ବେଆଇନ୍ ବାଲି ଉତ୍ତୋଳନକୁ ପ୍ରୋତ୍ସାହନ କରୁଥିଲେ ତହସିଲଦାର, ନିଲମ୍ବନ କଲେ ସରକାର

ମୟୂରଭଞ୍ଜ: ବଡସାହି ତହସିଲଦାର ମମତାଜ ମହାରଣା ଚାକିରୀରୁ ନିଲମ୍ବିତ । ବେଆଇନ ବାଲି ଉତ୍ତୋଳନକୁ ପ୍ରୋତ୍ସାହିତ କରିଥିବା ଅଭିଯୋଗରେ କାର୍ଯ୍ୟାନୁଷ୍ଠାନ । ବଡସାହି ତହସିଲ ଅଧୀନ ବୁଢାବଳଙ୍ଗ ନଦୀର ଦୁଇ ବାଲିଘାଟକୁ ନେଇ ଏନଜିଟି ମାମଲା ପରେ ଅଭିଯୁକ୍ତ ତହସିଲଦାରଙ୍କୁ ବିଭାଗ ପକ୍ଷରୁ ନିଲମ୍ବିତ କରାଯାଇଛି । ଏପ୍ରେଲ ୩୦ତାରିଖରେ ମୟୂରଭଞ୍ଜ ଜିଲ୍ଲାପାଳଙ୍କ ଅଭିଯୋଗ କ୍ରମେ ପୃଥକ ବାଲି ଘାଟ ପାଇଁ ଲିଜଧାରୀ ପ୍ରଦୀପ ବିନ୍ଧାଣିଙ୍କ ସହିତ ବଡ଼ସାହି ତହସିଲଦାର ମମତାଜ ମହାରଣାଙ୍କ ନାମରେ ଦୁଇଟି ମାମଲା ରୁଜୁ କରାଯାଇଥିଲା।

ଏହାକୁ ନେଇ ବଡସାହି ପୁଲିସ ଲିଜଧାରୀ ପ୍ରଦୀପ ବିନ୍ଧାଣିକୁ ଗିରଫ କରି କୋର୍ଟ ଚାଲାଣ କରିଥିଲା । ତେବେ ୩୦ତାରିଖ ଶନିବାର ଅପରାହ୍ନ ଠାରୁ ଜିଲ୍ଲା ଛାଡି ତହସିଲଦାର ପଳାଇଯାଇଛନ୍ତି । ସରକାରରେ ଯିଏ ଯେକୌଣସି ପଦବୀରେ ଥିଲେ ମଧ୍ୟ ରାଜ୍ୟ ସରକାର ଜିରୋ ଟଲେରାନ୍ସ ନୀତିରୁ ବାଦ ପଡୁନାହାଁନ୍ତି କେହି  । ଘଟଣାରେ ତହସିଲଦାରଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି  । ତାଙ୍କୁ ଚାକିରୀରୁ ନିଲମ୍ବିତ କରାଯାଇଛି  ।