ଆଜିଠୁ ଆଠ ସହରରେ ନାଇଟ କର୍ଫ୍ୟୁ
ନୂଆଦିଲ୍ଲୀ: ଦେଶକୁ ପୁଣି ଘାରିଲାଣି ମହାମାରୀ କରୋନାର ଭୟ । ଦୈନିକ ସଂକ୍ରମଣ ସଂଖ୍ୟା ୪୦ ହଜାର ପାର୍ କରିବାରେ ଲାଗିଛି । ମହାରାଷ୍ଟ୍ର, ପଞ୍ଜାବ, ଗୁଜରାଟ, ମଧ୍ୟପ୍ରଦେଶ ଓ ଦିଲ୍ଲୀରେ ସଂକ୍ରମଣ ବଢିବାରେ ଲାଗିଛି । ଆଜିଠୁ ରାଜସ୍ଥାନର ୮ ସହରରେ ଲାଗୁ ହେଇଛି ନାଇଟ୍ କର୍ଫ୍ୟୁ । ବଢୁଥିବା ସଂକ୍ରମଣକୁ ନଜରରେ ରଖି ଏଭଳି ନିଷ୍ପତ୍ତି ନେଇଛନ୍ତି ଗେହଲଟ ସରକାର । ସେହିଭଳି ମଧ୍ୟପ୍ରଦେଶର ଭୋପାଳ, ଇନ୍ଦୋର ଓ ଜବଲପୁର ସହରରେ ପ୍ରତି ରବିବାର ସରକାର ଲକଡାଉନ୍ ଘୋଷଣା କରିଛନ୍ତି । ପଞ୍ଜାବରେ ମଧ୍ୟ କରୋନା ଚିନ୍ତାର କାରଣ ପାଲଟିଛି । ଦିଲ୍ଲୀରେ କରୋନା ସଂକ୍ରମଣ ଚଳିତବର୍ଷ ନୂଆ ରେକର୍ଡ କରିଛି । ସଂକ୍ରମଣକୁ କାବୁ କରିବା ପାଇଁ ରାଜ୍ୟ ସରକାର ବ୍ୟାପକ ପଦକ୍ଷେପ ନେଉଥିବା ସ୍ବାସ୍ଥ୍ୟ ବିଭାଗ କହିଛି । ପ୍ରତିଦିନ ପ୍ରାୟ ୮୦ ହଜାର ସ୍ବାବ୍ ଟେଷ୍ଟ କରାଯାଉଥିବା ବେଳେ ସଂକ୍ରମିତଙ୍କୁ ଆଇସୋଲେସନରେ ରଖାଯାଉଛି । ପୂର୍ବରୁ ସକାଳ ୯ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ ଟିକା ଦିଆଯାଉଥିଲା ।
