କାମ କରିବାକୁ ହାତ ଯୋଡ଼ି ନିବେଦନ କଲେ ନୀତିଶ କୁମାର

ପାଟନା: ହାତ ଯୋଡ଼ିଲେ ବିହାର ମୁଖ୍ଯମନ୍ତ୍ରୀ ନୀତିଶ କୁମାର । କାମ କରିବାକୁ କଲେ ଅନୁରୋଧ । କହିଲେ, କାମ କର ହାତ ଯୋଡୁଛି, ଗୋଡ଼ ବି ଧରିବି କି ?

ଏକ ନିଯୁକ୍ତି ପତ୍ର ବଣ୍ଟନ ଉତ୍ସବରେ ଯୋଗ ଦେଇ ଏପରି ହାତ ଯୋଡ଼ିଛନ୍ତି ବିହାରର ମୁଖ୍ଯମନ୍ତ୍ରୀ ନୀତିଶ କୁମାର । ପାଟନାରେ ଆଜି ସ୍ପେସାଲ ସର୍ଭେ ଆସିଷ୍ଟାଣ୍ଟ ସେଟେଲମେଣ୍ଟ ଅଫିସ ଓ ଅନ୍ଯ ପଦର ନିଯୁକ୍ତି ପତ୍ର ବଣ୍ଟାଯାଉଥିଲା । ଏହି କାର୍ଯ୍ଯକ୍ରମରେ ଯୋଗ ଦେଇଥିଲେ ମୁଖ୍ଯମନ୍ତ୍ରୀ ।

କାର୍ଯ୍ଯକ୍ରମ ସମୟରେ ସେ କହିଥିଲେ- ରାଜ୍ଯର ବିଧାନସଭା ନିର୍ବାଚନ ପୂର୍ବରୁ ଜମି ସର୍ଭେ କାମ ଶେଷ କରନ୍ତୁ । ଏହି ସବୁ କାମ ୨୦୨୫ ଜୁଲାଇ ସୁଦ୍ଧା ଶେଷ ହୋଇଗଲେ ଭଲ ହେବ । ତା’ପରେ ସେ ଅତିରିକ୍ତ ମୁଖ୍ଯ ଶାସନ ସଚିବ ଦୀପକ କୁମାର ସିଂହଙ୍କୁ କହିଥିଲେ, ସାର୍  ମୁଁ ହାତ ଯୋଡ଼ି ଆପଣଙ୍କୁ ଅନୁରୋଧ କରୁଛି । ଏହି କାମଟା କରି ଦିଅନ୍ତୁ । ଆହୁରି ପାଦେ ଆଗେଇ ଯାଇ ନୀତିଶ କୁମାର କହିଥିଲେ, ଆପଣଙ୍କ ଗୋଡ଼ ଧରିବି କି ? ମୁଁ ସମସ୍ତଙ୍କୁ ଅନୁରୋଧ କରୁଛି, ଏହି କାମ ଯେତେ ଶୀଘ୍ର ସମ୍ଭବ କରି ଦିଅନ୍ତୁ । ତାଙ୍କର ଏହି କଥା ସେଠାରେ ହାସ୍ଯରୋଳ ସୃଷ୍ଟି କରିଥିଲା ।