ଏପଟେ ମୁକେଶ ଅମ୍ବାନୀଙ୍କ ମିଟିଂ, ସେପଟେ ରିଲାଏନ୍ସର ବୁଡ଼ିଗଲା ୭୧ ହଜାର କୋଟି ଟଙ୍କା

ନନ୍ଦିଘୋଷ ବ୍ୟୁରୋ: ଏସିଆର ନମ୍ବର ଓ୍ବାନ ବ୍ୟବସାୟୀ ମୁକେଶ ଅମ୍ବାନୀ ବାର୍ଷିକ ସାଧାରଣ ବୈଠକ (ଏଜିଏମ)କୁ ନିବେଶକ ମାନେ ବହୁତ ଆଶା ନେଇ ଅନାଇଥିଲେ । ଆଶା ଥିଲା ମୁକେଶ ତାଙ୍କ ଟେଲିକମ କମ୍ପାନୀ ଜିଓ ରିଲାଏନ୍ସ ଆଇପିଓକୁ ନେଇ କିଛି ଘୋଷଣା କରିବେ । ଏହାସହ ଏମିତି ଅନ୍ୟ କିଛି ଘୋଷଣା ବି କରିବେ ଯାହା ତାଙ୍କ ନିବେଶକଙ୍କୁ ଭଲ ଲାଭ ଦେବ । ଟେଲିକମ କମ୍ପାନୀ ଆଇପିଓ ଘୋଷଣା ହେଲା ସତ । ହେଲେ ଏହା ୨୦୨୬ ମଧ୍ୟ ଭାଗକୁ ଆସିବ । ଏପରିକି ଆଇପିଓ ଆସିବାର କୌଣସି ନିର୍ଦ୍ଧିଷ୍ଟ ତାରିଖ ବି କୁହାଯାଇନି । ନା କୌଣସି ବଡ଼ ଘୋଷଣା କରାଯାଇଛି । ଫଳରେ ରିଲାଏନ୍ସ କମ୍ପାନୀର ସେୟାରରେ ବଡ଼ ଧରଣର ହ୍ରାସ ଦେଖିବାକୁ ମିଳିଛି । ଗୁରୁତ୍ବପୁର୍ଣ୍ଣ କଥଶ ହେଲା ଆଇପିଓ ଘୋଷଣା ପରେ କମ୍ପାନୀର ସେୟାର ୧୪୦୦ ଟଙ୍କା ଲେଭଲ ପାର କରିଯାଇଥିଲା । ମାତ୍ର ୨୫ ମିନିଟ ପରେ ଏହା ୧୩୫୦ ଟଙ୍କା ଲେଭଲକୁ ଖସି ଆସିଥିଲା । ଅର୍ଥାତ ଏହି ସମୟରେ କମ୍ପାନୀ ସେୟାରରେ ୩.୭୫ ପ୍ରତିଶତ ଅଧିକ ହ୍ରାସ ଦେଖିବାକୁ ମିଳିଥିଲା । ଏହି କାରଣରୁ ରିଲାଏନ୍ସ କମ୍ପାନୀର ମାର୍କେଟ ପ୍ୟାକକୁ ୭୧ ହଜାର କୋଟିରୁ ଅଧିକ ଟଙ୍କାର କ୍ଷତି ସହିବାକୁ ପଡ଼ିଲା ।

ଶୁକ୍ରବାର ଅପରାହ୍ନ ୨ଟାରେ ରିଲାଏନ୍ସ କମ୍ପାନୀର ବାର୍ଷିକ ସାଧାରଣ ବୈଠକ ଆରମ୍ଭ ହୋଇଥିଲା । ଏହାର କିଛି ସମୟ ପରେ ମୁକେଶ ଅମ୍ବାନୀ ଟେଲିକମ ଆର୍ମ ରିଲାଏନ୍ସ ଜିଓର ଆଇପିଓ ଘୋଷଣା କରିଛନ୍ତି । ଏହି କାରଣରୁ କମ୍ପାନୀ ସେୟାରରେ ଏକ ପ୍ରତିଶତ ବୃଦ୍ଧି ଦେଖିବାକୁ ମିଳିଥିଲା । ଏହାସହ କମ୍ପାନୀର ସେୟାର ୧୪୦୩ ଟଙ୍କା ସହ ଦିନର ଶ୍ରେଷ୍ଠ ସ୍ତରରେ ପହଞ୍ଚି ଯାଇଥିଲା । ଏହାପରେ କମ୍ପାନୀ ପକ୍ଷରୁ କୌଣସି ବଡ଼ ଘୋଷଣା କରାଯାଇ ନଥିଲା । ଯାହା ନିବେଶଙ୍କ ମଧ୍ୟରେ ନିରାଶ ଭରି ଦେଇଥିଲା । ଏହି କାରଣରୁ ରିଲାଏନ୍ସ କମ୍ପାନୀର ସାୟାରରେ ଲାଭ ବୁକିଂ ଆରମ୍ଭ ହୋଇଯାଇଥିଲା । ପ୍ରାୟ ୨୫ ମିନିଟ ମଧ୍ୟରେ କମ୍ପାନୀର ସେୟାର ୩.୭୫ ପ୍ରତିଶତ ତଳକୁ ଖସିବା ସହ ୧୩୫୦.୩୦ ଟଙ୍କାରେ କାରବାର କରିବାକୁ ଲାଗିଲା । ଅପରାହ୍ନ ୩ଟା ୫ ମିନିଟରେ କମ୍ପାନୀର ସେୟାର ୧.୯୦ ପ୍ରତିଶତ ହ୍ରାସ ସହ ୧୩୬୧.୩୦ ଟଙ୍କାରେ କାରବାର କରୁଛି । ଦିନକ ପୂର୍ବରୁ କମ୍ପାନୀର ସେୟାର ୧୩୮୭.୬୫ ଟଙ୍କାରେ ବନ୍ଦ ହୋଇଥିଲା । ଶୁକ୍ରବାର ସାମାନ୍ୟ ହ୍ରାସ ସହ ୧୩୮୪.୨୦ ଯଙ୍କାରୁ ଆରମ୍ଭ ହୋଇଥିଲା ।

ଗୁରୁତ୍ବପୂର୍ଣ୍ଣ କଥା ହେଲା ମାତ୍ର ୨୫ ମିନିଟରେ କମ୍ପାନୀକୁ ୭୧ ହଜାର କୋଟିରୁ ଅଧିକ ଟଙ୍କାର କ୍ଷତି ହୋଇଗଲା । ସଂଖ୍ୟାକୁ ଦେଖିଲେ କମ୍ପାନୀର ସେୟାର ଦିନର ସର୍ବଶ୍ରେଷ୍ଠ ସ୍ତରରେ ପହଞ୍ଚି ଯିବା ସହ ମାର୍କେଟ କ୍ୟାପ ୧୮,୯୭,୮୩୭.୪୭ କୋଟି ଟଙ୍କା ଥିଲା । କମ୍ପାନୀର ସେୟାର ହ୍ରାସ ପାଇବା ସହ କାର୍ମେଟ କ୍ୟାପ ୧୮,୨୬,୫୫୦.୨୦ କୋଟି ଟଙ୍କାକୁ ଖସି ଆସିଛି । ଏହାର ଅର୍ଥ କମ୍ପାନୀର କାର୍ମେଟ କ୍ୟାପକୁ ୭୧,୨୮୭.୨୭ ଟଙ୍କାର କ୍ଷତି ଘଟିଛି ।

ଅର୍ଥନୀତି ବିଶେଷଜ୍ଞଙ୍କ ଅନୁସାରେ, ମୁକେଶ ଅମ୍ବାନୀ ଜିଓର ଆଇପିଓ ଘୋଷଣା କଲେ ସତ ହେଲେ ଏହା ଆସନ୍ତା ବର୍ଷ ମଧ୍ୟ ଭାଗରେ ଲାଗୁ ହେବ । ହେଲେ ନିବେଶକ ଆଶା କରୁଥିଲେ ଦୀପାବଳି ପାଖାପାଖିରେ ଆଇପିଓ ଆସିଯିବ । ଏହି କାରଣରୁ ରିଲାଏନ୍ସ କମ୍ପାନୀ ସେୟାରରେ ଲାଭ ବୁକିଂ ଦେଖିବାକୁ ମିଳିଥିଲା ।