୍ଷାର୍ଥୀ ଓ ସମ୍ପର୍କୀୟ ମାଗଣାରେ ରହିବା ନେଇ ବ୍ୟବସ୍ଥା କରାଯିବ । ତେବେ, ସରକାରଙ୍କ ପାଖେ କେଉଁ ଜିଲ୍ଲାରୁ କେତେ ପରୀକ୍ଷାର୍ଥୀ କେଉଁ କେନ୍ଦ୍ରରେ ପରୀକ୍ଷା ଦେବେ ସେନେଇ ତଥ୍ୟ ନାହିଁ । ତେଣୁ, ନିଜସ୍ୱ ସମ୍ବଳ ନଥିବା ପରୀକ୍ଷାର୍ଥୀ ନିଃଶୁଳ୍କ ସରକାରୀ ସୁବିଧା ହାସଲ କରିବାକୁ ଚାହୁଁଥିଲେ ନୋଡାଲ ସେଣ୍ଟରକୁ ଯୋଗାଯୋଗ କରିବାକୁ ମୁଖ୍ୟ ଶାସନ ସଚିବ ଅନୁରୋଧ କରିଛନ୍ତି । NEET ପାଇଁ ମଧ୍ୟ ଅନୁରୂପ ପ୍ରକାର ବ୍ୟବସ୍ଥା ସରକାର ଗ୍ରହଣ କରିବେ ।