ଭୁବନେଶ୍ୱର: କୁବେର ସହକାରୀ ଯନ୍ତ୍ରୀଙ୍କ ଅମାପ ସମ୍ପତ୍ତି। ଦୁଇ ଦିନର ମାରାଥନ ରେଡ୍। ଯେତେ ଖୋଲିଲେ ସେତେ ବାହାରୁଛି। ଟଙ୍କା ଦେଖି ଟେରା ଭିଜିଲାନ୍ସ ଅଧିକାରୀ। ପୁଳା ପୁଳା ଟଙ୍କା, ସୁନା, ଫ୍ଲାଟ ଆଉ ପ୍ଲଟ୍ । ଅସାଧୁ ଉପାୟରେ ଠୁଳ କରିଥିଲେ ଆଇଟିଡିଏ ସହକାରୀ ଯନ୍ତ୍ରୀ ସନ୍ତୋଷ ଦାସ। ଚଢାଉ ବେଳେ ସନ୍ତୋଷଙ୍କ ଘରୁ ମିଳିଛି ନଗଦ ୪୧ ଲକ୍ଷ ଟଙ୍କା। ସାରା ରାତି ଟଙ୍କା ଗଣି ଗଣି ହାଲିଆ ଭିଜିଲାନ୍ସ ଟିମ୍ । ଆଦିବାସୀ ଅଞ୍ଚଳର ବିକାଶ ପାଇଁ ଆସୁଥିଲା ପୁଳା ପୁଳା ଟଙ୍କା । ୩୫ ବର୍ଷ ଚାକିରୀ କାର୍ଯ୍ୟକାଳରେ ସହକାରୀ ଯନ୍ତ୍ରୀ ସାଜି କରୁଥିଲେ ପକେଟ ଗରମ । ଲଗାତର ଦୁଇ ଦିନ ମାରାଥନ ରେଡ୍ରେ ଠାବ ହୋଇଛି ଅଚଳାଚଳ ସମ୍ପତ୍ତି।
ସନ୍ତୋଷଙ୍କ ବାଲେଶ୍ୱର ଘରୁ ମିନିଛି ନଗଦ ୪୧ ଲକ୍ଷ ୭୭ ହଜାର ଟଙ୍କା ଓ ୬୫୯ ଗ୍ରାମ ସୁନା। ଏହାଛଡ଼ା ବାରିପଦା, ବାଲେଶ୍ୱର ଓ ଭୁବନେଶ୍ୱରରେ ପୁଞ୍ଜା ପୁଞ୍ଜା କୋଠାବାଡି ସାଙ୍ଗକୁ ପ୍ଳଟ, ଜମି, ଫିକ୍ସ ଡିପୋଜିଟ। ଦ୍ୱିତୀୟ ଦିନରେ ଭୁବନେଶ୍ୱର ବଡଗଡର ଘରେ ରେଡ ବେଳେ ୨ହଜାର ଟଙ୍କିଆ ରୂପା ନୋଟ, ଚାମଚ ଓ ସୁନା ମୁଦି ଜବତ କରିଛି । ବଡଗଡ ଘରେ ଥିଲା ସନ୍ତୋଷଙ୍କ ସିକ୍ରେଟ ଚାମ୍ବର। ସେଠାରୁ ଗୁରୁତ୍ୱପୂର୍ଣ୍ଣ କାଗଜପତ୍ର ଜବତ ହୋଇଛି । ଜବତ ଟଙ୍କାର ଉତ୍ସ ନେଇ ସନ୍ତୋଷଙ୍କୁ ଅଟକ ରଖି ଜେରା କରୁଛି ଭିଜିଲାନ୍ସ ସେଲ୍।
ସେପଟେ ଭିଜିଲାନ୍ସ ରାଜ୍ୟରେ ଚଳିତ ବର୍ଷର କୋଟିପତି ଲାଞ୍ଚୁଆ ଅଫିସରଙ୍କ ତାଲିକା ଦେଇଛି । ଭିଜିଲାନ୍ସ ଇତିହାସରେ ଟପ-୩ ଟଙ୍କା ଜବତ ମାମଲାରେ ସବୁଠୁ ଆଗରେ ରହିଛି ଆଇଟିଡିଏ ସହକାରୀ ଯନ୍ତ୍ରୀ ସନ୍ତୋଷ ଦାସଙ୍କ ନାଁ। ରେଡ୍ରେ ମିଳିଛି ୪୧ ଲକ୍ଷ ୭୭ ହଜାର ଟଙ୍କା। ଦ୍ବିତୀୟରେ ଅଛନ୍ତି ଚାକିରିରୁ ବିଦା ହୋଇଥିବା OPHWC ପୂର୍ବତନ ଡେପୁଟି ମ୍ୟାନେଜର ପ୍ରତାପ ସାମଲ। ରେଡ୍ ବେଳେ ପ୍ରତାପଙ୍କ ଘରୁ ମିଳିଥିଲା ନଗଦ ୩୮ ଲକ୍ଷ ଟଙ୍କା। ତୃତୀୟରେ ଅଛନ୍ତି ପ୍ରଦୂଷଣ ବିଭାଗରୁ ତଡା ଖାଇଥିବା ନରୋତ୍ତମ ବେହେରା। ରେଡରେ ମିଳିଥିଲା ନଗଦ ୧୬ ଲକ୍ଷ ୫୦ ହଜାର ଟଙ୍କା। ସେହିପରି ଟପ୍-୪ରେ ଅଛନ୍ତି ଭବାନୀପାଟଣର ସ୍ପେଶାଲ ପିପି ଆଶୁତୋଷ ମିଶ୍ର। ତାଙ୍କ ଘରୁ ମିଳିଥିଲା ୧୫ ଲକ୍ଷ ୬୦ ହଜାର ଟଙ୍କା।
ପଞ୍ଚମରେ ବାଲିଗୁଡା ଆଇଟିଡିଏର କିରାଣୀ ବସନ୍ତ କୁମାର ପାଣିଗ୍ରାହୀ ରେଡ୍ରେ ତାଙ୍କ ଘରୁ ମିଳିଥିଲା ୧୩ ଲକ୍ଷ ୨୫ ହଜାର ଟଙ୍କା । ତାଲିକାର-୬ ନମ୍ବରରେ ଭୁବନେଶ୍ବରର ଓଏସଏସସିର ପିଏସ- ଟୁ ମେମ୍ବର ବିରଞ୍ଚି ନାରାୟଣ ସାହୁ। ତାଙ୍କ ଘରୁ ମିଳିଥିଲା ୧୨ ଲକ୍ଷ ୪୬ ହଜାର ଟଙ୍କା। ତାଲିକାର ଶେଷରେ ଅଛନ୍ତି କେନ୍ଦୁଝର ବୈତରଣୀ ଜଳସେଚନ ବିଭାଗରୁ ତଡା ଖାଇଥିବା ଅଧୀକ୍ଷଣ ଯନ୍ତ୍ରୀ ବିଧାନ ଚନ୍ଦ୍ର ସାହୁ। ଲାଞ୍ଚ ନେବା ମାମଲାରେ ଚଢାଉ କରୁଥିବା ବେଳେ ତାଙ୍କ ଘରୁ ମିଳିଥିଲା ୧୦ ଲକ୍ଷ ୭ ହଜାର ଟଙ୍କା। ଆଉ ଏବେ ଅନେକ ଅଫିସର ଭିଜିଲାନ୍ସ ସ୍କାନରରେ। ରାଜ୍ୟ ସରକାରଙ୍କ ଜିରୋ ଟଲେରାନ୍ସ ନୀତିରେ ଏବେ ସୁଦ୍ଧା ୧୩୨ ଜଣଙ୍କୁ ଚାକିରିରରୁ ବିଦା କରାଯାଇଛି।
