ପାରାଦୀପଠାରୁ ୩୬୦ କିମି ଦୂରରେ ‘ଅମ୍ଫାନ’, ଉତ୍ତର ଓଡ଼ିଶାରେ ପଡ଼ିବ ପ୍ରଭାବ
1 min read
ଭୁବନେଶ୍ୱର: ୧୯୯୯ ପରେ ବଙ୍ଗୋପସାଗରରେ ଆସିଥିବା ସବୁଠୁ ବଡ଼ ବାତ୍ୟା ‘ଅମ୍ଫାନ’ । ସମୁଦ୍ରରେ ପବନର ବେଗ ୨୦୦-୨୪୦ କିମି ରହିଛି । ଉତ୍ତର ଉତ୍ତର-ପଶ୍ଚିମ ଦିଗରେ ଘଣ୍ଟାପ୍ରତି ୧୫ କିମି ବେଗରେ ଗତି କରୁଛି । ଏହି ବେଗ ବଢ଼ିବ ବୋଲି ଆଇଏମଡି ଡିଜି ମୃତ୍ୟୁଞ୍ଜୟ ମହାପାତ୍ର ପୂର୍ବାନୁମାନ କରିଛନ୍ତି । ଏହା ଧିରେ ଧିରେ ଉତ୍ତର ଉତ୍ତର-ପୂର୍ବ ଦିଗକୁ ଗତି କରିବ । ଆସନ୍ତାକାଲି ‘ଅମ୍ଫାନ’ ଅପରାହ୍ଣ କିମ୍ବା ସନ୍ଧ୍ୟାରେ ସୁନ୍ଦରବନ ନିକଟରେ ଦୀଘା ଓ ହତିଆ ମଝିରେ ଏହା ଅତିକ୍ରମ କରିବ ।
‘ଅମ୍ଫାନ’ ଏବେ ଦକ୍ଷିଣରେ ପାରାଦୀପଠାରୁ ୩୬୦ କିମି ଦୂରରେ ଥିବାବେଳେ ଦୀଘା ଠାରୁ ଦକ୍ଷିଣ ଦକ୍ଷିଣ-ପଶ୍ଚିମରେ ୫୧୦ କିମି ଦୂରରେ ଅଛି । ବାଂଲାଦେଶର ଖେପୁରିଆ ଠାରୁ ଦକ୍ଷିଣ ଦକ୍ଷିଣ-ପଶ୍ଚିମ ଦିଗରେ ୬୫୦ କିମି ଦୂରରେ ରହିଛି ‘ଅମ୍ଫାନ’ ।
‘ଅମ୍ଫାନ’ ସ୍ଥଳଭାଗ ଛୁଇଁବା ବେଳେ ପବନର ବେଗ ୧୫୫-୧୬୫ କିମି ଘଣ୍ଟା ପ୍ରତି ରହିବ । ଗଷ୍ଟିଙ୍ଗ ସ୍ପିଡ୍ ୧୮୫ କିମି ରହିବ । ପବନର ବେଗ ଅଧିକ ରହୁଥିବାରୁ ବିଦ୍ୟୁତ୍ ଖୁଣ୍ଟ, ମୋବାଇଲ୍ ଟାୱାର ନଷ୍ଟ ହେବ । ଆଜବେଷ୍ଟସ୍ ଓ କଚ୍ଚା ଘର ସହିତ ନଡ଼ିଆ, ତାଳ ଗଛ ନଷ୍ଟ ହେବ । ଟ୍ରେନ୍, ବସ୍ ଓ ରୋଡ ଯାତାୟତ ମଧ୍ୟ ପ୍ରଭାବିତ ହେବ ।
ପ୍ରଭାବରେ ଅତି ପ୍ରବଳ ବର୍ଷା ହେବ । ଉତ୍ତର ଓଡ଼ିଶାରେ ‘ଅମ୍ଫାନ’ର ପ୍ରଭାବ ରହିବ, ଅତି ପ୍ରବଳ ବର୍ଷା ହେବ । ଦକ୍ଷିଣ ଉପକୂଳ ଓଡ଼ିଶାରେ ଏବେ ପବନର ବେଗ ୫୫-୬୫ କିମି ରହିଛି । ଗଞ୍ଜାମ, ଗଜପତି ଓ ପୁରୀ ଜିଲ୍ଲା ସମୁଦ୍ର ଅଞ୍ଚଳରେ ପବନର ବେଗ ବଢ଼ିଛି । ଆସନ୍ତାକାଲି ଏହି ବେଗ ଉତ୍ତର ଓଡ଼ିଶା ଉପକୂଳରେ ୧୧୦ କିମି ରହିବା ସହିତ ଗଷ୍ଟିଂ ୧୨୫ କିମି ଘଣ୍ଟାପ୍ରତି ରହିବ । ପୁରୀ, ଖୋର୍ଦ୍ଧା, କଟକ, ଯାଜପୁରରେ ପବନର ବେଗ ୫୫ରୁ ୬୫ କିମି ଘଣ୍ଟାପ୍ରତି ରହିବ ।
