ଶେଷ କୃତ୍ୟ ପାଇଁ ମଶାଣିରୁ ମଶାଣି ବୁଲିଲା କରୋନା ଯୋଦ୍ଧାଙ୍କ ଶବ ତଥାପି…
କନ୍ଧମାଳ: କରୋନା ଯୋଦ୍ଧାଙ୍କ ମୃତଦେହକୁ ମିଳିଲାନି ସମ୍ମାନ । ଜୀବନ ଥିବା ଅବସ୍ଥାରେ ଲୋକଙ୍କ ସେବା କରି ନିଜର କର୍ତ୍ତବ୍ୟ ସୁଚାରୁ ରୂପେ ତୁଲେଇ ଥିଲେ ମଲା ପରେ କିନ୍ତୁ ଲୋକେ ସେମାନଙ୍କ କର୍ତ୍ତବ୍ୟକୁ ତୁଲେଇବାକୁ ମାନ କରିଦେଲେ । ଗାଁ ଶ୍ମଶାନରେ ମାଟିର ପୁଅକୁ ଦୁଇ ହାତ ଯାଗା ଦେବାକୁ କୁଣ୍ଠା ବୋଧ ହେଲେ । ସରକାରଙ୍କ ନିବେଦନ ସତ୍ତ୍ୱେ ଅବହେଳିତ ହେଲା କରୋନା ଯୋଦ୍ଧାଙ୍କ ମରଶରୀର । ମୃତଦେହକୁ କବର ଦେବାକୁ ବିରୋଧ କଲେ ଗ୍ରାମବାସୀ ।
ଏପରି ଏକ ଘଟଣା ଘଟିଛି କନ୍ଧମାଳ ଜିଲ୍ଲାର ଜି. ଉଦୟଗିରି ବ୍ଲକ ଅନ୍ତର୍ଗତ ମାଲିକ ପୋଡ଼ି ଆୟୁଷ ଡାକ୍ତର ତପନ ପ୍ରଧାନଙ୍କ ଦେହ ଅସୁସ୍ଥ ହେବାରୁ ତାଙ୍କୁ ସ୍ଥାନୀୟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା । କିନ୍ତୁ ପରେ ତାଙ୍କ ଦେହ ଅତି ଗୁରୁତର ହେବାରୁ ଫୁଲବାଣୀ ମୁଖ୍ୟଚିକିତ୍ସାଳୟକୁ ସ୍ଥାନାସ୍ତର ବେଳେ ବାଟରେ ହିଁ ତାଙ୍କର ମୃତ୍ୟୁ ହୋଇଯାଇଥିଲା । ଏହାପରେ ମୃତଦେହକୁ ଗାଁକୁ ନିଆଯାଇଥିଲା ।
ମାଲିକ ପୋଡ଼ି ଗ୍ରାମବାସୀ ଡାକ୍ତରଙ୍କ ମୃତ ଦେହକୁ କରୋନା ସନ୍ଦିଗ୍ଧ ଭାବି ବିରୋଧ କରିଥିଲେ । ଏଥିରେ ବ୍ଲକ ଅଧିକାରୀଙ୍କ ହସ୍ତକ୍ଷେପ ପରେ ମଧ୍ୟ କୌଣସି ସୁଫଳ ମିଳିନଥିଲା । ଏହାପରେ ତାଙ୍କୁ ନିକଟସ୍ଥ କନବାଗିରୀ ଶ୍ମଶାନକୁ ନିଆଯାଇଥିଲା । କିନ୍ତୁ ସେଠାରେ ମଧ୍ୟ ଗ୍ରାମବାସୀ କବର ଦେବାକୁ ବିରୋଧ କରିଥିଲେ । ତେବେ ବିରୋଧ ସତ୍ତ୍ୱେ ବ୍ଲକ ଅଧିକାରୀ ଓ ତହସିଲଦାରଙ୍କ ହସ୍ତକ୍ଷେପ ଫଳରେ କରୋନା ଯୋଦ୍ଧାଙ୍କୁ କବର ଦିଆଯାଇଥିଲା । ଏଠି ପ୍ରଶ୍ନ ଉଠୁଛି ଜଣେ ଡାକ୍ତରଙ୍କ ଅନ୍ୟ କାରଣରୁ ମୃତ୍ୟୁ ପରେ କାହିଁକି ଅନ୍ତିମ ସଂସ୍କାର ପାଇଁ ବାଧା ଉପୁଜିଲା । ସଂପର୍କୀୟ ମଧ୍ୟ ଏଥିପାଇଁ ପ୍ରଶାସନକୁ ଦାୟୀ କରିଛନ୍ତି ।
( ଫୁଲବାଣୀରୁ ପ୍ରଶାନ୍ତ କୁମାର ଜେନା )
