ଭୁବନେଶ୍ବର: ଦରଦାମ ଲଗାତର ବୃଦ୍ଧି ସହ ଅତ୍ୟାବଶ୍ୟକ ସାମଗ୍ରୀର ଦର ଆଦୌ ନ କମିବା ପ୍ରସଙ୍ଗକୁ ନେଇ ସରକାରଙ୍କୁ ସମ୍ପୂର୍ଣ୍ଣ ଦୋଷ ଦେଲା ରାଜ୍ୟ ବ୍ୟବସାୟୀ ସଂଘ। ଏନଡିଏ ସରକାର ଶାସନକୁ ଆସିବା ପରେ ଏଭଳି ଦରବୃଦ୍ଧି ଘଟି ଚାଲିଛି। ଦେଶକୁ ଏବେ ଏକାଧିକ ଇଷ୍ଟ ଇଣ୍ଡିଆ କମ୍ପାନୀ ଶାସନ କରୁଛନ୍ତି ଓ ଦରବୃଦ୍ଧି କରୁଛନ୍ତି। ସରକାର ନିରରଦ୍ରଷ୍ଟା ସାଜିଛନ୍ତି। ସରକାର କାହିଁକି ନିରବଦ୍ରଷ୍ଟା ସାଜିଛନ୍ତି ବୋଲି ପ୍ରଶ୍ନ କଲା ବ୍ୟବସାୟୀ ସଂଘ।
ଦରଦାମ ନିୟନ୍ତ୍ରଣ ଓ ଉତ୍ପାଦନ ବୃଦ୍ଧି ପାଇଁ ସରକାର ଆନ୍ତରିକତାର ସହ ଚାହୁଁ ନ ଥିବା କହିଲା ବ୍ୟବସାୟୀ ସଂଘ। ତେଣୁ ଏହାର ପରିଣାମ ଲୋକେ ଭୋଗୁଛନ୍ତି ଓ ଭୋଟରେ ଏହାର ଏହାର ପ୍ରତିଫଳନ ଦେଖିବାକୁ ମିଳିବ ବୋଲି କହିଲା ସଂଘ। ରାଜ୍ୟ ଯୋଗାଣ ମନ୍ତ୍ରୀ ଦରଦାମ ବୃଦ୍ଧିକୁ ନେଇ କହୁଛନ୍ତି ଗୋଟିଏ କଥା ଏବଂ ହେଉଛି ଗୋଟିଏ କଥା। ତେଣୁ ଲୋକେ ଏସବୁ ଜାଣିଲେ ମନ୍ତ୍ରୀଙ୍କ କଥାକୁ ଗୁରୁତ୍ୱ ଦେବେ ନାହିଁ ବୋଲି କହିଲା ବ୍ୟବସାୟୀ ସଂଘ। ଖାଇବା ତେଲରେ ଇମପୋର୍ଟେଡ଼ ଡ୍ୟୁଟି ୨୦ ପ୍ରତିଶତ ବଢାଯାଇଥିବା ବେଳେ ଏଯାଏ ଏହି ବର୍ଦ୍ଧିତ ଅର୍ଥ ସରକାରଙ୍କ ଖାତାକୁ ଯାଇ ନାହିଁ। ସରକାର ଏହାକୁ ତୁରନ୍ତ ଲାଗୁ କରିବାକୁ କହିଲେ।
କର୍ପୋରେଟ ହାଉସ ପାଖରେ ୬୦ ଦିନର ଷ୍ଟକ ଥିଲା। ତେଣୁ ସେମାନେ ୨୦ ପ୍ରତିଶତ ଅଧିକ ଅର୍ଥ ନ ଦେଇ ଏହି ଲାଭ ଲୋକଙ୍କ ଠାରୁ ନେଉଛନ୍ତି ଓ ଆହୁରି ୧୦ ପ୍ରତିଶତ ଲାଭ ବି ନେଉଛନ୍ତି। କିନ୍ତୁ ସରକାର ଏହାକୁ ପ୍ରଶ୍ରୟ ଦେଉଛନ୍ତି ଓ ଚୁପ ରହୁଛନ୍ତି। ଯେଉଁ କାରଣ ଯୋଗୁ କୃଷି ଉତ୍ପାଦନ କମୁଛି କେନ୍ଦ୍ର କି ରାଜ୍ୟ ସରକାର ସେ ସମ୍ପର୍କରେ ଜାଣିବା ପାଇଁ ଆଦୌ ଆଗ୍ରହ ପ୍ରକାଶ କରୁ ନାହାନ୍ତି। ଯେଉଁ ମାନଙ୍କ ଅନୁଭୂତି ଅଛି ସେମାନଙ୍କୁ ନେଇ ଚାଷ କାର୍ଯ୍ୟକୁ ଆଗେଇ ନେବା ଦେଖାଯାଉ ନାହିଁ। ଉତ୍ପାଦନ ବଢାଇବାକୁ ନେଇ ସରକାରଙ୍କ ଆନ୍ତରିକତା ଦେଖାଯାଉ ନାହିଁ ବୋଲି କହିଲେ ବ୍ୟବସାୟୀ ସଂଘ ମହାସଚିବ ସୁଧାକର ପଣ୍ଡା।
ଓଡ଼ିଶାରେ ପନିପରିବା ଆବଶ୍ୟକତା ଅଧିକ। ଆବଶ୍ୟକତାର ୨୫ ପ୍ରତିଶତ ବି ରାଜ୍ୟରେ ଉତ୍ପାଦନ ହେଉ ନାହିଁ। ସରକାର ଆନ୍ତରିକତା ଦେଖାଇଲେ ଏହା ହୋଇପାରନ୍ତା। ସରକାର କଣ କରୁଛନ୍ତି ସେ କଥା ଜଣାପଡୁନି। ସମସ୍ତଙ୍କୁ ନେଇ ସମନ୍ୱୟ ରକ୍ଷା କରି ଉତ୍ପାଦନ ବଢାଇବା କଥା କହିବା ସରକାରଙ୍କ ଆନ୍ତରିକତା ନ ଥିଲା ବରଂ ଲୋକ ଦେଖାଣିଆ ଥିଲା। ଦରଦାମ ବୃଦ୍ଧିର ପ୍ରକୃତ କାରଣ ସମ୍ପର୍କରେ ଖୁବ ଶୀଘ୍ର ପତ୍ରିକା ଓ ୱେବ ଚ୍ୟାନେଲ କରିବ ବ୍ୟବସାୟୀ ସଂଘ। ଏହି ଚ୍ୟାନେଲ ମାଧ୍ୟମରେ ଦରବୃଦ୍ଧିର କାରଣ ଓ ଦାୟୀ କିଏ ସେସବୁର ପର୍ଦାଫାସ କରାଯିବ। ଲୋକେ ଉପଯୁକ୍ତ ମୂଲ୍ୟରେ କିଭଳି ଉପଯୁକ୍ତ ଜିନିଷ ପାଇବ ସେ ନେଇ ସବୁ କରାଯିବ। ବଡ ବଡ କଥା ନ କହି କିଭଳି ବାସ୍ତବତା ଲୋକଙ୍କ ସମ୍ମୁଖକୁ ଆସିବ ସେ ନେଇ ସବୁ ଉଦ୍ୟମ କରାଯିବ ବୋଲି କହିଲା ସଂଘ।
