ଅମରାବତୀ ଔଷଧ ବିକ୍ରେତା ହତ୍ୟା ମାମଲା, ଆତଙ୍କବାଦୀ ଘଟଣା ଭାବେ ଏତଲା ଦାୟର କଲା NIA

ଅମରାବତୀ: ମହାରାଷ୍ଟ୍ର ଅମରାବତୀର ଔଷଧ ବିକ୍ରେତା ଉମେଶ ପ୍ରହ୍ଲାଦରାଓ କୋହ୍ଲେଙ୍କୁ ହତ୍ୟାକୁ ଆତଙ୍କବାଦୀ ଘଟଣା ଭାବେ ଏତଲା ଦାୟର କରିଛି NIA । ଭାରତର ଏକ ବର୍ଗର ଲୋକଙ୍କୁ ଆତଙ୍କିତ କରିବା ଉଦ୍ଦେଶ୍ୟରେ ଏହି ହତ୍ୟା କରାଯାଇଛି ବୋଲି ଏନଆଇଏ ଦର୍ଶାଇଛି । ଉମେଶ କୋହ୍ଲେଙ୍କ ହତ୍ୟା କୌଣସି ବିଦେଶୀ ଷଡଯନ୍ତ୍ରର ଅଂଶ କି ନାହିଁ, ସେ ନେଇ ମଧ୍ୟ ତଦନ୍ତ କରିବ ଏନଆଇଏ ।

ନୂପୁର ଶର୍ମାଙ୍କୁ ସମର୍ଥନ କରି ସୋସିଆଲ ମିଡିଆରେ ପୋଷ୍ଟ କରିଥିବାରୁ ଉମେଶଙ୍କୁ ଗତମାସ ୨୧ ତାରିଖରେ ଗଳାକାଟି ହତ୍ୟା କରାଯାଇଥିବା ଅଭିଯୋଗ ହୋଇଛି । ଏହି ଘଟଣାରେ ୫ ଜଣଙ୍କୁ ଗିରଫ କରାଯାଇଛି । ଗତକାଲି କେନ୍ଦ୍ର ଗୃହ ମନ୍ତ୍ରାଳୟ ଘଟଣାର ତଦନ୍ତ ପାଇଁ ଏନଆଇଏକୁ ନିର୍ଦ୍ଦେଶ ଦେଇଥିଲା । ଏନଆଇଏର ତିନିଜଣିଆ ଟିମ୍ ଅମରାବତୀ ଯାଇ ପ୍ରାଥମିକ ତଦନ୍ତ ଆରମ୍ଭ କରିଛନ୍ତି । ଉଦୟପୁରରେ ଦରଜୀ କହ୍ନେୟାଲାଲଙ୍କୁ ହତ୍ୟା କରିବାର ୭ ଦିନ ପୂର୍ବରୁ ଅମରାବତୀରେ ଉମେଶଙ୍କୁ ହତ୍ୟା କରାଯାଇଥିଲା ।